Resei Ýkrainadaǵy soǵysty toqtatý úshin NATO 2008 jyly Býharestegi sammitte Kievke bergen ýádesinen bas tartýy kerek dep málimdedi. Bul týraly Resei Syrtqy ister ministrliginiń resmi ókili Mariia Zaharova 20 aqpanda Máskeýde ótken brifingte aitty, dep habarlaidy Dalanews.kz.
Zaharovanyń aitýynsha, Ýkrainanyń NATO-ǵa múshe bolýy Máskeý úshin «qabyldaýǵa kelmeitin» jaǵdai.
«Ýkrainanyń NATO-ǵa músheligi biz úshin múlde qolaisyz. Bul Reseidiń ulttyq qaýipsizdigine eleýli qaýip tóndiredi jáne búkil Eýropa úshin apatty saldarǵa ákeledi. Qazirgi kezde Kievti aliansqa qabyldamaý jetkiliksiz. NATO Býharestte 2008 jyly Ýkrainaǵa bolashaqta Soltústik Atlantikalyq blokqa qosylatynyna bergen ýádesin resmi túrde joqqa shyǵarýy kerek. Áitpese, bul másele Eýropadaǵy jaǵdaidy ýshyqtyra beredi», - dedi Zaharova.
Resei Ýkrainaǵa batys áskerin kirgizýge qarsy.
Zaharova sondai-aq Reseidiń Ýkraina aýmaǵynda batys elderiniń áskeri kontingentterin ornalastyrýyna qarsy ekenin atap ótti. Onyń pikirinshe, Ýkraina úshin eń jaqsy qaýipsizdik kepili - beitarap mártebe, áskeri bloktardan bas tartý jáne iadrolyq qarýǵa umtylmaý.
«Bul NATO-ǵa múshelik te, alians elderimen jasalǵan kelisimder de, nemese qandai da bir «beibitshilik missiiasy» degen jeleýmen batys áskeri interventsiiasy da Ýkraina qaýipsizdigin qamtamasyz ete almaidy», - dedi Zaharova.
Bul málimdeme Saýd Arabiiasynyń astanasy Er-Riiadta ótken AQSh pen Resei ókilderiniń alǵashqy resmi kezdesýinde jasaldy. Tórt saǵatqa sozylǵan kelissózder barysynda taraptar Vladimir Pýtin men Donald Tramptyń aldaǵy kezdesýin uiymdastyrý, ekijaqty qarym-qatynastardy damytý jáne Ýkraina máselesinde «bir-biriniń múddelerin eskerý» týraly ýaǵdalastyqqa qol jetkizgen.
Eske salsaq, 2024 jyldyń maýsymynda Vladimir Pýtin Resei Syrtqy ister ministrliginiń basshylyǵymen kezdesýde soǵysty toqtatýdyń basty sharttaryn ataǵan bolatyn. Olarǵa:
•Ýkrainanyń Donetsk, Lýgansk, Herson jáne Zaporoje oblystarynan áskerin tolyqtai shyǵarýy;
•Kievtiń NATO-ǵa múshelikten bas tartýy;
•Batys elderiniń Reseige qarsy barlyq sanktsiialaryn alyp tastaýy.
Sonymen qatar, The Washington Post basylymy seisenbi kúni tańerteńgi habarlamasynda Resei tarapy aldaǵy kelissózderde joǵary laýazymdy sheneýnikterge, iri biznes ókilderine jáne energetika salasyna qatysty keibir sanktsiialardyń joiylýyn basymdyqtardyń biri retinde qoiatynyn jazdy.
