Qazaqstan qurylysshylar odaǵy QQS mólsherlemesin 16 paiyzdan 14 paiyzǵa deiin tómendetip, bizneske arnalǵan salyq talaptaryn qaita qaraýdy talap etti. Sala ókilderiniń pikirinshe, jańa erejeler kásipkerlerdiń shyǵynyn arttyryp, qurylys qunynyń qymbattaýyna ákelýi múmkin, dep habarlaidy dalanews.kz.
Aita keteiik, 2026 jylǵy 1 qańtardan bastap Qazaqstanda QQS mólsherlemesi 16 paiyzǵa deiin ósti. Al QQS boiynsha mindetti tirkeýge turý shegi 43,25 million teńgege deiin tómendedi. Qurylysshylar odaǵynyń pikirinshe, bul ózgerister shaǵyn jáne orta bizneske, sonyń ishinde merdigerlik jáne óndiristik kompaniialarǵa aitarlyqtai áser etken.
Sala ókilderi petitsiia jariialap, Ulttyq ekonomika ministrligine úsh usynys joldady:
— QQS mólsherlemesin 16 paiyzdan 14 paiyzǵa deiin tómendetý;
— QQS boiynsha mindetti tirkeý shegin 43,25 million teńgeden 120 million teńgege deiin kóterý;
— Salyq kodeksiniń 286-babynyń 16-tarmaqshasyn alyp tastaý. Bul norma ońailatylǵan salyq rejimin qoldanatyn kompaniialarmen jumys istegen kezde shyǵyndardy shegerimge jatqyzýǵa shekteý qoiady.
Petitsiia avtorlarynyń pikirinshe, qoldanystaǵy talaptar iri merdigerlerdi shaǵyn biznespen jumys isteýden bas tartýǵa nemese qosymsha salyq shyǵyndaryn kóterýge májbúr etedi.
«Negizdelgen jáne qujatpen rastalǵan shyǵyndardy esepke alý quqyǵy seriktestiń qandai salyq rejimin qoldanatynyna bailanysty bolmaýy kerek», – dep málimdedi Qazaqstan qurylysshylar odaǵy.
Uiym ókilderi usynylǵan ózgerister qurylys kompaniialarynyń shyǵyndaryn azaityp, iri merdigerler men shaǵyn biznes arasyndaǵy yntymaqtastyqty saqtaýǵa múmkindik beredi dep esepteidi.
Aita keteiik, qazan aiynyń sońynda Premer-ministr Oljas Bektenov jaýapty ministrlikterge bir ai ishinde basqa elderdiń tájiribesin zerttep, iri bailyq ielerine salyq salý joldary boiynsha usynys ázirleýdi tapsyrǵan edi.
