Ishki ister ministriniń 2026 jylǵy 30 qazandaǵy buiryǵymen Qazaqstan azamattarynyń shetelge turaqty turýǵa ketýine qujattardy rásimdeý tártibine ózgerister engizildi, dep habarlaidy dalanews.kz.
Jańa erejege sáikes azamattyń Qazaqstan aýmaǵynda tirkelgeni týraly málimet bolmasa, ol tirkeý deregin anyqtaý úshin ishki ister organdaryna ótinish berýi kerek. Qazaqstanda turaqty tirkeýi bar, biraq el azamattyǵynan shyqqan nemese azamattyǵynan aiyrylǵan adamdar shetelge turaqty turýǵa ketý qujattaryn rásimdeý úshin aldymen Qazaqstanda turaqty turatyn shetel azamaty nemese azamattyǵy joq adam retinde tirkelýge tiis.
Qujattar Halyqqa qyzmet kórsetý ortalyǵy (HQKO) nemese elektron portal arqyly qabyldanady. Memlekettik qyzmet kórsetý merzimi - 20 jumys kúni.
Ótinishte qate bolsa nemese qujattar tolyq usynylmasa, kemshilikterdi túzetýge 15 jumys kúni beriledi. Bul ýaqyt memlekettik qyzmet kórsetý merzimine kirmeidi. Qateler belgilengen merzimde túzetilmese, qujattardy qabyldaýdan bas tartylady. Qujattar tolyq tapsyrylǵannan keiin málimet IIM-niń kóshi-qon qyzmetiniń aqparattyq júiesine engiziledi. Tiisti memlekettik organdar qujattardy 10 jumys kúni ishinde kelisedi.
Oń sheshim qabyldanǵan jaǵdaida azamatty áskeri esepten shyǵarý rásimi júrgiziledi. Tiisti habarlama alǵannan keiin azamat bir jumys kúni ishinde HQKO-ǵa baryp, jeke kýáligin nemese tiisti turý qujatyn tapsyrýy kerek.
Osydan keiin azamat Qazaqstandaǵy turaqty tirkeýden shyǵarylyp, oǵan shetelge turaqty turýǵa ketýge qajet qujattardy rásimdeý týraly sheshim beriledi.
Ótinish elektron portal arqyly berilse, sheshim elektron tsifrlyq qoltańbamen rastalyp, azamattyń jeke kabinetine jiberiledi.
