مەدەت سەرىك – قىتايداعى جەتەكشى كومپانيالاردىڭ ءبىرىنىڭ IT-كونسۋلتانتى، Forbes Kazakhstan باسىلىمىنىڭ 2022 جىلعى "30-دان 30-عا دەيىن" رەيتينگىسىنە ەنگەن. تۋعان جەرى - جەزقازعان، ءبىراق سوڭعى 11 جىل ىشىندە ول قىتايدا، اتاپ ايتقاندا شەنچجەن قالاسىندا تۇرادى، "جۇڭگو سيليكون القابىندا" جۇمىس ىستەيدى، دەپ جازادى Dalanews.kz.

Fortune 500 تىزىمىنە ەنەتىن كومپانيالار باسشىلارىمەن ستراتەگيالاردى ازىرلەۋگە، قارىم-قاتىناس ورناتۋعا جانە باسقارۋعا جاۋاپتى مەدەت سەرىك تۋرالى Forbes.kz باسىلىمى كەڭ اۋقىمدى مەتاريال ازىرلەپتى. باسىلىمنىڭ جازۋىنشا، مەدەتتىڭ باستى مىندەتى - ءىرى الەمدىك كورپوراسيالار ءۇشىن سيفرلىق ترانسفورماسيالاۋ ماسەلەسىندە شەشىمدەر ىزدەۋ جانە وسى كومپانيالاردىڭ ءبىرىنشى تۇلعالارىنا بەلگىلى ءبىر جوعارى تەحنولوگيالىق شەشىمدەردىڭ ارتىقشىلىقتارىن جەتكىزۋ.

مەدەت ءقازىر جۇمىس ىستەپ جاتقان كومپانياسىنىڭ اتىن اتاماۋدى سۇرادى. ويتكەنى بۇل ونىڭ 2024 جىلى قاتىسقان قىتايداعى Heart Signal ("جۇرەك قالاۋى") تەليەۆيزيالىق جوباسىنىڭ شارتتارىن بۇزۋ بولىپ سانالادى. ول جۇمىس ىستەيتىن كومپانيا الەمدىك الىپتاردىڭ ءبىرى ەكەنىن عانا ايتساق تا جەتىپ جاتار. Heart Signal رەاليتي-شوۋى ەفيرگە شىققالى جەتى جىلدىڭ ءجۇزى بولىپتى. وندا ءبىر اي ىشىندە التى جىگىت پەن التى قىز ءبىر ۇيدە تۇرىپ، وسى ۋاقىت ىشىندە ءوز جۇبىن تابۋى كەرەك.

حاتتى الاياقتار جىبەردى دەپ ويلادىم

جوبا - جۇڭگو تىلىندە، ال جاقىندا ونىڭ سيۋجەتتەرى الەۋمەتتىك جەلىدە ورىس ءتىلدى سەگمەنتتە سۋبتيترلەرمەن بەرىلە باستادى. وسىعان بايلانىستى Heart Signal تەك اسپان استى ەلىندە عانا ەمەس، كوپتەگەن ەلدەردە، سونىڭ ىشىندە قازاقستاندا دا تانىمال. ال 2024 جىلى قازاق جانكۇيەرلەرىنە توسىن سىي جاسالدى، ويتكەنى باعدارلامانىڭ كەيىپكەرلەرىنىڭ ءبىرى ءبىزدىڭ وتانداسىمىز بولدى. وندا دا مەدەت جوباعا قاتىسۋشى العاشقى شەتەل ازاماتى ەكەن.

مەدەت، ارينە، Heart Signal تۋرالى بىلگەن. ويتكەنى ول قىتايداعى ەڭ تانىمال رەاليتي-شوۋلاردىڭ ءبىرى! ول بۇل باعدارلامانىڭ فاناتى ەمەس، ءبىراق شوۋ، كوبىنەسە تۇرمىستىق ديالوگقا نەگىزدەلگەندىكتەن، كەيدە جۇڭگو ءتىلىن دامىتۋ ءۇشىن كورەتىن بولعان.

— قىتايدا 10 جىل ءومىر سۇرگەننەن كەيىن ءبىر كۇنى جەلىدە پاراقشا اشۋ تۋرالى شەشىمگە كەلدىم.  ءسويتىپ Instagram سەكىلدى جەرگىلىكتى اۋماقتاعى Little Red Book دەگەن جەلىدەن پاراقشا اشتىم. وندا قىتايدىڭ 200 ميلليوننان استام قولدانۋشى تىركەلگەن. بىرنەشە سەلفيىمدى جاريالاپ، ەكى جازبا جازدىم. ارينە، بىردەن تانىمال بولمادىم، ءبىراق قانداي دا ءبىر ارەكەتتەر بولدى: لايىق باسىپ، پىكىرلەر قالدىرىلدى. ءبىر كۇنى Heart Signal ۇيىمداستىرۋشىلارىنان حابارلاما الدىم. شوۋعا قاتىسۋىمدى سۇراپتى، - دەيدى مەدەت.

حابارلامانى جىبەرۋشى مەدەتتى ماسەلەنى ەگجەي-تەگجەي تالقىلاۋ ءۇشىن كەزدەسۋگە شاقىرادى. ءبىراق ءبىزدىڭ كەيىپكەرىمىز بۇل حاتتى ەلەمەيدى، ونى الاياقتار جازعان بولۋى كەرەك دەپ ويلايدى. الايدا بىرنەشە اپتادان كەيىن تاعى حات كەلەدى.

— بۇل كەزدەيسوقتىق ەمەس دەپ ويلادىم. سودان حاتقا جاۋاپ بەرىپ، كەزدەسۋگە باردىم، الدىمنان ءتۇسىرىلىم توبى شىققاندا عانا مۇنىڭ بارلىعى شىنايى ەكەنىن ءتۇسىندىم. ماعان سۇقبات ۆيدەوعا تۇسىرىلەتىنىن بىردەن ەسكەرتتى. "ەگەر مەن ىرىكتەۋ تۋرىنان وتسەم، ول باعدارلاما شىعارىلىمىنا قوسىلادى"، - دەدى ماعان. پروديۋسەرمەن كەلىسسوزدەر شامامەن ەكى ساعاتقا سوزىلدى، ءارتۇرلى سۇراقتار قويىلدى: ءومىربايانىم، كاسىبىم تۋرالى ستاندارتتى ساۋالداردان باستاپ، ماحاببات پەن ارماندار تۋرالى جەكە باس ماسەلەلەرىنە دەيىن. سول كەزدەسۋدەن كەيىن تاعى بىرنەشە سۇحبات بولدى، اقىرى ماعان" كاستينگتەن ءوتتىڭىز، جوبانىڭ ون ەكى قاتىسۋشىسىنىڭ ءبىرى بولدىڭىز" دەدى. مەن فينالدان ءبىر-اق شىعامىن دەپ ويلاعان جوقپىن. باسقا تۇسكەن سوڭ مەن بۇل جوبانىڭ ءمانى نەدە ەكەنىن ەگجەي-تەگجەيلى زەرتتەي باستادىم. ءسويتىپ شوۋدىڭ بۇكىل تاريحىنداعى العاشقى شەتەلدىك ەكەنىمدى ءتۇسىندىم"، - دەيدى مەدەت.

ول بارا سالىپ، پروديۋسەرلەردى سۇراقتىڭ استىنا الىپتى: "نەگە مەنى تاڭدادىڭىزدار، جۇڭگو ءتىلىن دە جەتىك بىلمەيمىن، ءتۇرىم دە ءوزىم دە باسقالاردان وزگەشەمىن دەگەن سياقتى" دەپ.

 — مەن ولارعا بىردەن ايتتىم، قىتايشام ونشا ەمەس، تىلدىك دەڭگەيى مەنەن الدەقايدا جوعارى باسقا شەتەلدىكتەردى بىلەمىن دەدىم. ونىڭ ۇستىنە تالشىبىقتاي جاس ەمەسپىن، جاسىم 31-دە ەكەنىن دە ەسكەرتتىم. ويتكەنى بۇل جوباعا قاتىسۋشىلار ادەتتە، 25 جاسقا دەيىنگىلەر، - دەيدى ول.

 ءبىز دە مەدەتتى مازالاعان وسى سۇراقتاردى Heart Signal شوۋىن ازىرلەۋشى Tencent video كومپانياسىنىڭ پروديۋسەرى چاو گىعا قويىپ كوردىك.

- الەۋمەتتىك جەلىدەگى مي ديەنىڭ (باعدارلامادا مەدەتتى وسىلاي اتادى) پاراقشاسىنا كەزدەيسوق تاپ بولۋدا ءبىزدىڭ جولىمىز بولدى. ءبىز ونىمەن كوپتەگەن اڭگىمە-دۇكەن قۇرىپ، ونىڭ وتە قىزىقتى جانە ەرەكشە جان ەكەنىن تۇسىندىك. ونىڭ ماحاببات پەن قارىم-قاتىناسقا دەگەن كوزقاراسى قاراپايىم ءارى كوركەم ەدى. ول "كىشكەنتاي حانزادادان" ءۇزىندى كەلتىردى: "ءبىز قولعا ۇيرەتەتىنىمىزگە جاۋاپتىمىز" دەپ. ال ءتۇرى مەن ءتىل ايىرماشىلىعى بۇل ارادا ماڭىزدى ەمەس، - دەدى چاو گى.

چاو گىنىڭ ايتۋىنشا، شوۋعا قاتىسۋشىلاردى تاڭداۋ كەزىندە 30 رەجيسسەردەن تۇراتىن توپ جۇمىس ىستەگەن، ولار التى ايدان استام ۋاقىت بويى الەۋمەتتىك جەلىلەردە دە، ناقتى ومىردە دە الەۋەتتى كانديداتتاردى تىڭعىلىقتى زەرتتەگەن. پروديۋسەر اتاپ وتكەندەي،" بۇل وڭاي شارۋا ەمەس ەدى"، ويتكەنى ولار بۇرىن باق-قا شىقپاعان، تانىمال ەمەس ادامداردى ىزدەگەن. الەۋەتتى ۇمىتكەردى تاڭداعاننان كەيىن وعان قاتىستى 10 راۋندتان تۇراتىن سۇحباتتار جۇرگىزىلەدى. بۇل جۇمىسقا چاو گى ايتقانداي، كوماندانىڭ 70% ۋاقىتى مەن كۇشى كەتەدى.

— بۇل رەاليتي-شوۋ بولعاندىقتان، كورەرمەندەر "قۋىرشاقتار"ەمەس، شىنايى ەموسياداعى ادامداردى كورۋى ءۇشىن قاتىسۋشىلار ءوز سەزىمدەرى مەن ويلارىن بىلدىرۋدە قابىلەتتى بولۋى ماڭىزدى. شوۋ بارىسىندا ءبىزدىڭ كوماندا قاتىسۋشىلاردىڭ ءوزارا ارەكەتتەسۋىنە كەدەرگى كەلتىرمەۋ ءۇشىن ۇنەمى تىسقارى قالۋعا تىرىسادى. شوۋدى كورگەندەر مي ديەنىڭ وتە قاراپايىم جانە ۇيالشاق ەكەنىن ءبىلدى، ءبىراق ول بىردەڭە ايتا باستاسا، ادامدار ونى مۇقيات تىڭداۋعا ءماجبۇر. ويتكەنى ونىڭ ويلارى ەرەك. بۇل ساپا ءبىز ءۇشىن وتە ماڭىزدى بولدى"، — دەپ ءسوزىن قورىتىندىلايدى چاو گى.

"مەن سەنى جاقسى كورىپ تۇرمىن"

"جارايدى، ۇيىمداستىرۋشىلار ءسىزدى ۇناتقان ەكەن، ال ءسىز بۇل "شىتىرمانعا" نەگە كەلىستىڭىز" دەپ سۇراعان مەن مەدەتتەن "تانىمالدىلىق ءۇشىن كەرەك بولدى نەمەسە تاجىريبە جيناعىم كەلدى" دەگەن سەكىلدى جاۋاپ كۇتكەن ەدىم. الايدا بۇل رەتتە مەن مۇلدە باسقا جاۋاپ الدىم.

- مەندە ءۇمىت بولدى. ۇيلەنەتىن ۋاقىت كەلدى. مۇنى ماعان وسىلاي ەسكە سالىپ جاتقاننان ەمەس. ءوزىم سولاي ويلادىم. كوپ كىتاپ وقىدىم، باسقا ەلدە مانساپ قۇردىم، وزگە ەلدىڭ تىلدەرىن ۇيرەندىم، وسىلايشا جەكە باسقا ۋاقىتىم بولمادى. ءيا، ءقازىردىڭ وزىندە تىعىز جۇمىس كەستەسىنە بايلانىستى بۇعان ۋاقىت تابۋ قيىن. سوندىقتان بۇل جوبادان ءۇمىت كۇتكەنىم راس. كەيدە شوۋ قاتىسۋشىلارى ءتۇسىرىلىم اياقتالعاننان كەيىن وتباسى قۇرىپ جاتاتىن كەزدەرى بولادى. مەنى كەزدەيسوق تاۋىپ العان عوي، سودان: "مۇمكىن بۇل ماعان بۇيىرعان تاعدىر سىيى شىعار" دەپ ويلادىم. قالاي بولعاندا دا، ەشتەڭە جوعالتپايتىنىمدى ءبىلدىم"، — دەپ مويىندايدى مەدەت.

ءتىپتى، بۇل جوبانى جۇمىس كەستەسىمەن سايكەستەندىرىپ وتىرۋعا تۋرا كەلگەن.

"ءتۇسىرىلىم ءبىر ايعا سوزىلدى، نەگىزىنەن كەشكە جانە دەمالىس كۇندەرى بولدى، ويتكەنى بارلىق قاتىسۋشىلار كۇندىز ءوز ىستەرىمەن اينالىسىپ، سودان كەيىن ءتۇسىرىلىم الاڭىنا كەلەتىن. سونىمەن قاتار، جوبا كەيىپكەرلەرىنىڭ ءبىر-بىرىن دۇرىس باعالاۋى ءۇشىن جەكە قاسيەتتەرىنەن باسقا، مىسالى كومپانيامىز تۋرالى ايتۋعا تىيىم سالىندى. ەگەر سىزىق سىزاتىن بولساق، وندا بارلىق قاتىسۋشى شارتتى تۇردە نولدەن باستادى، ال مەن بولسام، مينۋس بىردەن كىرىستىم. ويتكەنى شەتەلدىك بولسام دا جۇڭگو مادەنيەتىن تۇسىنەتىنىمدى ول ارادا دالەلدەۋىم كەرەك ەدى. ياعني جۇڭگو ازاماتتارى بىر-بىرىنە ءتۇسىندىرىپ جاتۋدىڭ قاجەتى جوق نارسەلەردى مەنىڭ ايتىپ وتىرۋىما تۋرا كەلدى. ونىڭ ۇستىنە ءبىز ءبارىمىز ءارتۇرلى سالادان بولدىق، سوندىقتان باستاپقىدا ءبىزدى بايلانىستارتىن ورتاق نارسەلەر از بولدى. بىلايشا ايتقاندا، ول ادامدارمەن قاراپايىم ومىردە مۇلدە جولىعىپ، ارالاس-قۇرالاس بولماس ەدىم"، — دەيدى مەدەت.

ءاربىر جاڭا تۇسىرىلىمگە كىرىسكەن سايىن ولارعا سويلەسۋ وڭايىراق بولدى، ال باسقا قاتىسۋشىلار مەدەتتى وزدەرى "زەرتتەي" باستادى، ويتكەنى ولار قازاقستان تۋرالى دا، ونىڭ ەلىنىڭ مادەنيەتى تۋرالى دا ەشتەڭە بىلمەدى.

- كەزدەسۋلەردىڭ بىرىندە قىزداردىڭ ءبىرى مەنەن قازاقستان مادەنيەتىنىڭ ەرەكشەلىكتەرى تۋرالى ايتۋىمدى ءوتىندى. سودان كەيىن مەن ءبىزدىڭ تىلىمىزدە "مەن سەنى سۇيەمىن" دەگەن تىكەلەي ءسوز تىركەسى جوق ەكەنىن ايتتىم، بىزدە ماحاببات دەگەن ءسوز تىركەسى بار، ءبىراق سوزبە-سوز اۋدارعاندا "مەن سەنى جاقسى كورەمىن" دەگەن كورۋ قابىلەتىنە قاتىستى ماعىنانى بىلدىرەتىندەي اۋدارىلادى دەدىم. بۇل ءسوزىم ەفيرگە شىققاندا قىتايدا ۇلكەن رەزونانس تۋدىردى. بارلىق الەۋمەتتىك جەلىدە وسى ءسوز ءۇزىندىسى قاپتاپ كەتتى.  جۇرت ەندى "سەنى جاقسى كورەمىن" دەگەننىڭ ورنىنا "مەن سەنى جاقسى كورىپ تۇرمىن" دەپ جازا باستادى، وسى فرازادا حەشتەگتەر پايدا بولدى. ءتىپتى، بىرەۋ ماعان ۆيدەو جولداپ جىبەرىپتى، وندا ساحنادا قىتايدىڭ ءبىر ءانشىسى: "مەن بۇگىن ءبارىڭدى جاقسى كورىپ تۇرمىن" دەپ ايتادى. ءبىر سوزبەن ايتقاندا، بۇل وسى جوبانى ايقىنداۋشى ۇران سوزدەردىڭ بىرىنە اينالدى، - دەيدى مەدەت.

تاعى ءبىر كەزدەسۋدە مەدەت الماتى، اتاپ ايتقاندا، بيىك تاۋ باسىندا قوناق ۇيلەرى مەن شاڭعى كۋرورتى بار شىمبۇلاق تۋرالى ايتادى. سيۋجەت شىققاننان كەيىن بىرنەشە اي وتكەن سوڭ، سول جوبانى تاماشالاۋشىلاردىڭ قىتايدان الماتىعا ارنايى سول جەردى كورۋگە بارعانى بەلگىلى بولدى. 

- كۇزدە قازاقستانعا كەلدىم، ءبىزدىڭ ەلىمىزدە دە Heart Signal جوباسى تانىمال بولا باستاعانىن ءتۇسىندىم. ويتكەنى مەنى كوشەدە تانىپ جاتتى، دەپ كۇلەدى مەدەت. — ءبىراق مەن وسى جوبانىڭ ارقاسىندا ۇلكەن اۋديتورياعا قازاقستاندى ناسيحاتتاعانىمدى ماقتان تۇتامىن، — دەپ ءسوزىن قورىتىندىلايدى ول.

ارينە، مەدەت تاڭداعان قىزبەن جوبادان كەيىنگى قارىم-قاتىناسى قالاي بولعانىن سۇرادىم. ءبىراق ول بۇل رەتتە ءلام-ميم دەپ جاق اشپادى. سويتسە بۇل جوبا ءالى جالعاسىن تاۋىپ جاتىر ەكەن، سوندىقتان "بار كارتانى اشۋعا" ءالى ەرتە كورىنەدى.