اقش؟ اتاجاۋىنا قارسى ەۋرازيالىق وداقتىڭ اتىنان قارىمتا قايتارۋعا شاقىرعان لاۆروۆتىڭ (رەسەي ءسىم، رەد.) ورىنباسارى الەكساندر پانكيننىڭ تۇنەۋكۇنگى ەمەۋرىنى ەرتەڭگى كۇنى ناقتى ىس-ارەكەتكە ۇلاساتىن سىڭايى بار.
پانكين اقش-پەن اراداعى ايتىس-تارتىستى ەۋرازيالىق وداقتىڭ كولەمىندە قاراستىرىپ، قازاقستاندى باتىستىڭ وپپونەنتى رەتىندە كورسەتكىسى كەلگەن-دى.
"وداق ەلدەرىنە تىزە باتىرعىسى كەلەتىن پاسىق پيعىلدى كۇشتەردىڭ بەتىن قايتارۋ كەرەكپىز، بۇل ماسەلە كۇن تارتىبىندە تۇر"، – دەگەن ەدى پانكين.
...
كرەمل وكىلى قازاقستاننىڭ لۋكاشەنكوداي "ءلاپپاي، تاقسىرعا" سالىپ، الگى ۇسىنىستى قۇپتاي جونەلەرىن كۇتسە كەرەك.
ءبىزدىڭ ەلدىڭ سىرتقى ىستەر مينيسترلىگى پالە ىزدەگەن پانكينگە لەزدە جاۋاپ قاتىپ، كۇللى وداقتىڭ اتىنان پىكىر بىلدىرمەۋدى ەسكەرتىپ ءوتتى. ەۋرازيالىق وداقتىڭ ساياساتپەن قاق-سوعى جوعىن، ۇيىمنىڭ اۋەلگى مۇراتى الىس-بەرىس ەكەنىن جانە سونىمەن شەكتەلۋ كەرەكتىگىن كەزەكتى رەت قاپەرىنە سالدى.
"ەۋرازيالىق وداقتىڭ ءاۋ باستاعى ماقسات-مۇراتىنان اۋىتقىماڭىزدار. تەك قانا ەكونوميكا جانە سونىڭ شەڭبەرىنەن شىقپاۋ كەرەگىن ۇمىتپاعايسىز، پانكين مىرزا. ۇيىمدى تابيعاتىنا جات، بوگدە فۋنكسيالارمەن بىلعاماڭىزدار. وداقتى ساياسيلاندىرۋعا قارسى ەكەنىمىزدى مالىمدەيمىز! بۇعان قاتىستى ءبىرتالاي ءماجىلىس وتكىزىپ، ماسەلەگە نۇكتە قويعان سەكىلدى ەدىك...
باتىس ەلدەرىنە شارا قولدانۋدى وداق اۋقىمىندا قاراستىرۋعا جول بەرىلمەيدى. باتىس سانكسياسىنىڭ ساياسي استارى بار. ول تۇتاس ەۋرازيالىق وداققا ەمەس، وسى وداقتىڭ ىشىندەگى جەكەلەگەن مەملەكەتتەرگە باعىتتالىپ وتىر"، – دەپ قىسقا دا نۇسقا جاۋاپ قاتتى ءبىزدىڭ ۆەدومستۆو.
وسىعان وراي The Insider-كە كولەمدى ماقالا بەرگەن بەلگىلى ساياساتتانۋشى اركاديي دۋبنوۆ "كرەمل قازاقستاننىڭ قىر سوڭىنا ءتۇسىپ الدى. باتىسقا قارسى قويمايىنشا تىنىم تاپپايدى" دەگەن سىڭايدا سويلەپتى.
"بۇل تۇرىمەن كرەمل ەۋرازيالىق وداقتىڭ تۇبىنە جەتەدى. وداقتىڭ كۇيرەۋى كرەملدىڭ كەسىرىنەن بولادى. وداقتاستارىنىڭ ويىمەن ساناسپاۋدىڭ سوڭى سوعان اكەلەدى. رەسەي وسى وتىز جىلدا قازاقستاننىڭ دەموگرافيالىق قۇرامى ۇلكەن وزگەرىسكە ۇشىراپ، بۇل ەلدە ماسكەۋدىڭ پوزيسياسىن قۇپتاي بەرمەيتىن تەگەۋرىندى اۋديتوريانىڭ قالىپتاسقانىن اڭعارار ەمەس.
اق وردا كوپۆەكتورلى، سان سالالى ساياساتىنان اۋىتقىمايدى. بۇعان ءبىرىنشى كەزەكتە وسى ەلدەگى ءقازاقتىلدى اۋديتوريا جول بەرمەيدى. ولار ماسكەۋمەن اۋىز جالاسقانشا، باتىسپەن بىرگە بولعاندى ءجون دەپ سانايدى.
ەڭ سوراقىسى رەسەيلىك ساياساتكەرلەردىڭ وي-ورەسى كەشەگى كەڭەستىك كەزەڭنىڭ تۇسىنىگىنەن ارىگە اسپاي تۇر. از ۇلتتارمەن استامسىپ سويلەيتىن سيندروم رەسەيلىك ساياساتكەرلەر مەن ديپلوماتتاردى ءتۇپتىڭ-تۇبى ورعا جىعادى.
ولار وسى ارقىلى ماسكەۋگە قارسىلىقتى ودان ءارى ۇدەتىپ، كرەملگە وشتىكپەن قارايتىن اۋديتوريانىڭ سانىن ۇلعايتىپ جاتىر. ءوز وبالدارى وزىنە. قازاق قوعامى رەسەي دەسە كىرپىدەي جيىرىلا قالاتىن جاعدايعا جەتتى. بۇعان كرەملدىڭ ءوزى كىنالى.
ءپۋتيننىڭ توڭىرەگى كەڭەستىك كەزەڭنىڭ كەلمەسكە كەتكەنىن، ءبىر كەزدەرى قولاستىندا بولعان ەلدەرگە بۇرىنعىداي ءامىرى جۇرمەيتىنىن پايىمداي الماي وتەتىن شىعار. قازىرگى رەسەيدىڭ ەڭ ۇلكەن تراگەدياسى وسى..."، – دەيدى ساراپشى.
...
ال پالە ىزدەگەن پانكينگە ءبىزدىڭ ەلدىڭ بيلىگى دەر كەزىندە تويتارىس بەردى. ىلگەرىدەگى مالىمدەمەدەن كەيىن ىلە-شالا ساۋدا جانە ينتەگراسيا ۆيسە-مينيسترى جانەل كۇشىكوۆا جاۋاپ قاتىپ، كرەمل وكىلىنىڭ ءسوزىن جوققا شىعاردى.
"بۇل ماسەلە كۇن تارتىبىندە تۇرعان جوق. باتىس پەن اقش-قا ەۋرازيالىق وداقتىڭ اتىنان ۇجىمداسىپ جاۋاپ قاتۋ ۇيىمنىڭ قۇزىرەتىنە كىرمەيدى. قازاقستان سىرتقى ساياساتتا ۇستانعان باعدارىنان اۋىتقىمايدى، ءپرينسيپى مەن پوزيسياسىنان تايمايدى"، – دەدى ول.
ال اركاديي دۋبنوۆ ۋاقىت وتە ماسكەۋ مەن باتىستىڭ اراسى ۋشىعا تۇسپەسە، بىتىسە قويۋى ەكىتالاي دەپ پايىمدايدى. اشۋعا بۋلىققان رەسەي جاپان تۇزدە جالعىز قالعاندى قالامايدى. قازاقستاندى قايتا قولقالاپ، باتىسقا قارسى سويلەۋگە يتەرمەلەيدى.
"قازاقستان باس تارتقان جاعدايدا وسىعان دەيىنگى اقپاراتتىق ارانداتۋعا قايتا كوشەدى. پۋتين مەن ونىڭ نوكەرلەرىنىڭ قازاقستانعا قاتىستى كۇنى كەشەگى مالىمدەمەسى اياقاستى پايدا بولعان جوق. مۇنىڭ ءبارى جوسپارلانعان دۇنيە. رەسەي قۇزعا قۇلاۋعا شاق تۇر. ءبىراز جالعىز قۇلاعاندا قالامايدى..."، – دەيدى دۋبنوۆ.
ازىرلەگەن، دۋمان بىقاي
