ايەلىن ءولتىردى دەپ ايىپتالىپ وتىرعان بۇرىنعى ۇلتتىق ەكونوميكا ءمينيسترى قۋاندىق بيشىمبايەۆقا قاتىستى سوت وتىرىسىندا ەكىنشى ايىپتالۋشى باقىتجان بايجانوۆ سوڭعى ءسوزىن ايتتى، - دەپ حابارلايدى Dalanews.kz.
بايجانوۆتىڭ سوزىنشە، ءاۋ باستان مەيرامحانا جابىلعانىن، قىزمەتكەرلەر تاراتىلعانىن جوققا شىعارماعان. وعان قوسا ۆيدەولاردى ءوشىرۋدى تاپسىرعانىن مويىندادى.
"شىنىندا دا، مۇنىڭ ءبارى - بولعان جايتتار. تەرگەۋدىڭ باسىنان باستاپ مۇنىڭ ءبارى قاشان، كىم ارقىلى جاسالعانىن ايتتىم. ءبىراق وسى جەردە ماڭىزدى ءبىر سۇراق بار: سول كەزدە اۋىر قىلمىس جاسالعانىن، بۇل سالتاناتتىڭ ومىردەن وتۋىنە سەبەپ بولعانىن ءبىلدىم بە؟ بىلمەدىم دەپ انت-سۋ ىشە الامىن. بىلسەم ونىڭ ءبىرىن دە ىستەمەس ەدىم. ءتىپتى تۇسىنبەدىم. وعان قوسا جاساعان ىستەرىم قىلمىستى جاسىرۋ دەپ ەسەپتەلەتىنىن دە بىلمەدىم. سۇمدىق قىلمىستىڭ ىزدەرىن سانالى تۇردە جاسىرۋعا كومەكتەسكەن بولسام، ءوزىمدى قورعاماس ەدىم، ءوز-وزىمدى كەشىرە الماس ەدىم. ...وسى ۋاقىت ىشىندە سالتاناتپەن كەزدەسكەن ساتتەرىمدى ەسكە الدىم. ءتىرى بولسا جاقىندارىنا ماحابباتى مەن مەيىرىمىن كورسەتەر ەدى دەپ ويلادىم. ول وتە شىنايى، مەيىرىمدى جان بولدى. بۇگىندە ونىڭ وتباسىنىڭ باسىنا تۇسكەن اۋىر قايعىنى ەشقانداي سوزبەن جەڭىلدەتە المايسىڭ. ءبىراق وسى قايعىنى سەيىلتۋگە مۇمكىندىك بولسا، جازا ارقالاۋعا دايىنمىن. تاعى ءبىر مارتە سالتاناتتىڭ وتباسىنا، جاقىندارىنا شىن جۇرەكتەن قايعىرىپ كوڭىل ايتامىن. كەشىرىم سۇرايمىن. سالتاناتتىڭ جاتقان جەرى جايلى بولسىن، توپىراعى تورقا بولسىن، يمانى سالامات بولسىن!" - دەدى بايجانوۆ.
ايتا كەتەيىك، استانا قالاسىنىڭ مامانداندىرىلعان اۋدانارالىق سوتىندا قۋاندىق بيشىمبايەۆقا قاتىستى قىلمىستىق ءىس بويىنشا بىرنەشە سوت وتىرىسى ءوتتى. ونى ءدۇيىم جۇرت جوعارعى سوتتىڭ YouTube ارناسىنان ونلاين قارادى.
ازاماتتىق نەكەدەگى ايەلى سالتانات نۇكەنوۆانى ءولتىردى دەگەن ايىپپەن سوتتالىپ جاتقان ەكس-مينيستر قۋاندىق بيشىمبايەۆتى ادۆوكات لەيلا رامازانوۆا، نازكەن قۇسايىنوۆا، ەرلان عازىمجانوۆتار قورعاپ جاتىر.
ال مارقۇم سالتانات نۇكەنوۆانىڭ اعاسى ايتبەك امانگەلدى مەن ونىڭ وتباسىنىڭ ادۆوكاتتارى – جاننا ورازباحوۆا مەن ءاليا وماروۆا.
27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى.
سونىمەن قاتار، قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى. بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.
بيشىمبايەۆقا ەكى باپ بويىنشا ايىپ تاعىلدى:
- اسا قاتىگەزدىكپەن كىسى ءولتىرۋ (15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ)؛
- قيناۋ (4 جىلدان 7 جىلعا دەيىن باس بوستاندىعىن شەكتەۋ نەمەسە وسى مەرزىمگە باس بوستاندىعىنان ايىرۋ).
