شىعىس قازاقستان وبلىسىنداعى كۇرشىم اۋدانىنىڭ جارتى عاسىردان بەرى كوتەرىپ كەلە جاتقان ماسەلەسى وڭ شەشىمىن تاباتىن بولدى. مەملەكەت باسشىسىنىڭ تاپسىرماسىنان سوڭ بيىل بۇقتىرما سۋ قويماسىنىڭ ۇستىنەن كوپىر قۇرىلىسى باستالادى، دەپ حابارلايدى "حابار-24".
جۋىق ارادا بايقاۋ ارقىلى قۇرىلىس جۇرگىزەتىن مەردىگەر كومپانيا انىقتالماق. ازىرگە كۇرشىمدىكتەر جازدا ەسكى پارومدارمەن، ال قىستا مۇز ۇستىمەن قاتىناۋعا ءماجبۇر.
وسكەمەنگە دەيىنگى اينالما جول 800 شاقىرىمعا جەتەدى. ەگەر كوپىر سالىنسا اراقاشىقتىق 4 ەسە قىسقارادى. جوبانىڭ جالپى قۇنى 30 ميلليارد تەڭگەدەن اسادى. وبلىستىق بيۋدجەتتەن ازىرگە 500 ميلليون تەڭگە ءبولىندى. قالعانى مەملەكەت قازىناسىنان بەرىلمەك. جوسپار بويىنشا كوپىر 3 جىل ىشىندە سالىنىپ ءبىتۋى ءتيىس.
نۇرجان ءجۇمادىلوۆ، وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى:
- بيىل ق.توقايەۆتىڭ تاپسىرماسى بويىنشا بۇقتىرما وزەنىنەن كوپىر سالۋ ماسەلەسى كوتەرىلدى. قازىرگى ۋاقىتتا ءبىز مينيسترلىككە، اۆتوموبيل جولدارى كوميتەتىنە وسى جوبانى قارجىلاندىرۋ جونىندە ۇسىنىس بەردىك، بارلىق قۇجاتتاردى تاپسىردىق. قازىرگى ۋاقىتتا بيۋدجەتتى ناقتىلاۋ كەزىندە كوپىردى سالۋعا اقشا بولىنەدى دەپ سەنىپ وتىرمىز.
