Ózbekstan men Resei arasyndaǵy qarym-qatynasqa syzat tústi, - dep jazady Dalanews.kz.
Eki el arasyndaǵy diplomatiialyq daýǵa sebep bolǵan oqiǵa Tashkenttegi №188 mektepte oryn alǵan, munda Reseiden kelgen oqýshy muǵalimnen orys tilinde sabaq berýin suraǵan. Alaida bul ótinish ózbek muǵalimine unamaǵan syńaily, ol oqýshyny shapalaqpen tartyp jibergen.
Ózbek aqparat quraldary taratqan málimet boiynsha muǵalim bir aptaǵa qamaýǵa alynǵan. Alaida reseilik propaganda oǵan álgi oqiǵanyń qatysy joǵyn, ustazdyń qamalýyna onyń mektep direktorynyń orynbasarymen tóbelesi túrtki bolǵanyn aitady.
Oqiǵaǵa bailanysty Resei Syrtqy ister ministrligi óz narazylyǵyn bildirip, Ózbekstannan túsinik berýdi talap etýde. Kreml ideologtarynyń nusqaýymen jumys isteitin reseilik saiasatkerler de japatarmaǵai jamyrai jóneldi. Federatsiia keńesiniń halyqaralyq ister jónindegi komiteti tóraǵasynyń orynbasary Andrei Klimov Ózbekstandy "Ýkraina taǵdyry kútip tur" dep qoqan-loqy kórsetti.
Reseidiń Syrtqy ister ministrliginiń baspasóz hatshysy Mariia Zaharova áleýmettik jelide beinejazbaǵa alańdaýshylyq bildirdi. «Biz bul jaǵdaiǵa qatysty ózbek tarapynan resmi túsinikteme suradyq», — dep atap ótti Zaharova. «Tashkent tarapyna bul materialǵa quqyqtyq baǵa berýdi jáne rastalǵan jaǵdaida balaǵa qatygezdik kórsetken kinálilerge shara qoldanýdy usynamyz. Bul másele bizdiń erekshe nazarymyzda», — dedi ol.
Óz kezeginde Ózbekstandaǵy «Millii tiklanish» (Ulttyq jańǵyrý) partiiasynyń jetekshisi jáne parlamenttiń tómengi palatasynyń vitse-spikeri Álisher Qadyrov Telegram-da: «Máskeýge bizdiń ishki máselelerimizdi sheshkennen góri, ózderiniń problemalaryna nazar aýdarǵany durys bolar edi. Ózbekstandaǵy mektepte ózbek balasynyń quqyǵynyń buzylýy ózbek zańdaryna sáikes tergeledi», — dep málimdedi.
Qadyrovtyń Reseige qarsy syny – aimaqtaǵy ózgeristerdiń nyshany. Onyń Reseidiń syrtqy isterine aralaspaýy qajettigin ashyq aitýy, Tashkenttiń Máskeýge tolyq baǵynyshty emes ekenin kórsetedi.
Sarapshylardyń pikirinshe, "Tashkentti Kievtiń taǵdyry kútip tur" degen Kremldiń málimdemesi Orta Aziia elderi úshin tańsyq emes.
"Ashtyqty genotsid dep tanyǵysy kelgen Moldaviiany, keńestik kezeńniń kóshe ataýlaryn ózgertken Qyrǵyzstandy dál osyndai ritorikamen qorqytqan edi. Qazaqstan turǵyndarynyń da mundaiǵa eti úirenip ketken. Endi Ózbekstanǵa da kezek kelgendei. Reseidiń bul áreketteri Orta Aziiadaǵy postsovettik eldermen qarym-qatynasta qysymdy kúsheitip jatqanyn aiǵaqtaidy. Aimaqta Kreml agressiiasyna qarsylyq birte-birte kúsheiip, ulttyq múddeni qorǵaýǵa degen umtylys baiqalady. Mundai úrdis Reseidiń aldaǵy ýaqytta aimaqtaǵy dominant rólin saqtap qalýyna úlken kedergi bolady", - deidi olar.
