Jergilikti bılik mobıldi operatorlardy qosamyz degenimen atyraýlyqtar bul qyzmettiń oqýshylar úshin tym qymbat ekenin aıtady, dep habarlaıdy Dalanews.kz aqparat agenttigi 31 arnanyń "Informbúro" baǵdarlamasyna silteme jasap.
Mektep jasyndaǵy balalary bar Atyraý qalasynyń Samal yqsham aýdanynyń turǵyndary men muǵalimder ótken oqý jylynyń sońǵy toqsanynda onlaın oqımyz dep qatty qınalǵandaryn aıtady. Óıtkeni bul aýdanǵa ınternet júıesi tartylmaǵan. Al ózge operatorlardyń qyzmetine aptasyna on myń teńge tóledik deıdi olar.
"Sońǵy toqsandy úıtip-búıtip, Whatsapp-pen bitirdik. Endi bıyl Zoom baǵdarlamasymen bolady depti. Bul qosymshaǵa qosylý úshin ınternettinde aqaý bolmaýy kerek. Al biz qosylyp júrgen ınternet Zoom-dy kótermeıdi. Ustaz oqýshyny, bala ustazdy estimegen sabaq mándi bolady ma?" - deıdi ata-ana Álıa Baısalıhova.
"Sáýir-mamyr aılarynda Zoom baǵdardarlamasymen sabaq ótiledi dep málimdegen bolatyn. Alaıda bizderge de, ata-analar men oqýshylarǵa bul qosymshamen oqýǵa múmkindik bolmady. Úı tapsyrmasyn Whatsapp-pen jiberip júrdik", - deıdi muǵalim Nurgúl Makarova.
Atyraý oblysy boıynsha Batys óńirlik telekomýnıkasıasy jergilikti jeli torabynyń dırektory turǵyndardyń bul talabyna qarajat joq dep qysqa qaıyrdy.
"Birinshiden, qarajat máselesi. Qarjy tek kelesi jylǵa qarastyrylǵan. Jobalaý esebi boıynsha 180 mıllıon teńge qajet", - dedi Batys óńirlik telekomýnıkasıasy jergilikti jeli torabynyń dırektory Nurlan Makýlov.
Jelige jaýaptylardyń aıtýynsha, sońǵy úsh jylda Atyraý qalasy halqyn sıfrlandyrýǵa bir tıyn da bólinbegen. Sonyń saldarynan aýdandardy qospaǵanda qala ishindegi 18 yqsham aýdan ınternetsiz otyr. Al oblystyq ákimdik ókilderi aımaqtarǵa mobıldi ınternet operatorlaryn qosýdy qarastyryp jatyrmyz deıdi.
https://www.youtube.com/watch?v=g3y7q-qMipY
