Memleket basshysy Qasym-Jomart Toqaev konstitýtsiialyq reforma boiynsha usynystar ázirleý maqsatynda Konstitýtsiialyq reforma jónindegi komissiia qurý týraly Jarlyqqa qol qoidy, dep habarlaidy Dalanews.kz.
Qujatqa sáikes, Konstitýtsiialyq reforma jónindegi komissiia (Konstitýtsiialyq komissiia) resmi túrde quryldy. Sonymen qatar Komissiianyń qyzmetin aiqyndaityn ereje jáne onyń jeke quramy bekitildi.
Jarlyqta Komissiianyń negizgi mindeti – eldiń Negizgi zańyn jańǵyrtýǵa baǵyttalǵan usynystardy tujyrymdaý ekeni kórsetilgen. Al qujattyń oryndalýyn baqylaý Qazaqstan Respýblikasy Prezidentiniń Ákimshiligine júkteldi.
Atalǵan Jarlyq qol qoiylǵan kúninen bastap kúshine enedi.
Komissiia quramyna kimder kiredi?
Komissiia quramyna tóraǵa, tóraǵanyń orynbasarlary, hatshysy jáne músheleri kiredi. Komissiia tóraǵasy bolyp Qazaqstan Respýblikasy Konstitýtsiialyq Sotynyń Tóraǵasy Ázimova Elvira Ábilqasymqyzy taǵaiyndaldy.
Komissiia tóraǵasynyń orynbasarlary Qazaqstan Respýblikasynyń Memlekettik keńesshisi Erlan Qarin, Qazaqstan Respýblikasy Premer-Ministriniń orynbasary, Mádeniet jáne aqparat ministri Aida Balaeva bolyp bekitildi.
Komissiianyń hatshysy - Qazaqstan Respýblikasy Prezidenti Ákimshiligi Memlekettik quqyq bóliminiń meńgerýshisi Aidar Jarylǵanov.
Komissiia quramyna Parlament depýtattary, máslihat tóraǵalary, ortalyq jáne jergilikti memlekettik organdardyń ókilderi, qoǵamdyq keńester músheleri, buqaralyq aqparat quraldarynyń basshylary, sondai-aq sarapshy jáne ǵylymi qaýymdastyq ókilderi de engizildi.
