Kommýnaldyq qyzmetterdi jetkizýshilerdiń shyǵyndaryn óteý tártibi aǵymdaǵy jyldyń 18 sáýirinde bekitildi jáne búgingi tańda ákimdikter ótinimderdi qabyldaý úshin call-ortalyqtar men aqparattyq resýrstar qurý boiynsha shuǵyl sharalar qabyldap jatyr, dep habarlaidy Dalanews.kz QR IIDM baspasóz qyzmetine silteme jasap.
Ákimdikter ótinimderdi qabyldaityn arnaýly júieni daiyndaǵannan keiin ol týraly jergilikti halyqty habarlandyrady.
Atalǵan jumys múmkindiginshe qysqa merzim ishinde júrgiziledi. Sondyqtan ótinim berý úshin ákimdikterden tiisti aqparatty kútý qajet.
Memleket aǵymdaǵy jyldyń sáýir jáne mamyr ailary úshin kommýnaldyq qyzmetterge aqy tóleidi, sondyqtan ótinim berýge asyqpaý qajet. Óitkeni barlyq ótinishter mamyr aiyn qosa alǵandaǵy kezeńde qabyldanady.
Ótinimder call-ortalyqtar men aqparattyq júieler arqyly qabyldanady. Ákimdikterge tutynýshynyń jeke sáikestendirý nómirin, áleýmettik mártebesin jáne esepshotynyń derekterin usyný qajet.
Esterińizge sala keteiik, Qazaqstan Respýblikasy Prezidentiniń tapsyrmasyn oryndaý maqsatynda Indýstriia jáne infraqurylymdyq damý ministrligi Tótenshe jaǵdai kezeńinde kommýnaldyq qyzmetterdi jetkizýshilerdiń shyǵyndaryn óteý qaǵidalaryn bekitti.
Onyń negizgi maqsaty - karantin kezinde memlekettiń qoldaýy qajet adamdarǵa kómek kórsetý.
Ákimdikter jáne Eńbek jáne halyqty áleýmettik qorǵaý ministrligi usynystarynyń negizinde mynadai sanattaǵy adamdardyń kommýnaldyq qyzmetterine tólem júrgiziledi:
1) 1, 2 jáne 3 toptaǵy múgedekter;
2) Uly Otan soǵysynyń múgedekteri men qatysýshylary jáne Uly Otan soǵysynyń múgedekteri men qatysýshylaryna teńestirilgen adamdar;
3) múgedek balalardy tárbieleýshi otbasylar;
4) kópbalaly otbasylar;
5) eń tómen jáne az zeinetaqy alatyn zeinetkerler;
6) memlekettik nemese qoǵamdyq mindetterin, áskeri qyzmetin oryndaý kezinde, ǵarysh keńistigine ushýdy daiyndaý nemese júzege asyrý kezinde, adam ómirin qutqarý kezinde, quqyq tártibin qorǵaý kezinde qaza tapqan (qaitys bolǵan) adamdardyń otbasylary;
7) ataýly áleýmettik kómek alatyn azamattar, onyń ishinde jalǵyz basty zeinetkerler.
15 myń teńge mólsherindegi tólem ai saiyn kommýnaldyq qyzmetterdi tutynýshylardyń esepshotyna (abonenttik shotqa) jiberiletin bolady.
Kómek kommýnaldyq qyzmetterdi jetkizýshilermen óz atynan shart jasasqan jáne karantin engizilgen eldi mekende turatyn kórsetilgen sanattardaǵy adamdarǵa kórsetiletin bolady.
Múgedek balalardy tárbieleýshi otbasylar, kópbalaly otbasylar jáne qyzmetin oryndaý kezinde qaza tapqan adamdardyń otbasylaryna kelsek, olardyń otbasynyń bir múshesinde kommýnaldyq qyzmetterdi jetkizýshilermen shart jasalǵan bolýy tiis.
