Májilis depýtaty Dáýlet Muqaevqa kolledj oqytýshylary júgingen. Olardyń sózinshe, belgili toptyń kontsertine májbúrli túrde bilet satyp alyp jatyr,- dep habarlaidy Dalanews.kz.
Bul týraly depýtat áleýmettik jelide jazdy.
"Osyndai mazmundaǵy hattar jii kelip jatady. Muǵalimderdi kontsertke bilet alýǵa májbúrleý – zańsyz! Bilim salasynyń qyzmetkerlerinen, atap aitqanda kolledj, mektep muǵalimderinen “Alataý serileriniń” kontsertine 5000 teńgeden bilet alýdy talap etip jatyr degen birneshe hat kelýde.
Bul – óreskel zańbuzýshylyq! Eshkimdi erkine qarsy qandai da bir sharaǵa qatysýǵa nemese bilet satyp alýǵa májbúrleýge bolmaidy. QR Eńbek kodeksine jáne "Sybailas jemqorlyqqa qarsy is-qimyl týraly" zańǵa sáikes, mundai májbúrleý – qyzmettik ókilettilikti asyra paidalaný", - dedi depýtat.
Depýtattyń sózinshe, muǵalim – bilim berýshi, satylatyn kórermen emes.
"Eger siz osyndai qysymǵa tap bolsańyz tiisti organǵa shaǵym túsirińiz. Óz quqyǵyńyzdy bilińiz jáne qorǵańyz. Ujymda mundai áreketke qarsy pikir bildirýden qoryqpańyzdar!!! Muǵalimderdiń bedeli kontserttiń kórermen sanymen ólshenbeidi!
Respýblika saraiyna adam tolmai jatsa, muǵalimderdiń ne jazyǵy bar?! Shaǵyn sahnalarda da kontsert berýge bolady-mys. Kóresizder, myna posttan keiin májbúrli bilet aldyrýǵa qatysty bilim bólimi de,ánshiler de eshteńe bilmei shyǵady", - dedi Muqaev.
