Birneshe kún buryn qan qysymy tómendegen soń balasy jedel járdem shaqyrtqan eken. Sonymen bári bitti. «Naýqasynyń jaǵdaiyn ózimiz bilemiz, aýrýhanada jatpai-aq qoisyn» – degenimizge dárigerler kónbei qoidy.
Ánsheiinde «Bireýler aýrýhanaǵa jata almai júr eken nemese nashar, alyp ketińder depti» – degendi estitin edik. Joq jabysyp aiyrylmady. Aǵamyzdyń halin, diagnozyn kórip qýanyp ketken bolýy kerek: «Koronovirýsqa bir klient tabyldy» – dep. Qoldy-aiaqqa turǵyzbai, ana aýrýhanaǵa bir aparyp, myna aýrýhanaǵa bir aparyp, aqyry koronovirýs qylyp shyǵardy. Sodan baýyrymyzdy kórmedik. Bertinge deiin shamalap tamaq iship, kirip-shyǵyp júrgen, kóńil-kúii de jaman emes edi, «Eki aptasy ótse, shyǵarady ǵoi» – dep úmittenip júrgemiz, keshe tańda baqilyq bolǵanyn esittik.
Máiit berilmeidi, saǵat segiz jarymda Qalqamannyń máiithanasynan poligonǵa alyp ketedi, neshe metr jerde turyp qoshtasýǵa eki adamǵa ǵana ruhsat degendi estip, jan ushyryp molda taýyp, Qalqamanǵa jettik. Sol jerde janazasy shyǵaryldy. Jáshikke salyp, jáshiktiń betin shegelep tastaǵan eken, júzin de kóre almadyq. Máiitti arnaiy mashinaǵa saldy, bizge bir mashinamen arttarynan júrip otyryp barýǵa ruhsat etti. Qabirdi qazyp daiyndap qoiǵan eken. Aqym joq, shamamen 1,5 metr tereńdikte qazylypty.
Tabyt qabirge túsirilgen soń ústine eki meshok hlor tókti.
Bul ne? Adam qaityp ketti, ony dezinfektsiialadyń, mataǵa oradyń, syrtynan tselofanǵa oradyń, ony jáshikke salyp shegelediń. Qabirge jáshigimen saldyń, endi onyń ústine eki meshok hlor tógip ne kerek? Osyndai sheshim shyǵaryp otyrǵandardyń betterine de eki meshok hlor tógilýin tileimin! Osy sheshimdi shyǵarýǵa din ókilderi de qatysty, osydan keiin olarǵa qandai qurmet?
Joldyń sol jaǵyna musylmandar, oń jaǵyna hristiandar jerlenetin etip sheshipti. Biz baýyrymyzdy jer qoinaýyna tapsyryp jatqanda oń jaqta 74 jastaǵy bir qariiany jerlep jatty. Osy koronovirýs bolmaǵanda da ol qariianyń erteli-kesh dúnieden ótetini haq edi. Osy koronovirýs bolmasa da diagnozy asa jaqsy emes bizdiń baýyrymyzdyń da erteli-kesh dúnieden ótetini haq edi.
Osyndai jaǵdaidyń bárin bilik arsyzdyqpen paidalanyp, koronovirýstan qaitqandardyń sanyn jasandy túrde kóbeitip otyr. 74 jastaǵy qariia hristiandardan 8-adam bolyp, meniń baýyrym musylmandar jaǵyndaǵy 4-adam bolyp jerlendi. Qaitys bolǵan adammen qoshtasý, ony arýlap jerleý adamzat balasyna tán mádeniettiń, qundylyqtyń biri. Osyny qazirgi bilik aiaq asty etip otyr.
Qaitys bolǵan adamǵa, ulttyń salt-dástúrine degen bir tamshy da syi-qurmetteri joq, is-áreketteriniń barlyǵy ótirikke, kózboiaýshylyqqa qurylǵan osy biliktiń tarih sahnasynan tezirek ketýin tileimin. Osy farsty qoldap, onyń qatysýshysy bolyp otyrǵandardyń da qudai bar bolsa, jazasyn beretin shyǵar.
Birimiz úshin áke, birimiz úshin baýyr bolǵan adam qazirgi ókimet úshin statistikalyq kórsetkish, bir san, nómir ǵana boldy.
Bul – durys oilaý qabiletinen aiyrylǵan bilik. Saýatsyz, ári adamgershiliksiz adamdar tobyna úlken memlekettik mashinany berip qoiyp otyrmyz. Ózderiniń qolyndaǵy memlekettik mashinany bizdiń quqymyzdy taptaý úshin, bizdiń ar-namysymyzdy qorlaý úshin qatigezdikpen qoldanyp otyr. Biliktiń osyndai biliksiz áreketterinen birte-birte bárimiz oppozitsiiaǵa ainalatyn shyǵarmyz. Koronovirýs tappai qaqtyǵyp otyrǵandar…
Jazba Liazat Dýisembekovanyń Facebook paraqshasynan alyndy
