Áielin óltirdi dep aiyptalyp otyrǵan burynǵy ulttyq ekonomika ministri Qýandyq Bishimbaevqa qatysty sot otyrysynda ekinshi aiyptalýshy Baqytjan Baijanov sońǵy sózin aitty, - dep habarlaidy Dalanews.kz.
Baijanovtyń sózinshe, áý bastan meiramhana jabylǵanyn, qyzmetkerler taratylǵanyn joqqa shyǵarmaǵan. Oǵan qosa videolardy óshirýdi tapsyrǵanyn moiyndady.
"Shynynda da, munyń bári - bolǵan jaittar. Tergeýdiń basynan bastap munyń bári qashan, kim arqyly jasalǵanyn aittym. Biraq osy jerde mańyzdy bir suraq bar: sol kezde aýyr qylmys jasalǵanyn, bul Saltanattyń ómirden ótýine sebep bolǵanyn bildim be? Bilmedim dep ant-sý ishe alamyn. Bilsem onyń birin de istemes edim. Tipti túsinbedim. Oǵan qosa jasaǵan isterim qylmysty jasyrý dep esepteletinin de bilmedim. Sumdyq qylmystyń izderin sanaly túrde jasyrýǵa kómektesken bolsam, ózimdi qorǵamas edim, óz-ózimdi keshire almas edim. ...Osy ýaqyt ishinde Saltanatpen kezdesken sátterimdi eske aldym. Tiri bolsa jaqyndaryna mahabbaty men meiirimin kórseter edi dep oiladym. Ol óte shynaiy, meiirimdi jan boldy. Búginde onyń otbasynyń basyna túsken aýyr qaiǵyny eshqandai sózben jeńildete almaisyń. Biraq osy qaiǵyny seiiltýge múmkindik bolsa, jaza arqalaýǵa daiynmyn. Taǵy bir márte Saltanattyń otbasyna, jaqyndaryna shyn júrekten qaiǵyryp kóńil aitamyn. Keshirim suraimyn. Saltanattyń jatqan jeri jaily bolsyn, topyraǵy torqa bolsyn, imany salamat bolsyn!" - dedi Baijanov.
Aita keteiik, Astana qalasynyń mamandandyrylǵan aýdanaralyq sotynda Qýandyq Bishimbaevqa qatysty qylmystyq is boiynsha birneshe sot otyrysy ótti. Ony dúiim jurt Joǵarǵy sottyń YouTube arnasynan onlain qarady.
Azamattyq nekedegi áieli Saltanat Núkenovany óltirdi degen aiyppen sottalyp jatqan eks-ministr Qýandyq Bishimbaevty advokat Leila Ramazanova, Nazken Qusaiynova, Erlan Ǵazymjanovtar qorǵap jatyr.
Al marqum Saltanat Núkenovanyń aǵasy Aitbek Amangeldi men onyń otbasynyń advokattary – Janna Orazbahova men Áliia Omarova.
27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Bishimbaevqa eki bap boiynsha aiyp taǵyldy:
- asa qatygezdikpen kisi óltirý (15 jyldan 20 jylǵa deiin nemese ómir boiyna bas bostandyǵynan aiyrý);
- qinaý (4 jyldan 7 jylǵa deiin bas bostandyǵyn shekteý nemese osy merzimge bas bostandyǵynan aiyrý).
