AQSh? Atajaýyna qarsy Eýraziialyq odaqtyń atynan qarymta qaitarýǵa shaqyrǵan Lavrovtyń (Resei SIM, red.) orynbasary Aleksandr Pankinniń túneýkúngi emeýrini erteńgi kúni naqty is-áreketke ulasatyn syńaiy bar.
Pankin AQSh-pen aradaǵy aitys-tartysty Eýraziialyq odaqtyń kóleminde qarastyryp, Qazaqstandy Batystyń opponenti retinde kórsetkisi kelgen-di.
"Odaq elderine tize batyrǵysy keletin pasyq piǵyldy kúshterdiń betin qaitarý kerekpiz, bul másele kún tártibinde tur", – degen edi Pankin.
...
Kreml ókili Qazaqstannyń Lýkashenkodai "láppai, taqsyrǵa" salyp, álgi usynysty quptai jónelerin kútse kerek.
Bizdiń eldiń Syrtqy ister ministrligi pále izdegen Pankinge lezde jaýap qatyp, kúlli odaqtyń atynan pikir bildirmeýdi eskertip ótti. Eýraziialyq odaqtyń saiasatpen qaq-soǵy joǵyn, uiymnyń áýelgi muraty alys-beris ekenin jáne sonymen shektelý kerektigin kezekti ret qaperine saldy.
"Eýraziialyq odaqtyń áý bastaǵy maqsat-muratynan aýytqymańyzdar. Tek qana ekonomika jáne sonyń sheńberinen shyqpaý keregin umytpaǵaisyz, Pankin myrza. Uiymdy tabiǵatyna jat, bógde fýnktsiialarmen bylǵamańyzdar. Odaqty saiasilandyrýǵa qarsy ekenimizdi málimdeimiz! Buǵan qatysty birtalai májilis ótkizip, máselege núkte qoiǵan sekildi edik...
Batys elderine shara qoldanýdy odaq aýqymynda qarastyrýǵa jol berilmeidi. Batys sanktsiiasynyń saiasi astary bar. Ol tutas Eýraziialyq odaqqa emes, osy odaqtyń ishindegi jekelegen memleketterge baǵyttalyp otyr", – dep qysqa da nusqa jaýap qatty bizdiń vedomstvo.
Osyǵan orai The Insider-ke kólemdi maqala bergen belgili saiasattanýshy Arkadii Dýbnov "Kreml Qazaqstannyń qyr sońyna túsip aldy. Batysqa qarsy qoimaiynsha tynym tappaidy" degen syńaida sóilepti.
"Bul túrimen Kreml Eýraziialyq odaqtyń túbine jetedi. Odaqtyń kúireýi Kremldiń kesirinen bolady. Odaqtastarynyń oiymen sanaspaýdyń sońy soǵan ákeledi. Resei osy otyz jylda Qazaqstannyń demografiialyq quramy úlken ózgeriske ushyrap, bul elde Máskeýdiń pozitsiiasyn quptai bermeitin tegeýrindi aýditoriianyń qalyptasqanyn ańǵarar emes.
Aq orda kópvektorly, san salaly saiasatynan aýytqymaidy. Buǵan birinshi kezekte osy eldegi qazaqtildi aýditoriia jol bermeidi. Olar Máskeýmen aýyz jalasqansha, Batyspen birge bolǵandy jón dep sanaidy.
Eń soraqysy reseilik saiasatkerlerdiń oi-óresi keshegi keńestik kezeńniń túsiniginen árige aspai tur. Az ulttarmen astamsyp sóileitin sindrom reseilik saiasatkerler men diplomattardy túptiń-túbi orǵa jyǵady.
Olar osy arqyly Máskeýge qarsylyqty odan ári údetip, Kremlge óshtikpen qaraityn aýditoriianyń sanyn ulǵaityp jatyr. Óz obaldary ózine. Qazaq qoǵamy Resei dese kirpidei jiyryla qalatyn jaǵdaiǵa jetti. Buǵan Kremldiń ózi kináli.
Pýtinniń tóńiregi keńestik kezeńniń kelmeske ketkenin, bir kezderi qolastynda bolǵan elderge burynǵydai ámiri júrmeitinin paiymdai almai ótetin shyǵar. Qazirgi Reseidiń eń úlken tragediiasy osy...", – deidi sarapshy.
...
Al pále izdegen Pankinge bizdiń eldiń biligi der kezinde toitarys berdi. Ilgeridegi málimdemeden keiin ile-shala Saýda jáne integratsiia vitse-ministri Jánel Kúshikova jaýap qatyp, Kreml ókiliniń sózin joqqa shyǵardy.
"Bul másele kún tártibinde turǵan joq. Batys pen AQSh-qa Eýraziialyq odaqtyń atynan ujymdasyp jaýap qatý uiymnyń quziretine kirmeidi. Qazaqstan syrtqy saiasatta ustanǵan baǵdarynan aýytqymaidy, printsipi men pozitsiiasynan taimaidy", – dedi ol.
Al Arkadii Dýbnov ýaqyt óte Máskeý men Batystyń arasy ýshyǵa túspese, bitise qoiýy ekitalai dep paiymdaidy. Ashýǵa býlyqqan Resei japan túzde jalǵyz qalǵandy qalamaidy. Qazaqstandy qaita qolqalap, Batysqa qarsy sóileýge itermeleidi.
"Qazaqstan bas tartqan jaǵdaida osyǵan deiingi aqparattyq arandatýǵa qaita kóshedi. Pýtin men onyń nókerleriniń Qazaqstanǵa qatysty kúni keshegi málimdemesi aiaqasty paida bolǵan joq. Munyń bári josparlanǵan dúnie. Resei quzǵa qulaýǵa shaq tur. Biraz jalǵyz qulaǵanda qalamaidy...", – deidi Dýbnov.
Ázirlegen, Dýman BYQAI
