Evrei naqyly: Eń jaqsy kólik – jańa kólik
Álgi, ótken jyly resmi dilerler satty degen 198 686 kóliktiń úlesi jyldaǵydan 60,2 paiyzǵa kóp eken. Bul – elimizdegi avtobólshek saýdasynyń búkil tarihyndaǵy eń jaqsy nátije. Osy rette otandyq avtokóliktiń naryqtaǵy úlesi jyldyń sońynda 71 paiyzdy shamalaǵan. Búgingi tańda eń tanymal 10 modeldiń 9-y «Qazaqstanda jasalǵan».
Qazaqstan avtokólik odaǵynyń deregine súiensek, elimizdegi avtomobil ónerkásibiniń úlesi byltyr taǵy 5,7 paiyzǵa ilgerilegenin ańǵaramyz. Bul degenimiz, barlyq mashina jasaý sektorynyń 44,3 paiyzyn alyp jatyr.
– Eldegi avtokólik óndirisi rekordtyq kórsetkishke qol jetkizip jatyr. Salada investitsiia tartý sharalary jalǵasýda, bul eńbek naryǵynda júzdegen jańa jumys oryndarynyń ashylýyna, memlekettik biýdjetke salyq tólemderiniń aitarlyqtai artýyna oń áserin tigizetini sózsiz. Otandyq óndiriske salynǵan investitsiia naqty nátije kórsetetinine kózimiz jetti, bul qazaqstandyq avtomobil ónerkásibiniń bolashaǵyn optimistik turǵydan baǵalaýǵa múmkindik beredi, – deidi odaq prezidenti Anar Maqasheva.
Onyń sózine qaraǵanda, 2023 jyl boiy Qazaqstanda barlyq úlgide 148 885 dana kólik óndirilgen. Bul arǵy jyldyń qańtar-jeltoqsan aralyǵymen salystyra qoisaq, 30 paiyzdan asyp ketkenin kóremiz. Jalpy nátijeni aqshalai eseptep jibersek, 1,8 trillion teńgeden asyp ketedi.
«Qarasha, jeltoqsanmen, sol bir eki ai...»
Aitpaqshy, byltyrǵy satylym kórsetkishterine úńilsek, shildeden bastap el turǵyndarynyń sý jańa kólikterdi jii satyp ala bastaǵanyn baiqaimyz. Qańtarda 10 myńdai jańa kólik kóshemizdi toltyrsa, jyldyń ortasynda bul san eselene túsken – 18 820! Qarashada 19 myńǵa jeteqabyl. Ásirese, jeltoqsandaǵy tsifr qyzyq bizge. Kólik baǵasy 1 million teńgege deiin «qulaǵan» sońǵy aida Qazaqstan halqy 23 528 sý jańa kólik satyp alypty.
Qazaqstanda kólik óndirisinde kóshbasshy oryndy Qostanai Allur zaýyty alady. Kompaniia ótken jyly 90 230 dana kólik óndirgen. Bir jyl burynǵydan 29 paiyzǵa jýyq kóp. Almatydaǵy Hyundai Trans Kazakhstan óndirisin 48 857 avtokólikke deiin ulǵaitypty, munda da ósim 31 paiyzdan asyp ketedi.
Semeidegi «SemAZ-da» da ilgerileý bar, 3 788 dana shyǵarǵan. Qaraǵandy oblysynyń Saran qalasynda ornalasqan QazTehna 1 801 dana kólik shyǵarypty. Kókshetaýda «KAMAZ Injiniring» óndirisin 7,5 paiyzǵa ulǵaityp, 1 352 dana júk kólikterin paidalanýǵa bergen.
Osy avtokólik kásiporyndarynda jumys isteitinderdiń sanynda da aitarlyqtai ósim bar. 2022 jylǵy 4,9 myń adamnan 2023 jyly 6 myńǵa deiin.
Mingenim astymdaǵy appaq Hyundai, kóshede aǵylyp júr kólik mundai!..
Kenenniń «Kóksholaǵynyń» maqamymen ándetip kórińiz. Óitkeni, byltyrǵy satylym nátijelerin saraptai tússek, elimizdegi eń tanymal brendterdiń alǵashqy ondyǵyndaǵy pozitsiialar ózgergen. Naryqtaǵy 23,5 paiyz úlesimen birinshi oryndy Hyundai enshilep tur. Kompaniia el azamattaryn 46 725 kólikpen qamtamasyz etti.
Ekinshi orynda 45 807 kólik satqan Chevrolet enshileidi. Úshinshi orynda – Kia, 25 495 kólik saýdalaǵan. Tórtinshi orynda Chery tur, 12 229 kóligin minip júrmiz. Tórkini qytailyq kompaniia saýdasyn bir jyl ishinde 174 paiyzǵa jýyq qyzdyrypty. Besinshi orynda – Toyota, 10 756 kólik. Haval altynshy orynda – 7 558 kólikpen satylymyn tórt (!) esege arttyrǵan.
Jetinshi orynda – Jac avtokólikteri, 7 514 kóligin saýadalaǵan. TOP-10-dyqty Changan, Jetour jáne Exeed túiindeidi, tiisinshe 6 087, 3 930, 3 884 kólik satypty.
– Jabdyqtaý máselesi burynnan bar, naryq baǵytyn ózgertip jatyr. Sonymen qatar qarqyndy ósimdi de baiqaý qiyn emes. 2023 jyly assortiment aitarlyqtai keńeidi jáne naryqqa qatysýshylar arasyndaǵy básekelestik kúsheiip barady.
Keibir oiynshylardyń salonynda kezek paida boldy, alaida jetkizý josparyn túzep úlgerdi jáne osy jylǵa arnalǵan boljamdar anaǵurlym konservativti. Bizdiń sarapshylarymyz naryqtyń ósýi 10-15 paiyzdy quraidy dep boljap otyr, – deidi Qazaqstan avtokólik odaǵynyń prezidenti Anar Maqasheva.
Al endi byltyrǵy Qazaqstandaǵy eń tanymal 10 modeldi tizimdep kórsek, kóshti Chevrolet Cobalt (30 425 birlik) bastap tur. Ekinshi orynda – Hyundai Tucson (14 409 birlik), alǵashqy úshtikte Kia Sportage (10 503 birlik) tur.
Sodan keiin Hyundai Santa Fe (7 433 birlik), Chevrolet Onix (6 000 birlik), Hyundai Elantra (5 975 birlik), Hyundai Sonata (4 770 birlik), Hyundai Bayon (4 740 birlik), Chery Tiggo 7 Pro (4 309 birlik) jáne Chevrolet Nexia (3 958 birlik).
Siz qaisysyn tizgindep júrsiz?
Ashat QOIShYǴARAULY
