Reseilik SIBÝR qazaqstandyq munai-himiia jobasynyń quramyna endi, - dep habarlaidy Dalanews.kz.
Qazaqstannyń batysynda Kazakhstan Petrochemical Industries Inc (KPI) kompaniiasyna tiesili polipropilen óndirý zaýyty sátti iske qosyldy. Qazir bul jobanyń 40% aktsiiasy reseilik SIBÝR kompaniiasyna tiesili. Taraptar arasyndaǵy alǵashqy kelisimderge 2022 jyly qol qoiylǵanymen barlyq shartty talqylaýǵa kóp ýaqyt ketken.
Petrohimiia salasyndaǵy eń iri reseilik óndirýshi SIBÝR bul yntymaqtastyqty aimaqtaǵy yqpalyn keńeitýge múmkindik bolady dep sanaidy. Zaýyttyń josparly jyldyq qýaty - Teńiz ken ornynda óndiriletin propannan óndiriletin 500 myń tonna polipropilen.
KPI ielený shemasy mynandai: aktsiianyń 49,5 paiyzy qazaqstandyq «QazMunaiGazǵa» tiesili, al 40 paiyzy SIBÝRDA, 9,5 paiyzy «Samruq-Qazyna» qoryna tiesili bolsa, qalǵan 1 paiyzy «ALMEKS» qazaqstandyq jeke kompaniiaǵa tiesili.
Sarapshylar pikirinshe reseilik kompaniianyń otandyq jobaǵa enýi belgili kólemde qaýip-qater týǵyzady, naqtyraq aitqanda Qazaqstannyń teriskei kórshiniń aldyndaǵy táýeldiligin arttyryp, ekonomikanyń mańyzdy sektorlaryn reseilik investitsiiaǵa bailap qoiýy múmkin. Bul óz kezeginde Kremldiń aimaqtaǵy saiasi yqpalynyń eselep artýyna alyp keledi.
Sonymen birge SIBÝR sekildi iri oiynshynyń el ekonomikasyna qarjy quiýy óndiristik qýatty artyryp, Qazaqstannyń eksporttyq áleýetine oń áserin tigizýi múmkin.
Dei turǵanmen, Astananyń aldynda egemendikti saqtaý men ekonomikalyq tiimdilikti esepke alý deitin aýyr dilemma tur.
Bul balansty saqtaýda Bektenov úkimetiniń qandai sheshim qabyldaityny mańyzdy, qalai bolǵan kúnde ulttyq múddeni qorǵaý osynaý jobany damytýdaǵy basty basymdyqtyń biri bolmaq.
Eske salaiyq, buǵan deiin Qazaqstan Reseiden ústi-ústine qaryz alyp jatqanyn jazǵan bolatynbyz. Qazaqstan qaryzǵa belsheden batýda, sońǵy bes jylda eldiń syrtqy bereshegi 4 milliard dollarǵa artqan. Ulttyq banktiń dereginshe 2024 jyly eldiń syrtqy qaryzy 163 milliard dollardy quraǵan, bul osydan bes jyl burynǵy kórsetkishpen salystyrǵanda birneshe milliardqa kóp.
Qazaqstanǵa eń kóp nesie bergen el – Niderland: 42,6 milliard dollar. Degenmen, Qazaqstannyń Reseige aldyndaǵy bereshegi erekshe kózge túsedi. Sońǵy bes jylda Qazaqstannyń teriskei kórshisine qaryzy 47,1 paiyzǵa artyp, 13 milliard dollarǵa jetken. Bul Máskeýdiń Qazaqstan ekonomikasyndaǵy qarjylyq yqpaly men belsendiligin aitarlyqtai kúsheitip otyr.
Al Batys elderiniń tarapynan nesie berýshileriniń qaryzdary azaia bastaǵan. Ulybritaniia men AQSh Qazaqstanǵa qaryz berýdi aitarlyqtai azaitqan.
Osy ózgerister aiasynda Aziia Damý Banki men Dúniejúzilik densaýlyq saqtaý uiymy Qazaqstandaǵy jobalarǵa belsendi qatysyp júr. Jeltoqsan aiynda Aziia Damý Banki qarjylyq basqarýdy reformalaýǵa 350 million dollar bólse, al Dúniejúzilik banktiń kómegimen DDU pandemiiamen kúresý úshin 19 million dollar bólip, pandemiia qorynyń jobasyn qolǵa alǵan.
