Kúrshimde kópir salynatyn boldy
Shyǵys Qazaqstan oblysyndaǵy Kúrshim aýdanynyń jarty ǵasyrdan beri kóterip kele jatqan máselesi oń sheshimin tabatyn boldy. Memleket basshysynyń tapsyrmasynan soń biyl Buqtyrma sý qoimasynyń ústinen kópir qurylysy bastalady, dep habarlaidy "Habar-24".
Jýyq arada baiqaý arqyly qurylys júrgizetin merdiger kompaniia anyqtalmaq. Ázirge kúrshimdikter jazda eski paromdarmen, al qysta muz ústimen qatynaýǵa májbúr.
Óskemenge deiingi ainalma jol 800 shaqyrymǵa jetedi. Eger kópir salynsa araqashyqtyq 4 ese qysqarady. Jobanyń jalpy quny 30 milliard teńgeden asady. Oblystyq biýdjetten ázirge 500 million teńge bólindi. Qalǵany memleket qazynasynan berilmek. Jospar boiynsha kópir 3 jyl ishinde salynyp bitýi tiis.
Nurjan Jumadilov, oblystyq jolaýshylar kóligi jáne avtomobil joldary basqarmasynyń basshysy:
- Biyl Q.Toqaevtyń tapsyrmasy boiynsha Buqtyrma ózeninen kópir salý máselesi kóterildi. Qazirgi ýaqytta biz ministrlikke, avtomobil joldary komitetine osy jobany qarjylandyrý jóninde usynys berdik, barlyq qujattardy tapsyrdyq. Qazirgi ýaqytta biýdjetti naqtylaý kezinde kópirdi salýǵa aqsha bólinedi dep senip otyrmyz.
