Prezidenttiń aitýynsha, Qazaqstan halyqaralyq qoǵamdastyqtyń jaýapty múshesi retinde ashyq saýda, taýarlar men qyzmetterdiń erkin qozǵalysy qaǵidattaryn berik ustanady, – dep habarlaidy Dalanews.kz.
Sondai-aq, elimiz seriktesterimen ózara senimge, ashyq dialogqa negizdelgen qarym-qatynas qurady.
"Saýda-sattyq – damýdyń kózi. Jekelegen eldermen qatar, tutas aimaqtardyń ózi saýdanyń arqasynda órkendep, kórkeie tústi. Qazaqstan Shyǵys pen Batysty, Soltústik pen Ońtústikti jalǵaityn saýda joldarynyń toǵysynda tur. Bul – bizdiń geografiialyq ereksheligimiz ǵana emes, tarihi taǵdyrymyz deýge bolady. Demek biz elimizdiń mańdaiyna jazylǵan osy strategiialyq múmkindikti utymdy paidalanýymyz kerek. Sondyqtan Qazaqstan asa mańyzdy halyqaralyq kólik-logistika jobalaryn júzege asyrý isine belsendi túrde qatysa bermek. Bizdiń negizgi maqsatymyz bárine túsinikti dep oilaimyn. Biz taǵdyr qosqan kórshiles eldermen jemisti jáne jan-jaqty yntymaqtastyqty nyǵaita beremiz. Ult múddesin bárinen biik qoiyp, baiypty jáne baisaldy syrtqy saiasatty júrgizemiz", - dedi Prezident.
Memleket basshysy álemdik ahýal Qazaqstanǵa da áser etpei qoimaitynyn jetkizdi.
"Qazaqta "Kórshi aqysy – Táńir haqysy" degen sóz bar. Kórshi memleketterdiń bárimen tatý-tátti ómir súrip jatyrmyz. Biz qashanda bul máselege airyqsha mán beremiz. Kórshimizde órt shyqsa, onyń jalyny bizdi de sharpidy. Sondyqtan irgeles elderdiń bárinde tynyshtyq pen turaqtylyq bolǵanyn qalaimyz. Árine, munyń barlyǵy – ýaqytsha qiyndyqtar. Eń bastysy, bizdiń baǵdarymyz aiqyn, jolymyz ashyq. Alǵa qoiǵan maqsattarymyzdy mindetti túrde iske asyramyz. Úkimet pen ákimderdiń negizgi mindeti – qolǵa alǵan reformalar men jobalardy tiianaqty júzege asyrý. Sonda ǵana ulttyq ekonomikamyz da turaqty damý jolyna túspek, – dedi Prezident.
