Almatydaǵy ziian shyǵaryndylardyń shamamen 60 paiyzy kólikterge tiesili, dep habarlaidy dalanews.kz.
Bul jylyna 113 myń tonnaǵa jýyq ziian zat degen sóz. Degenmen aýany kólik qana lastamaidy. Bul týraly Almaty qalasy Ekologiia jáne qorshaǵan orta basqarmasy ókilderi habarlady.
Qaladaǵy ziian shyǵaryndylardyń jalpy kólemi - shamamen 189 myń tonna. Onyń basym bóligi kólikke tiesili.
Aýa lastanýyna kómir jáne otynmen jylytylatyn jeke turǵyn úiler de áser etedi. Sondai-aq, qatty jáne suiyq otyn paidalanatyn nysandardan, sonyń ishinde monshalar men qoǵamdyq tamaqtaný oryndarynan, ásirese, káýaphanalardan shyǵatyn tútin de aýany lastaidy.
Almatynyń tabiǵi erekshelikteri de aýa sapasyna áser etedi. Qala Ile Alataýynyń bókterinde ornalasqan. Qysta, ásirese, tymyq kúnderi inversiia qubylysy baiqalady. Iaǵni, jyly aýa qabaty ziian shyǵaryndylar joǵary qarai taraýyna kedergi keltiredi. Sonyń saldarynan lastaýshy zattar atmosferanyń tómengi qabatynda jinalyp qalady.
Almatydaǵy aýa sapasyn jaqsartý úshin ekologiialyq talaptardy kezeń-kezeńimen engizý kózdelgen.
2025 jyly 30 jeltoqsanda bekitilgen aýany qorǵaý qaǵidalaryna sáikes aýany lastaityn statsionarlyq kózderge baqylaýdy kúsheitý, gaz tazartý qondyrǵylaryn paidalaný, sondai-aq, gaz tartylǵan aýdandarda qatty jáne suiyq otyn jaǵýdy shekteý sharalary qarastyrylady.
Kólikten shyǵatyn ziian zattardy azaitý da mańyzdy baǵyttardyń biri. Qalada avtobýs parkin jańartý jumystary jalǵasyp, qoǵamdyq kólikke arnalǵan arnaiy jolaqtar jelisi keńeiip keledi.
Budan bólek, biyl sáýirden bastap Almatyda shyǵaryndylary tómen aimaqty (LEZ) engizý boiynsha pilottyq joba júzege asyrylyp jatyr. Jobanyń synaq kezeńinde oǵan qatysý erikti túrde júrgiziledi. Kirý úshin aqy alynbaidy, aiyppul salynbaidy jáne kólik qozǵalysyna shekteý qoiylmaidy.
