قازاقستاننىڭ ەڭبەك مينيسترلىگى مەن كورەيانىڭ ادىلەت مينيسترلىگى ەرىكتى تۇردە قونىس اۋدارۋ باعدارلاماسىنىڭ مەرزىمدەرىن كەڭەيتۋ جونىندە كەلىسىمگە كەلدى، دەپ حابارلايدى Dalanews.kz.
ۆەدومستۆو مالىمەتىنشە، كورەيا رەسپۋبليكاسىنىڭ ادىلەت مينيسترلىگىمەن زاڭسىز كوشى-قوندى ازايتۋ جانە ازاماتتارىمىزدىڭ قۇقىعىن قورعاۋ ماسەلەلەرى بويىنشا جۇرگىزىلگەن كەلىسسوزدەر بارىسىندا كورەيادا زاڭسىز جۇمىس ىستەگەن قازاقستان ازاماتتارىنا ايىپپۇلسىز جانە قايتا كىرۋگە تىيىم سالماي، ەلدەن ەرىكتى تۇردە شىعۋعا مۇمكىندىك بەرەتىن ەرىكتى قونىس اۋدارۋ باعدارلاماسىنىڭ مەرزىمىن ۇزارتۋعا ۋاعدالاسقان.
"وتانداستارىمىز بۇل مۇمكىندىكتى 2025 جىلعى جەلتوقساننان 2026 جىلعى اقپانعا دەيىن پايدالانا الادى. باعدارلاما قىلمىس جاساعان، ماجبۇرلەپ شىعارۋ قاجەت، سونداي-اق، 2025 جىلعى 1 جەلتوقساننان كەيىن زاڭسىز مارتەبەگە تۇسكەن شەتەلدىكتەرگە قولدانىلمايدى"، - دەپ جازىلعان مينيسترلىك حابارلاماسىندا.
باعدارلاماعا قاتىسۋ ءۇشىن ءتولقۇجات، ەرىكتى قونىس اۋدارۋ تۋرالى ءوتىنىش جانە اۋە بيلەتى قاجەت.
