Kúsh atasy Qajymuqannyń 149 jyldyǵyna arnalǵan týrnir ótedi
Kúsh atasy Qajymuqan Muńaitpasovtyń dástúrli halyqaralyq týrniri biyl 17 mamyr kúni bastalyp, 3 kúnge sozylady. Bul týraly Óńirlik kommýnikatsiialar qyzmetinde Ordabasy aýdanynyń ákimi Qairat Joldybaiuly men oblystyq sport basqarmasynyń basshysy Polat Qyryqbaev málimdedi.
Dástúrli týrnir qazaq halqynyń tarihyndaǵy tuńǵysh kásipqoi balýany, orasan kúshtiń iesi, kúrestiń birneshe túrinen álem chempiony Qajymuqan Muńaitpasulynyn urpaq jadynda jańǵyrtyp otyrýǵa baǵyttalǵan. Ol – 54 memlekette kúreske túsip, 48 medal oljalaǵan jaýyryny jerge timegen batyr.
– QR Tuńǵysh Prezidenti Nursultan Nazarbaev Máńgilik el bolý muraty babalardyń erligi, búgingi býynnyń eren isteri jáne jas urpaqtyń jasampazdyǵy arasynda sabaqtastyq bolsa ǵana júzege asatynyn únemi aityp keledi. Tarihta esimi altyn áriptermen jazylǵan uly tulǵalardy dáripteý – osy sabaqtastyqty jalǵastyrý bolmaq. Qajymuqan Muńaitpasov – barsha qazaqtyń maqtanyshy. Onyń erligi, eldiń atyn álemge tanytýǵa sińirgen eńbegi ushan teńiz. Ómiriniń sońǵy kúnderin Ordabasyda ótkizip, osy qasietti mekendi máńgilik turaǵy etken palýandy búginde Ordabasydan bóle jara sóz ete almaimyz. Kúsh atasynyń asyl súiegi jatqan aýdanymyzdan álemdik, halyqaralyq jarystarda top jaryp júrgen balýandar Ulas Momynov, Nurlan Asylov, Dáýlet Baijigitov, Qýat Baiqojaev, Eltai Sydyqov, Ońǵar Úndemesov, Ońdybai Úndemesov, Seidahmet Qonaqbaev syndy jigitter Qajymuqannyń izimen júrdi, – dedi Ordabasy aýdanynyń ákimi.
Búginde aýdanda ataqty balýan bolsam degen armannyń jeteginde ósip kele jatqan jetkinshekterdiń kóptigi de – kóńilge medeý. Jumanazar Ersultanov, Ádiljan Ystybaev, aǵaiyndy Ǵumar, Ǵusman Qyrǵyzbaevtar, Abzal Arystanbek talai dúbirli dodadan top jaryp, Ordabasy óńiriniń mereiin tasytyp júr.
Biylǵy doda da eń myqtyny anyqtaýmen qatar, qazaq kúresiniń damý satysyndaǵy taǵy bir baspaldaqqa kóterilýiniń kórinisine ainalmaq. Qajymuqan Muńaitpasovtyń 149 jyldyǵyna arnalǵan 55-týrnirge 5 memleketten 200-den astam sportshy qatysady dep josparlanýda.
Jalpy Ordabasy jerinen QR eńbegi singen 6 jattyqtyrýshy, 3 sport qairatkeri, kúresten 100-den asa sport sheberi, birneshe halyqaralyq dárejedegi sport sheberi, Álem birinshilikteriniń, Aziia chempionattarynyń jeńimpazdary men júldegerleri shyqqan.
Túrkistan oblysy Óńirlik kommýnikatsiialar qyzmeti
