Kókshetaý áýejaiy jańa menshik iesine berilmek. Qazir nysandy Aqmola oblysynyń kommýnaldyq menshigine ótkizý jumystary júrip jatyr, dep habarlaidy Dalanews.kz Tengrinews.kz-ke silteme jasap.
Qazirgi ýaqytta Kókshetaý qalasynyń áýejaiy Nursultan Nazarbaev halyqaralyq áýejaiy AQ filialy bolyp sanalady. Buǵan deiin Aqmola oblystyq jolaýshylar kóligi jáne avtomobil joldary basqarmasy áýejai Astana ákimdiginiń kommýnaldyq menshiginde ekenin naqtylaǵan.
Astana áýejaiy ókilderiniń málimetinshe, qazir nysandy Aqmola oblysynyń kommýnaldyq menshigine berý rásimi júrgizilip jatyr.
"Osyǵan bailanysty damý strategiiasy, infraqurylymdy jańǵyrtý, marshrýttyq saiasat, áýe kompaniialaryn tartý jáne qarjylyq modelge qatysty máseleler ýákiletti memlekettik organdar men jergilikti atqarýshy organdardyń qatysýymen pysyqtalyp jatyr", – dep habarlady áýejai ókilderi.
Bul máselege qatysty Aqmola oblysy ákimdigi de pikir bildirdi.
"Kókshetaý áýejaiyn Aqmola oblysynyń kommýnaldyq menshigine berý boiynsha jumys júrgizilip jatyr. Alaida ázirge áýejai Astana qalasynyń qaramaǵynda", – dep málimdedi óńir ákimdiginiń baspasóz qyzmeti.
Áýejaidy jańa menshik iesine naqty qashan berý josparlanǵany ázirge aitylǵan joq.
