8 sáýir kúni Kókshetaý qalasynda «Ulttyq quryltai sheshimderiniń júzege asýy: qoǵamdyq qatysý jáne baqylaý» taqyrybynda KISI GPS: Gylym. Pikir. Sayasat ulttyq saraptamalyq alańynyń otyrysy ótti, dep habarlaidy Dalanews.kz
Is-shara barysynda Ulttyq quryltai sheshimderin júzege asyrý joldary talqylandy. Azamattyq qoǵamnyń qoǵamdyq qatysý men baqylaýdaǵy róline, sondai-aq memleket pen halyq arasyndaǵy ózara is-qimyl tetikterine erekshe nazar aýdaryldy.
Talqylaýǵa memlekettik organdardyń, saraptamalyq ortalyqtardyń, úkimettik emes uiymdardyń ókilderi, sondai-aq bilim berý, azamattyq qoǵam jáne ózge de salalardaǵy sarapshylar qatysty.
Otyrysqa qatysýshylarǵa onlain formatta Qazaqstan Respýblikasynyń Prezidenti janyndaǵy Qazaqstannyń strategiialyq zertteýler institýtynyń direktory Erkin Tuqymov sóz sóiledi. QSZI basshysy Ulttyq quryltaidyń IV otyrysynyń Býrabaida ótýi óńirlerdiń eldiń ornyqty damýyndaǵy mańyzdy rólin kórsetetinin aityp, Prezidenttiń: «Kúshti óńirler – qýatty el» degen sózderin eske saldy.
E. Tuqymov ótken aptada Ulttyq quryltai bastamalaryn júzege asyrý jospary bekitilgenin atap ótti.
«Bul – júieli ózgeristerge baǵyttalǵan naqty qadam. Alaida onyń tiimdiligi qoǵamnyń belsendi qatysýyna tikelei bailanysty. Azamattardyń sheshim qabyldaýǵa qatysýy ǵana emes, olardy júzege asyrý boiynsha qoǵamdyq baqylaý men monitoring tetikterin damytý da mańyzdy. Búgin biz osy máselelerdi ashyq, kásibi ári syndarly túrde talqylaý úshin jinalyp otyrmyz. Jergilikti deńgeide halyqtyń qatysýyn qalai kúsheitýge bolady? Qoldanystaǵy keri bailanys pen baqylaý quraldarynda qandai kedergiler bar? Azamattyq áleýet aimaq pen búkil eldiń igiligine qalai jumys istei alady?», – dedi QSZI direktory.
QR Prezidenti janyndaǵy QSZI direktorynyń orynbasary Nurlan Saqýov óz sózinde óńirlerdi ortalyqsyzdandyrý jáne olardyń biýdjettik derbestigin arttyrý sońǵy jyldardaǵy óńirlik memlekettik saiasattyń basty baǵyttarynyń biri bolǵanyn atap ótti.
Ol sondai-aq Býrabaida ótken Ulttyq quryltai otyrysynda Memleket basshysy ár óńir úshin ósý núktelerin aiqyndaityn Óńirlik saiasat tujyrymdamasyn ázirleýdi tapsyrǵanyn eske saldy. Atap aitqanda, Aqmola óńiri mektepterdiń jetkiliksizdigi, jol sapasynyń tómendigi jáne jelilerdiń tozýy siiaqty máselelerdi sheshýi qajet.
«Tujyrymdamada salyqtardyń bir bóligin jergilikti deńgeige berý arqyly óńirlerdiń ekonomikalyq jáne biýdjettik derbestigin odan ári arttyrý qarastyrylǵan», – dedi QSZI direktorynyń orynbasary.
Qoǵamdyq baqylaý institýttaryn kúsheitý qajettigine toqtalǵan N. Saqýov máslihattardyń jergilikti biýdjetterdi talqylaý men bekitý úderisindegi mańyzdy rólin atap ótti.
«Meniń oiymsha, máslihattardyń apparattaryn kúsheitip, olardy saraptamalyq resýrstarmen qamtamasyz etý, ásirese biýdjet qabyldaý úderisindegi ashyqtyqty arttyrý qajet. Memleket basshysy usynǵan: «yqpaldy Parlament – esep beretin Úkimet» formýlasyn óńirlik deńgeide de qoldanýǵa bolady. Bul atqarýshy organdardyń jergilikti ókildi organdarǵa esep berýin qamtamasyz etedi», – dedi N. Saqýov.
«AMANAT» partiiasynyń Aqmola oblystyq filialynyń atqarýshy hatshysynyń orynbasary Aqmanat Álimbetova óńirdegi qoǵamdyq monitoringtegi partiia úlesi týraly aityp berdi.
«Qoǵamdyq baqylaý beketteri aiqyndalǵan. Oblystyq filialda sybailas jemqorlyqqa qarsy is-qimyl jónindegi qoǵamdyq keńes jumys isteidi, onyń músheleri de monitoring júrgizedi. Áleýmettik jelilerde halyq ózekti máselelerdi kótergende, partiia belsendileriniń, sarapshylardyń, ÚEU ókilderiniń qatysýymen jedel áreket etý tájiribesi qalyptasty», – dedi A. Álimbetova.
«Aqmola oblysynyń Azamattyq aliansy» zańdy tulǵalar birlestiginiń tóraǵasy Irina Terenteva qoǵamdyq baqylaýdy kásibilendirý qajettigin atap ótti.
«Halyq únine qulaq asatyn memleket» qaǵidatyn júzege asyrý úshin qoǵamdyq belsendilerge tiisti bilim men quzyretter qajet: memlekettik organdarǵa qalai hat joldaý kerek, neni eskerý qajet, qoǵamdyq baqylaý degen ne, ártúrli ÚEU-nyń ókilettikteri qandai? Memleket pen úkimettik emes sektor arasynda ózara qozǵalys bolýy tiis. Ýaqyt óte kele bul azamattyq sektordyń damýyna yqpal etedi. Sonda ǵana qoǵamdyq baqylaýdyń kásibilenýi týraly aita alamyz», – dedi I. Terenteva.
Aqmola oblystyq ardagerler keńesi tóraǵasynyń orynbasary Shiiap Aliev jastardyń áleýetin el damýyna jumyldyrý qajet ekenin aityp, Jumysshy mamandyqtar jyly jariialanǵanyn quptady.
Aqmola oblysynyń kásipkerler quqyǵyn qorǵaý jáne sybailas jemqorlyqqa qarsy is qimyl keńesiniń tóraiymy Valentina Gerashenko salyq reformasyn talqylaýǵa kásipkerlerdi tartý mańyzdy ekenin aitty.
«Búginde biz kásipkerlerdiń keń aýqymyn Palata janyndaǵy jeti salalyq keńestiń jumysyna tartýǵa múddelimiz. Keńester jańa ekonomikalyq saiasat pen salyq reformasyn talqylaý alańyna ainalyp otyr. Bul biznes qaýymdastyǵyna memlekettik organdarmen ózara tiimdi árekettesýge múmkindik beredi. Keńester jumysyna oblys ákiminiń orynbasarlary, aýdan ákimderi men orynbasarlary, oblystyq basqarma basshylary, sot pen prokýratýra ókilderi, Antikorrýptsiialyq qyzmet pen depýtattar qatysady», – dep naqtylady V. Gerashenko.
Aqmola oblysy Tsifrlandyrý jáne arhivter basqarmasynyń «Smart Aqmola» bóliminiń basshysy Gúlim Begalina óz sózinde tsifrlyq saýattylyq pen qaýipsizdik máselelerine toqtalyp, olardyń azamattyq bastamalar men qoǵamdyq baqylaýdyń damýyna áser etetinin aitty.
Talqylaýdy qorytyndylai kele, QSZI direktorynyń orynbasary, alań moderatory Alýa Joldybalina qoǵamdyq monitoring pen baqylaý jobalardyń sapaly oryndalýyn, bastapqy josparǵa sáikestigin jáne biýdjettik qarajattyń tiimdi jumsalýyn baǵalaýǵa múmkindik beretinin atap ótti. KISI GPS alańynyń qatysýshylary bul úderis memleket bastamalaryn baqylaýdy kúsheitýge, problemalardy anyqtaýǵa jáne sheshý joldaryn usynýǵa múmkindik beretinin aitty.
