Kolledj muǵalimi jumys ornynda direktor tarapynan psihologiialyq qysym kórgenin aityp, bolǵan jaǵdaiǵa qatysty málimdeme jasady. Onyń aitýynsha, oqiǵa jumys ýaqytynda áriptesti quttyqtaý kezinde bastalǵan, dep habarlaidy Dalanews.kz.
Muǵalimniń sózinshe, ujym ishki dástúr boiynsha áriptesin quttyqtaý úshin direktordyń kabinetine jinalǵan. Alaida quttyqtaý sharasynyń ornyna direktor janjal shyǵaryp, aiqailap, qyzmetkerlerge agressiia tanytqan.
Onyń aitýynsha, osy kezde direktor eshqandai zańdy negizsiz ony áriptesteriniń kózinshe qorlap, daýysyn kóterip, negizsiz aiyptaýlar aitqan. Muǵalim direktordyń aitqan sózderi beinejazbaǵa túskenin atap ótip, olardyń shyndyqqa sáikes kelmeitinin jetkizdi.
«Beinejazbada aitylǵan barlyq málimdeme – jala. Olar shyndyqqa sáikes kelmeidi», – deidi ol.
Muǵalim direktorǵa óziniń júktiliginiń besinshi aiynyń ortasynda júrgeni jaqsy belgili bolǵanyn aitty. Soǵan qaramastan, direktor, onyń aitýynsha, psihologiialyq qysym kórsetip, qorlaý men agressivti sózder aitqan.
Ol mundai áreketter Qazaqstan Respýblikasynyń eńbek zańnamasyn, ásirese júkti áielderdi qysymnan, kemsitýden jáne qolaisyz eńbek jaǵdaiynan qorǵaýǵa baǵyttalǵan normalardy óreskel buzý ekenin atap ótti.
Muǵalimniń sózinshe, bul jaǵdai bir rettik oqiǵa emes. Onyń aitýynsha, kolledjde jumys istei bastaǵan ýaqyttan beri direktor tarapynan júieli túrde jeke basyna qatysty teris kózqaras baiqalyp keledi.
«Bul kóbine kópshilik aldynda qorlaý, talqylaý jáne til tigizý arqyly kórinis tabady», – dedi ol.
Oqiǵa saldarynan muǵalimniń densaýlyǵy kúrt nasharlaǵan. Onyń aitýynsha, qan qysymy aldymen 150/100-ge deiin, keiin 144/93-ke deiin kóterilgen. Osyǵan bailanysty jedel járdem shaqyrylǵan.
Muǵalimniń aitýynsha, ózi kúizelis jaǵdaiynda jylap otyrǵan kezde direktor kabinetke kirip, qysymdy jalǵastyrǵan.
«Ol maǵan: “Ańyrama, qoi dedim, únińdi shyǵarma” dedi. Bul sózder jaǵdaiymdy odan ári ýshyqtyrdy», – deidi ol.
Onyń aitýynsha, jaǵdaidyń qanshalyqty kúrdeli ekenin túsingennen keiin ǵana direktordyń sóileý máneri ózgergen.
Qazir muǵalim júktilikti saqtap qalý úshin meditsinalyq baqylaýda jatyr. Onyń aitýynsha, dárigerler joǵary qan qysymy men jaǵdaiynyń nasharlaýyn jumys ornynda bolǵan kúizelis saldarymen bailanystyryp otyr.
Muǵalim bul jaǵdaidy Qazaqstan Respýblikasynyń Eńbek kodeksin, basshylarǵa qoiylatyn kásibi etika normalaryn jáne óziniń ar-namysy men qadir-qasietin qorǵaýǵa qatysty konstitýtsiialyq quqyqtaryn óreskel buzý dep sanaitynyn málimdedi.
