Eger Qazaqstannyń kei óńirlerinde kommýnaldy tarifter tek QQS ósiminen emes, basqa sebeptermen kóterilgeni anyqtalsa, turǵyndarǵa tólem boiynsha qaita esepteý júrgiziledi. Bul týraly Premer-Ministrdiń orynbasary – Ulttyq ekonomika ministri Serik Jumanǵarin málimdedi, dep habarlaidy Dalanews.kz.
Ministrdiń sózinshe, tarifterdi retteitin organ árbir tabiǵi monopoliia sýbektisimen jeke-jeke jumys júrgizip jatyr. Sebebi kei jaǵdaida tariftiń ósýi QQS-tyń qymbattaýymen túsindirilgenimen, is júzinde oǵan basqa faktorlar da áser etken.
Mysaly, kei óńirlerde kommýnaldyq qyzmet baǵasynyń kóterilýine gaz baǵasynyń qymbattaýy sekildi sebepter yqpal etken. Sondyqtan tarifterdiń barlyǵy tek QQS ósiminen boldy deý durys emes.
Jumanǵarinniń aitýynsha, jalpy el boiynsha kommýnaldyq tarifter jappai ósip jatqan joq. Alaida ár jaǵdai jeke qaralady. Eger tarif QQS ósiminen artyq mólsherde kóterilgeni anyqtalsa, tariftik retteýshi organ monopolist kompaniialardy artyq tólengen qarajatty turǵyndarǵa qaitarýǵa mindetteidi.
Qazir osy baǵytta taldaý júrgizilip, negizsiz kóterilgen tarifter boiynsha tiisti sharalar qabyldanyp jatyr.
