Memleket basshysy Qasym-Jomart Toqaev búgin, 2025 jyly 1 qazanda Binance kompaniiasynyń negizin qalaýshy Chanpen Chjaony qabyldady, dep habarlaidy Dalanews.kz.
Digital Bridge 2025 halyqaralyq forýmy alańynda Qasym-Jomart Toqaev Binance kompaniiasynyń negizin qalaýshy Chanpen Chjaomen kezdesti.
Prezident álemdik kriptovaliýta indýstriiasy men qarjy tehnologiiasynyń ekojúiesin qalyptastyrýǵa Chanpen Chjaonyń qosqan úlesin joǵary baǵalady. Onyń 2022 jyly Qazaqstanǵa jasaǵan saparynyń qorytyndysy boiynsha Binance Lab bazasynda kriptoindýstriianyń óńirlik habyn ashý jónindegi memorandýmǵa qol qoiyldy.
Sol sátten beri elimizde blokchein jáne kriptotehnologiia salalarynda kóptegen perspektivti jobalar men bastamalar iske asyrylyp keledi.
Aita ketsek, 2024 jyly kóktemde AQSh soty Chanpen Chjaony tórt aiǵa bas bostandyǵynan aiyrý týraly úkim shyǵarǵan. Oǵan "óz platformasynda aqshany jylystatýǵa múmkindik berdi" degen aiyp taǵylǵan edi. Qarasha aiynda kásipker Binance basshylyǵynan ketip, AQSh-tyń aqshany jylystatýǵa qarsy zańdaryn buzdy degen aiyby boiynsha óz kinásin moiyndaǵany týraly habarlanǵan. Sondai-aq ol ózine salynǵan 50 million dollar aiyppuldy tóleýge kelisti, al kompaniianyń ózi AQSh biligine 4,3 milliard dollar tóleýi kerek bolǵan. Forbes basylymynyń málimetinshe, Chanpen Chjaonyń bailyǵy 65,7 milliard dollardy quraidy.
Buǵan deiin Memleket basshysy Telegram messendjeriniń negizin qalaýshy Pavel Dýrovty qabyldaǵanyn jazǵanbyz.
