Kólik vitse-ministri Sátjan Ablaliev 78 myń dollar kóleminde para aldy degen kúdikpen tergelip jatyr, dep habarlaidy Dalanews.kz.
Aldyn ala boljam boiynsha, sheneýnik álgi aqshany Ulybritaniiadaǵy ulynyń oqýyna jumsaǵan. Tergeýshilerdiń paiymynsha, para respýblikalyq avtojol qurylysyna teh.baqylaý júrgizgen kompaniialarǵa jasalǵan qamqorlyqtyń óteýi retinde berilgen.
Istiń anyq-qanyǵy týraly resmi aqparat jariialanǵan joq. Tergeýdi UQK quramyna ótken jańa jemqorlyqqa qarsy qyzmet júrgizip jatýy múmkin.
Ablaliev jol salasyna eńbegi sińgen belgili maman, tehnika ǵylymdarynyń kandidaty, 30-ǵa tarta ǵylymi jumystyń avtory. «Qurmet» ordeni, «Eren eńbegi úshin» jáne «Táýelsizdikke 25 jyl» medalymen marapattalǵan. «Kólik salasynyń qurmetti qairatkeri» ataǵy jáne bar.
Uzaq jyldar kólik jáne jol qurylysy salasynda laýazymdy qyzmet atqaryp, SQO ákiminiń orynbasary bolǵan. 2023 jyldyń qazan aiynan bastap kólik vitse-ministri qyzmetin atqaryp kelgen.
Qyzmetke kelgesin birqatar bastama kóterip, Qytai men Eýropa arasyndaǵy júk tasymalynyń ýaqytyn qysqartýdy kózdegen. Eldegi myńdaǵan shaqyrym joldyń sapasyn arttyrýǵa arnalǵan jobalardy qolǵa alyp, halyqaralyq standartqa sai jol qaýipsizdigin nyǵaitý baǵdarlamasyn engizýdi josparlaǵan bolatyn.
Ablaliev byltyr otandyq áýe kompaniialary dombyrany ushaq ishinde tasýǵa tyiym salǵan kezde qoǵam synyna ushyraǵan. Ol erejeni qaita qaraýǵa ýáde etken edi.
Qyzyǵy sol, Ablaliev kólik salasy qyzmetkerleriniń kásibi merekesi kúni ustalyp otyr.
