Qazaqstannyń Eńbek mınıstrligi men Koreıanyń Ádilet mınıstrligi erikti túrde qonys aýdarý baǵdarlamasynyń merzimderin keńeıtý jóninde kelisimge keldi, dep habarlaıdy Dalanews.kz.

Vedomstvo málimetinshe, Koreıa Respýblıkasynyń Ádilet mınıstrligimen zańsyz kóshi-qondy azaıtý jáne azamattarymyzdyń quqyǵyn qorǵaý máseleleri boıynsha júrgizilgen kelissózder barysynda Koreıada zańsyz jumys istegen Qazaqstan azamattaryna aıyppulsyz jáne qaıta kirýge tyıym salmaı, elden erikti túrde shyǵýǵa múmkindik beretin erikti qonys aýdarý baǵdarlamasynyń merzimin uzartýǵa ýaǵdalasqan.

"Otandastarymyz bul múmkindikti 2025 jylǵy jeltoqsannan 2026 jylǵy aqpanǵa deıin paıdalana alady. Baǵdarlama qylmys jasaǵan, májbúrlep shyǵarý qajet, sondaı-aq, 2025 jylǵy 1 jeltoqsannan keıin zańsyz mártebege túsken sheteldikterge qoldanylmaıdy", - dep jazylǵan mınıstrlik habarlamasynda.

Baǵdarlamaǵa qatysý úshin tólqujat, erikti qonys aýdarý týraly ótinish jáne áýe bıleti qajet.