Kókshetaýda turǵyn úi aýmaǵyndaǵy avtoturaqqa kirip kele jatqan kólik áieldi qaǵyp ketip, oqiǵa saldarynan ol kóz jumdy. Qaiǵyly jaǵdaidyń videosy áleýmettik jelide tarady, dep habarlaidy dalanews.kz.
Marqumnyń týystarynyń aitýynsha, otbasy sol kúni qyz uzatý toiyna bailanysty Kókshetaý qalasyna jinalǵan. Áýlet úlken qýanyshtyń qamymen júrgen.
Qaza tapqan áieldiń artynda 12 jastaǵy balasy qalǵan.
Beinebaqylaý kamerasyna túsken kadrlarda avtoturaqqa kirip kele jatqan kóliktiń jolda ketip bara jatqan áieldi qaǵyp, ústinen basyp ótkeni kórinedi. Oqiǵadan keiin kólikten shyqqan adamdar abdyrap, kýágerler jedel járdem shaqyrǵan.
Aqmola oblysy politsiia departamenti atalǵan derek boiynsha qylmystyq is qozǵalǵanyn habarlady.
– Tergeý aiasynda oqiǵanyń barlyq mán-jaiyn anyqtaýǵa baǵyttalǵan qajetti tergeý amaldary júrgizilip jatyr, – dep málimdedi vedomstvo.
Oqiǵadan keiin aýla turǵyndary qaýipsizdik máselesin kóterdi. Olardyń aitýynsha, úsh turǵyn úige aparatyn bir ǵana kireberis jol bar, al aýlada balalar jii oinaidy.
Turǵyndar birneshe ret jasandy jol kedergilerin ornatýdy jáne ekinshi kireberis ashýdy suraǵandaryn, alaida ótinishteri eskerýsiz qalǵanyn aitady.
– Biz qaýipti jaǵdaida ómir súrip jatyrmyz. Barlyq kólik bir ǵana jolmen ótedi. Aýla janynda oiyn alańy bar. Buǵan deiin de jol apattary bolǵan, biraq adam ólimi tirkelmegen edi. Endi bir bala anasynan aiyrylyp otyr, – deidi turǵyndar.
