Kásipqoı boksshyny "zorlady" dep aıyptaǵan Ánarý Qurmanáliniń ákesi Qaldybek Qurmanáliniń málimdemesi paıda boldy, - dep habarlaıdy Dalanews.kz.
Jýrnalıs Gúlbaný Ánıatqyzy Qaldybek Qurmanálimen sóıleskenin aıtty.
"Qaldybek aǵanyń 2016 jyly ómirden ótken Aqmarjan Taýbaeva esimdi áı̆elinen Ánarý qyzy men Ánasyl uly bar eken. Balalarymen aralasyp, kómektesip turatynyn aı̆tty. Qaldybek Qurmanáli júregine ota jasatyp, densaýlyǵyna baı̆lanysty Túrkistan oblysyna kóship ketken. "Qazir qyzyma kómektesý úshin Almatyǵa keldim" deı̆di. "Qyzym jylap kelgende bul soraqylyqty qoǵam bilýi kerek dep, jýrnalısermen suhbat uı̆ymdastyrǵan da ózim" dep otyr", - deıdi jýrnalıs.
Qaldybek Qurmanáli Janqosh jaqtan keshirim suraǵanyn, biraq eshqandaı̆ keshirim bere almaı̆tynyn aı̆typty.
"Qyzymdy qorǵaýǵa janymdy, barymdy salamyn" dep otyr. Ánarý 28 jastaǵy úlken qyz, tulǵa. Janqoshpen kezdeskeni, oǵan nege sengeni jaı̆ly eshteńe aı̆ta almaı̆myn dedi. Qoǵamnyń býllınginen soń Ánarý birneshe ret ózine qol jumsamaq bolypty. Qazir depressıada júr deı̆di. Qaldybek Qurmanáli bul máselede aıaǵyna deı̆in qyzynyń qasynda bolatynyn aı̆tty", - deıdi Gúlbaný Ánıatqyzy.
Eske salaıyq,buǵan deıin Janqosh Turarovtyń advokaty málimdeme jasaǵan bolatyn. Advokat Samat Mamutov baspasóz konferensıasynda daýly suraqtarǵa jaýap berdi.
"Janqoshtyń jaǵynan ondaı eshqandaı áreket jasalmaǵan (Ánarýdyń otbasyna habarlasyp, aryzdy alyp tastaýdy ótinbegen- esk.). Janqosh aryz boıynsha jalǵan dep esepteıdi. Ózin tazamyn dep esepteıdi. Keshirim surap nemese aryzyn alyp tastaý týraly ótinish jasaýǵa eshqandaı negiz joq", - dedi advokat.
Sonymen qatar, jala jabý deregi boıynsha aryzdanýshyny sotqa berýge nıetti ekenin málimdedi.
"Zań talaptaryna sáıkes qylmystyq is aıaqtalǵannan keıin sotqa júginýge nıetimiz bar. Sebebi qazirgi tańda kiná dáleldenbegen. Tergeý aıaqtalǵanyn kútemiz", - dedi ol.
Sonymen qatar, Janqosh Turarovtyń advokaty aryzdanýshynyń ákesi, tanymal kompozıtor Qaldybek Qurmanáli eshqandaı baılanysqa shyqpaǵanyn aıtty.
"Joq", - dedi advokat.
Sondaı-aq Turarovtyń advokaty sportshyny aıyptaǵan qyzdy sotqa beretinin aıtty.
"Ánarýdi sotqa berý úshin sotaldy tergeý isi aıaqtalýy kerek. Sebebi qazir ony sotqa bersek te, sotaldy tergeý isiniń aıaqtalýyn kútýimiz kerek. Odan keıin biz sotqa beremiz", - dedi ol jýrnalıserge ótkizgen pres-konferensıada.
Sondaı-aq, ol esirtki men ishimdikke qatysty test tapsyrylǵanyn aıtty.
"Quqyǵymyz birdeı, sondyqtan tek jábirlenýshiniń sózi ne jelide taraǵan aqparatqa súıenip ony kúdikti dep tanýǵa bolmaıdy. İs boıynsha dáleldemeler jıyntyǵy bolýy kerek. Saraptamalar, beınejazbalar bolýy kerek. Sotaldy tergep-tekserý bastaldy, saraptamalar taǵaıyndaldy. Psıhotropty, alkogólge qatysty test tapsyryldy, bári taza dep kórsetildi", - deıdi ol.
Senbi, 24 tamyzda boksshy Janqosh Turarov áleýmettik jeli men BAQ-ta qyzý talqylanyp jatqan daýly máselege qatysty taǵy da málimdeme jasaǵan bolatyn. Sebebi buǵan deıin Ánarý Qaldybekqyzy sportshymen qalaı tanys ekenin jáne istiń mán-jaıyn aıtqan edi.
Ánarýdyń aıtýynsha, ol Janqosh Turarovpen 2018 jyly áleýmettik jeli arqyly tanysqan.
«2018 jyly «VKontakte» áleýmettik jelisi arqyly maǵan ózi birinshi hat jazdy. Meniń sýretterimen lúpil basyp, únemi hat jazyp júrdi. Men ol kezde onyń úılengenin, bala-shaǵasy bar ekenin bilgen joqpyn, boksshy ekenin de bilgen joqpyn. Áleýmettik jelide otbasy týraly eshbir aqparat jazbaǵan. Boıdaqpyn dep statýs qoıǵan. Sodan keıin jaı ǵana sóılesip júrdim. 2018 jyldyń aqpan aıynda meni kezdesýge shaqyrdy. Ondaı jerge jalǵyz barmaıtyn bolǵan soń qurbymdy ertip aldym. Grýppalas qurbym ekeýmiz kezdesýge bardyq, al onyń janynda kóp adam boldy. Sodan bastap bir aı boıy maǵan hat jazyp júrdi. Maǵan «sen pák qyzsyń, sen taza qyzsyń, maǵan qatty unaısyń» deıtin. Biraq, ol kezde men onyń otbasyly adam ekenin bilip, «siz úılengen adam ekensiz, men sizben aralasa almaımyn» dedim. «Joq, men úılengen bolsam da sen maǵan unaısyń, men saǵan aǵalyq qamqorlyq tanytqym keledi, jamandyq oılamaımyn» dedi. Osylaı kúnde hat jazatyn. Arada bir aı ótkende maǵan «ákemniń anasy, ájem qatty aýyryp jatyr. Hál ústinde. Seni kórsetkim keledi, kelshi» dep bir meken-jaı jiberdi. Men birden bara almaımyn dedim. Biraq, sonyń aldynda, bir jarym jyl buryn men anamnan aıyrylǵan adam retinde onyń ájesi aýyryp qalǵanyna qatty janym ashydy. Sondyqtan, ol meni apasynyń hálin suraýǵa kóndirdi», - deıdi Ánarý Qaldybekqyzy.
Buǵan deıin tanymal qazaqstandyq boksshy Jankosh Turarov «qyz zorlady» degen aqparat tarap ketti. Máselege Almaty polısıasy pikir bildirdi.
Polısıanyń málimetinshe, Almaty qalasy Áýezov aýdanynyń Polısıa departamenti qylmystyq is qozǵaǵan.
«Sot-medısınalyq saraptama taǵaıyndaldy. Qazir oqıǵanyń mán-jaıyn anyqtaý úshin tergeý jalǵasyp jatyr», - dep jazylǵan habarlama.
Keıin Janqosh Turarov ózine taǵylǵan aıyptarǵa jaýap berdi.
«3 qyz ósirip otyrǵan ákemin! Tósektes qyz kerek bolsa maǵan zorlamaı-aq keletin jaǵdaıym bar! Qaıdan shyqqan jala ekenin ózim de túsinbeı otyrmyn, qazir máseleniń mán jaıyn anyqtap, kim qandaı jala taǵyp otyrǵanyn anyqtaıtyn bolamyn», - dedi ol.
