Medet Serik – Qytaidaǵy jetekshi kompaniialardyń biriniń IT-konsýltanty, Forbes Kazakhstan basylymynyń 2022 jylǵy "30-dan 30-ǵa deiin" reitingisine engen. Týǵan jeri - Jezqazǵan, biraq sońǵy 11 jyl ishinde ol Qytaida, atap aitqanda Shenchjen qalasynda turady, "Qytai Silikon alqabynda" jumys isteidi, dep jazady Dalanews.kz.
Fortune 500 tizimine enetin kompaniialar basshylarymen strategiialardy ázirleýge, qarym-qatynas ornatýǵa jáne basqarýǵa jaýapty Medet Serik týraly Forbes.kz basylymy keń aýqymdy metarial ázirlepti. Basylymnyń jazýynsha, Medettiń basty mindeti - iri álemdik korporatsiialar úshin tsifrlyq transformatsiialaý máselesinde sheshimder izdeý jáne osy kompaniialardyń birinshi tulǵalaryna belgili bir joǵary tehnologiialyq sheshimderdiń artyqshylyqtaryn jetkizý.
Medet qazir jumys istep jatqan kompaniiasynyń atyn atamaýdy surady. Óitkeni bul onyń 2024 jyly qatysqan Qytaidaǵy Heart Signal ("Júrek qalaýy") televiziialyq jobasynyń sharttaryn buzý bolyp sanalady. Ol jumys isteitin kompaniia álemdik alyptardyń biri ekenin ǵana aitsaq ta jetip jatar. Heart Signal realiti-shoýy efirge shyqqaly jeti jyldyń júzi bolypty. Onda bir ai ishinde alty jigit pen alty qyz bir úide turyp, osy ýaqyt ishinde óz jubyn tabýy kerek.
Hatty alaiaqtar jiberdi dep oiladym
Joba - qytai tilinde, al jaqynda onyń siýjetteri áleýmettik jelide orys tildi segmentte sýbtitrlermen berile bastady. Osyǵan bailanysty Heart Signal tek aspan asty elinde ǵana emes, kóptegen elderde, sonyń ishinde Qazaqstanda da tanymal. Al 2024 jyly qazaq jankúierlerine tosyn syi jasaldy, óitkeni baǵdarlamanyń keiipkerleriniń biri bizdiń otandasymyz boldy. Onda da Medet jobaǵa qatysýshy alǵashqy shetel azamaty eken.
Medet, árine, Heart Signal týraly bilgen. Óitkeni ol Qytaidaǵy eń tanymal realiti-shoýlardyń biri! Ol bul baǵdarlamanyń fanaty emes, biraq shoý, kóbinese turmystyq dialogqa negizdelgendikten, keide qytai tilin damytý úshin kóretin bolǵan.
— Qytaida 10 jyl ómir súrgennen keiin bir kúni jelide paraqsha ashý týraly sheshimge keldim. Sóitip Instagram sekildi jergilikti aýmaqtaǵy Little Red Book degen jeliden paraqsha ashtym. Onda Qytaidyń 200 millionnan astam qoldanýshy tirkelgen. Birneshe selfiimdi jariialap, eki jazba jazdym. Árine, birden tanymal bolmadym, biraq qandai da bir áreketter boldy: laiyq basyp, pikirler qaldyryldy. Bir kúni Heart Signal uiymdastyrýshylarynan habarlama aldym. Shoýǵa qatysýymdy surapty, - deidi Medet.
Habarlamany jiberýshi Medetti máseleni egjei-tegjei talqylaý úshin kezdesýge shaqyrady. Biraq bizdiń keiipkerimiz bul hatty elemeidi, ony alaiaqtar jazǵan bolýy kerek dep oilaidy. Alaida birneshe aptadan keiin taǵy hat keledi.
— Bul kezdeisoqtyq emes dep oiladym. Sodan hatqa jaýap berip, kezdesýge bardym, aldymnan túsirilim toby shyqqanda ǵana munyń barlyǵy shynaiy ekenin túsindim. Maǵan suqbat videoǵa túsiriletinin birden eskertti. "Eger men irikteý týrynan ótsem, ol baǵdarlama shyǵarylymyna qosylady", - dedi maǵan. Prodiýsermen kelissózder shamamen eki saǵatqa sozyldy, ártúrli suraqtar qoiyldy: ómirbaianym, kásibim týraly standartty saýaldardan bastap, mahabbat pen armandar týraly jeke bas máselelerine deiin. Sol kezdesýden keiin taǵy birneshe suhbat boldy, aqyry maǵan" kastingten óttińiz, jobanyń on eki qatysýshysynyń biri boldyńyz" dedi. Men finaldan bir-aq shyǵamyn dep oilaǵan joqpyn. Basqa túsken soń men bul jobanyń máni nede ekenin egjei-tegjeili zerttei bastadym. Sóitip shoýdyń búkil tarihyndaǵy alǵashqy sheteldik ekenimdi túsindim", - deidi Medet.
Ol bara salyp, prodiýserlerdi suraqtyń astyna alypty: "Nege meni tańdadyńyzdar, qytai tilin de jetik bilmeimin, túrim de ózim de basqalardan ózgeshemin degen siiaqty" dep.
— Men olarǵa birden aittym, qytaisham onsha emes, tildik deńgeii menen áldeqaida joǵary basqa sheteldikterdi bilemin dedim. Onyń ústine talshybyqtai jas emespin, jasym 31-de ekenin de eskerttim. Óitkeni bul jobaǵa qatysýshylar ádette, 25 jasqa deiingiler, - deidi ol.
Biz de Medetti mazalaǵan osy suraqtardy Heart Signal shoýyn ázirleýshi Tencent video kompaniiasynyń prodiýseri Chao Gyǵa qoiyp kórdik.
- Áleýmettik jelidegi Mi Dieniń (baǵdarlamada Medetti osylai atady) paraqshasyna kezdeisoq tap bolýda bizdiń jolymyz boldy. Biz onymen kóptegen áńgime-dúken quryp, onyń óte qyzyqty jáne erekshe jan ekenin túsindik. Onyń mahabbat pen qarym-qatynasqa degen kózqarasy qarapaiym ári kórkem edi. Ol "Kishkentai hanzadadan" úzindi keltirdi: "Biz qolǵa úiretetinimizge jaýaptymyz" dep. Al túri men til aiyrmashylyǵy bul arada mańyzdy emes, - dedi Chao Gy.
Chao Gynyń aitýynsha, shoýǵa qatysýshylardy tańdaý kezinde 30 rejisserden turatyn top jumys istegen, olar alty aidan astam ýaqyt boiy áleýmettik jelilerde de, naqty ómirde de áleýetti kandidattardy tyńǵylyqty zerttegen. Prodiýser atap ótkendei," bul ońai sharýa emes edi", óitkeni olar buryn BAQ-qa shyqpaǵan, tanymal emes adamdardy izdegen. Áleýetti úmitkerdi tańdaǵannan keiin oǵan qatysty 10 raýndtan turatyn suhbattar júrgiziledi. Bul jumysqa Chao Gy aitqandai, komandanyń 70% ýaqyty men kúshi ketedi.
— Bul realiti-shoý bolǵandyqtan, kórermender "qýyrshaqtar"emes, shynaiy emotsiiadaǵy adamdardy kórýi úshin qatysýshylar óz sezimderi men oilaryn bildirýde qabiletti bolýy mańyzdy. Shoý barysynda bizdiń komanda qatysýshylardyń ózara árekettesýine kedergi keltirmeý úshin únemi tysqary qalýǵa tyrysady. Shoýdy kórgender Mi Dieniń óte qarapaiym jáne uialshaq ekenin bildi, biraq ol birdeńe aita bastasa, adamdar ony muqiiat tyńdaýǵa májbúr. Óitkeni onyń oilary erek. Bul sapa biz úshin óte mańyzdy boldy", — dep sózin qorytyndylaidy Chao Gy.
"Men seni jaqsy kórip turmyn"
"Jaraidy, uiymdastyrýshylar sizdi unatqan eken, al siz bul "shytyrmanǵa" nege kelistińiz" dep suraǵan men Medetten "tanymaldylyq úshin kerek boldy nemese tájiribe jinaǵym keldi" degen sekildi jaýap kútken edim. Alaida bul rette men múlde basqa jaýap aldym.
- Mende úmit boldy. Úilenetin ýaqyt keldi. Muny maǵan osylai eske salyp jatqannan emes. Ózim solai oiladym. Kóp kitap oqydym, basqa elde mansap qurdym, ózge eldiń tilderin úirendim, osylaisha jeke basqa ýaqytym bolmady. Iá, qazirdiń ózinde tyǵyz jumys kestesine bailanysty buǵan ýaqyt tabý qiyn. Sondyqtan bul jobadan úmit kútkenim ras. Keide shoý qatysýshylary túsirilim aiaqtalǵannan keiin otbasy quryp jatatyn kezderi bolady. Meni kezdeisoq taýyp alǵan ǵoi, sodan: "Múmkin bul maǵan buiyrǵan taǵdyr syiy shyǵar" dep oiladym. Qalai bolǵanda da, eshteńe joǵaltpaitynymdy bildim", — dep moiyndaidy Medet.
Tipti, bul jobany jumys kestesimen sáikestendirip otyrýǵa týra kelgen.
"Túsirilim bir aiǵa sozyldy, negizinen keshke jáne demalys kúnderi boldy, óitkeni barlyq qatysýshylar kúndiz óz isterimen ainalysyp, sodan keiin túsirilim alańyna keletin. Sonymen qatar, joba keiipkerleriniń bir-birin durys baǵalaýy úshin jeke qasietterinen basqa, mysaly kompaniiamyz týraly aitýǵa tyiym salyndy. Eger syzyq syzatyn bolsaq, onda barlyq qatysýshy shartty túrde nólden bastady, al men bolsam, minýs birden kiristim. Óitkeni sheteldik bolsam da qytai mádenietin túsinetinimdi ol arada dáleldeýim kerek edi. Iaǵni Qytai azamattary bir-birine túsindirip jatýdyń qajeti joq nárselerdi meniń aityp otyrýyma týra keldi. Onyń ústine biz bárimiz ártúrli saladan boldyq, sondyqtan bastapqyda bizdi bailanystartyn ortaq nárseler az boldy. Bylaisha aitqanda, ol adamdarmen qarapaiym ómirde múlde jolyǵyp, aralas-quralas bolmas edim", — deidi Medet.
Árbir jańa túsirilimge kirisken saiyn olarǵa sóilesý ońaiyraq boldy, al basqa qatysýshylar Medetti ózderi "zerttei" bastady, óitkeni olar Qazaqstan týraly da, onyń eliniń mádenieti týraly da eshteńe bilmedi.
- Kezdesýlerdiń birinde qyzdardyń biri menen Qazaqstan mádenietiniń erekshelikteri týraly aitýymdy ótindi. Sodan keiin men bizdiń tilimizde "men seni súiemin" degen tikelei sóz tirkesi joq ekenin aittym, bizde mahabbat degen sóz tirkesi bar, biraq sózbe-sóz aýdarǵanda "men seni jaqsy kóremin" degen kórý qabiletine qatysty maǵynany bildiretindei aýdarylady dedim. Bul sózim efirge shyqqanda Qytaida úlken rezonans týdyrdy. Barlyq áleýmettik jelide osy sóz úzindisi qaptap ketti. Jurt endi "seni jaqsy kóremin" degenniń ornyna "men seni jaqsy kórip turmyn" dep jaza bastady, osy frazada heshtegter paida boldy. Tipti, bireý maǵan video joldap jiberipti, onda sahnada qytaidyń bir ánshisi: "men búgin bárińdi jaqsy kórip turmyn" dep aitady. Bir sózben aitqanda, bul osy jobany aiqyndaýshy uran sózderdiń birine ainaldy, - deidi Medet.
Taǵy bir kezdesýde Medet Almaty, atap aitqanda, biik taý basynda qonaq úileri men shańǵy kýrorty bar Shymbulaq týraly aitady. Siýjet shyqqannan keiin birneshe ai ótken soń, sol jobany tamashalaýshylardyń Qytaidan Almatyǵa arnaiy sol jerdi kórýge barǵany belgili boldy.
- Kúzde Qazaqstanǵa keldim, bizdiń elimizde de Heart Signal jobasy tanymal bola bastaǵanyn túsindim. Óitkeni meni kóshede tanyp jatty, dep kúledi Medet. — Biraq men osy jobanyń arqasynda úlken aýditoriiaǵa Qazaqstandy nasihattaǵanymdy maqtan tutamyn, — dep sózin qorytyndylaidy ol.
Árine, Medet tańdaǵan qyzben jobadan keiingi qarym-qatynasy qalai bolǵanyn suradym. Biraq ol bul rette lám-mim dep jaq ashpady. Sóitse bul joba áli jalǵasyn taýyp jatyr eken, sondyqtan "bar kartany ashýǵa" áli erte kórinedi.
