Almatyda "Dostyk Plaza" saýda ortalyǵy tóńireginde úlken daý shyqty. Jaqynda 2GIS qosymshasynda ortalyq ákimshiligi tarapynan ultaralyq alaýyzdyq týdyratyn teris pikir jarıalanǵan bolatyn. Bul óz kezeginde kóptiń synyna ushyrap, áleýmettik jelide qyzý talqylandy. Osy tusta Dalanews.kz agenttigi jaǵdaıǵa egjeı-tegjeıli sholý jasap kórdi.
Oqıǵa qalaı órbidi?
2 sáýirde 2GIS qosymshasynda "Dostyk Plaza" ortalyǵyna kelýshilerdiń biri "Kontıngenti qorqynyshty. Bári biryńǵaı kalbıt! Taýar baǵalary da dál sondaı!" dep pikir qaldyrady. Al ortalyq ákimshiligi arańdatýshynyń sózin qostap, jiberilgen qatelikter úshin odan keshirim suraıdy.
"Qaıyrly kún! Pikirińizge raqmet! Saýda ortalyǵymyzǵa kelgender sizge jaǵymsyz áser qaldyrǵany úshin keshirim suraımyz! Bizdiń maqsatymyz – barlyq qonaqqa jaıly ári yńǵaıly orta syılaý. Úmitińizdi aqtaı almaǵanymyz úshin ókinish bildiremiz. Tájirıbeńizdi aldaǵy ýaqytta mindetti túrde eskeremiz...!", - delingen ákimishilik jaýabynda.
Kóp uzamaı bul pikir áleýmettik jelide úlken rezonans týdyrdy.
Máselen, Sábıt Báıtenov esimdi Facebook-paıdalanýshylarynyń biri atalmysh pikirdi óz paraqshasyna ornalastyryp, jazba qaldyrǵan.
"Ótkende Dostyk Plaza -ǵa bireý "senderge baratyndar tek kalbıtter" dep jazyp jibergen ǵoı. Dostyq plaza "Olaı aıtpaýdy ótinemiz. Adamnyń bárine teń qaraımyz. Siz de sondaı kózqarasta bolyńyz" deýdiń orynyna. "Bizdiń (kalbıt) qonaqtarymyz sizderge sondaı áser qaldyrǵany úshin keshirim suraımyz" dep jazyp jibergen ǵoı", - deıdi ol.
Sonymen qatar Juldyz Nazarqyzy esimdi qoǵam belsendisi de "Dostyq Plaza" saýda ortalyǵynyń ákimishiligine ashýyn bildirdi.
"Dostyq Plaza" saýda ortalyǵynyń ákimshiligi ultqa til tıgizgen násilishiniń ústinen polısıaǵa aryz jazyp, aıtqan sózin aıyptaýdyń ornyna, pikirine alǵys bildirip, bolǵan jaǵdaıǵa baılanysty ókinish bildirgen eken. Qazaqstanda ornalasqan jáne qazaq ataýyn ıemdengen ortalyq, qazaqtar basym kontıngenttiń ishinde osyndaı pikir qaldyrǵan avtor úshin qandaı da bir sharany qolǵa almaq. Iaǵnı, osy násilshilge yntymaqtastyq qarym-qatynas tanytyp otyr.
"Qyzyq, sonda saýda úıiniń ákimshiligi ne istemek boldy? Búkil qazaqty ǵımarattan shyǵaryp, "aq qojaıynnyń" mazasyn almaý úshin "kalbıtterdi" saýda ortalyǵyna kirgizbeı, feıs-kontrol engizbek boldy ma eken?", - deıdi ol.
Osylaısha qoǵam belsendisi memlekettik qyzmetkerlermen baılanysqa shyǵady. Olar ákimshi pikirdi óshirip tastaǵanyn jáne arnaıy profılaktıka júrgizilgenin aıtqan. Al saýda ortalyǵy atalmysh qateligi úshin keshirim surap, eshbir tutynýshyny bólip-jarmaıtynyn atap ótken.
"Bul saýda ortalyǵy ákimshiliginiń jaýaby: "Dostyk Plaza" atynan jiberilgen qatelik úshin keshirim suraımyz. Bul avtomatty jaýap korporatıvtik jáne jeke senimderimizge sáıkes kelmeıdi. "Dostyk Plaza" saýda ortalyǵynyń resmı ustanymy – kelýshilerimizben jáne qonaqtarymyz arasynda tepe-teńdik qaǵıdasyn ustaný. Barlyq azamat násiline, ultyna, jynysyna, turǵylyqty jerine, áleýmettik jaǵdaıyna, dinı jáne saıası kózqarasyna qaramastan - Dostyq Plazanyń qonaǵy. Avtojaýapty basqaratyn adam jas bolǵandyqtan, bul termınniń maǵynasyn bilmedi", - dep jaýap bergen.
"Sonda násildik qaralaý ǵylymı termınge aınalyp ketkeni me?!", - deıdi jeli qoldanýshysy.
Osy tusta ol saýda ortalyǵy qazaq tiliniń qadirin ketirmeý úshin bılik "Dostyq" ataýyn qoldanýǵa tyıym salýy kerek dep esepteıdi. Aıtýynsha, bul orynǵa "Saýda ortalyǵy kalbıtterge arnalmaǵan" degen ataý áldeqaıda jarasady. Sonymen qatar belsendi jaǵymsyz pikir týdyrǵan eki tarapty ákimshilik jaýapkershilikke tartý kerek ekenin atap ótti.
"Quqyq qorǵaý organdary ultaralyq arazdyqty týydyrǵany úshin IP mekenjaıy boıynsha násilshil adamdy taýyp, "Dostyq Plaza" saýda ortalyǵynyń ákimshiligimen birge qylmystyq jaýapkershilikke tartýy kerek dep oılaımyn", - dedi ol.
Jaǵdaıdyń anyq-qanyǵyn bilý maqsatynda Dalanews.kz agenttigi Dostyk Plaza saýda ortalyǵynyń ákimshiligimen baılanysqa shyqty. Daýly máselege ortalyqtyń resmı ókili, PR bóliminiń basshysy Karına Sycheva jaýap berdi. Ol bolǵan jaǵdaı úshin saýda ortalyǵy kópshilikten keshirim suraǵanyn aıtyp, BAQ ókilderine arnalǵan resmı hatty joldady.
"Qalyptasqan jaǵymsyz aqparattyq ahýal boıynsha shıelenistiń artýyna baılanysty biz egjeı-tegjeıli túsinikteme berip, Dostyk Plaza SOO komandasynyń ustanymyn taǵy da jetkizgimiz keledi.
2 sáýirde 2GIS servısinde ultaralyq alaýyzdyq taqyryby boıynsha teris pikir jarıalandy. Bizdiń SMM mamany sáıkes emes standartty jaýap úlgisin paıdalanyp, ony jumys tártibinde qoldandy. Osydan keıin, birneshe kún ótkende, atalǵan sholýǵa jaýap boıynsha qosymsha shaǵymdar túse bastady. Jumys toby dereý jınalyp, ishki tekserý júrgizildi, onyń barysynda qyzmetker tarapynan óreskel qatelik anyqtaldy", - delingen habarlamada.
Osy tusta basshylyq kináli qyzmetkerdi jumystan bosatqan. Al arańdatýshylyq pikir qaldyrǵan avtordy jaýapqa tartý maqsatynda tıisti organdarǵa aryz túsirgen.
"Qate jaýap alynyp tastaldy, óıtkeni ol bizdiń kompanıanyń saıasatyna, erejelerine jáne ishki senimderi men prınsıpterine, atap aıtqanda Dostyk Plaza komandasyna múldem sáıkes kelmeıdi.
Mamannyń jastyǵyna baılanysty adam faktory men tájirıbesizdiktiń áserine qaramastan, biz ony jumystan shyǵarýǵa deıin qatań sharalar qabyldadyq. Zań bólimi arandatýshylyq túsinikteme avtoryn jaýapqa tartý úshin ótinishti tıisti organdarǵa daıyndaıdy jáne jiberedi. Bizdiń komanda óz kezeginde mundaı qatelikter jibermeý úshin barlyq múmkin áreketterdi jasaıdy", - delingen resmı jazbada.
Sonymen qatar olar ár tutynýshynyń jeke pikiri óte mańyzdy ekenin de atap ótken.
"Dostyk Plaza"-ǵa kún saıyn álemniń túkpir – túkpirinen ondaǵan myń adam keledi, bizde kópultty qyzmetkerler ujymy bar, bizdiń jalǵa alýshylar da -álemniń túkpir-túkpirinen kelgen brendter. Biz barlyq azamattyń násiline, ultyna, jynysyna, turǵylyqty jerine, qoǵamdaǵy jaǵdaıyna, dinı jáne basqa da nanymdaryna qaramastan, teńdik pen teń quqyqty qoldaý jáne absolútti toleranttylyq qaǵıdattaryn ustanamyz.
Biz úshin tutynýshylarymyz ben seriktesterimizdiń pikiri óte mańyzdy. Sondyqtan biz árqashan suraqtarǵa jaýap berýge jáne keri baılanysty ashyq túrde berýge tyrysamyz. Dostyk Plaza saýda ortalyǵy mamandarynyń, jalǵa alýshylardyń jáne basqarýshy kompanıanyń úlken toby táýlik boıy jumys isteıtin kelýshilerimizdiń qaýipsizdigi men jaılylyǵyna jaýap beredi. Biz bárimiz óz jumysymyzdy sapaly ári shyn kóńilmen oryndaýǵa tyrysamyz.
Basshylyq pen búkil Dostyk Plaza komandasynyń atynan súıikti qonaqtarymyzdan, kelýshilerimizden, seriktesterimizden jáne jalǵa alýshylarymyzdan taǵy da shyn júrekten keshirim suraımyz!", - deıdi olar.
Osy tusta Dalanews.kz agenttigi Almaty qalasynyń polısıa departamentine saýal joldap, arańdatýshy qandaı jazaǵa tartylatynyn surap kórdi. Ázirge resmı jaýap kelgen joq.
Alaıda zańǵa kóz júgirtsek, eldiń bútindigin buzyp, ultaralyq alaýyzdyq týǵyzǵan adamdar QR Qylmystyq Kodeksiniń 174-baby boıynsha jazalanady. Buǵan deıin Bas prokýratýra ultaralyq alaýyzdyq týǵyzatyn adamdar jazadan qutylmaıtynyn, ıaǵnı 2-7 jylǵa, al aýyr saldary bolsa, 12-20 jylǵa bas bostandyǵynan aıyrylýy múmkin ekenin aıtqan bolatyn.
Dalanews.kz jaǵymsyz pikir qaldyrǵan avtor reseılik relokant dep boljaıdy.
Sebebi buǵan deıin Reseı SİM-i "Qazaqstanda aıtýǵa bolmaıtyn sózderdi" jarıalaǵan edi. Bul keńesterdiń ishinde Qazaqstanda "mámbet", "myryq", "myrqymbaı", "kalbıt" sózderin aıtýǵa tyıym salynǵany eskertilgen.
"Shetelderge shyǵatyn Reseı azamattary nazaryna" dep bastalatyn konsýldyq keńester áýeli reseılikterdi barǵan elderindegi jergilikti halyqqa qurmetpen, dos peıilmen qaraýǵa shaqyrady. Munan ary "shet memleket zańdaryn qatań saqtaý, dóreki bolmaý, adamǵa qarata kemsite qol siltemeý, jergilikti mádenıetke mensinbeýshilik kórsetpeý, sol eldiń basshylaryna qarata namysqa tıetin sózder aıtpaý, polısıamen qaqtyǵysqa túspeý, boqtamaý, ishimdikti shamadan tys ishpeý" t.b. týraly eskertýler jazylǵan.
