كوكشەتاۋ اۋەجايى جاڭا مەنشىك يەسىنە بەرىلمەك. ءقازىر نىساندى اقمولا وبلىسىنىڭ كوممۋنالدىق مەنشىگىنە وتكىزۋ جۇمىستارى ءجۇرىپ جاتىر، دەپ حابارلايدى Dalanews.kz Tengrinews.kz-كە سىلتەمە جاساپ.
قازىرگى ۋاقىتتا كوكشەتاۋ قالاسىنىڭ اۋەجايى نۇرسۇلتان نازاربايەۆ حالىقارالىق اۋەجايى اق فيليالى بولىپ سانالادى. بۇعان دەيىن اقمولا وبلىستىق جولاۋشىلار كولىگى جانە اۆتوموبيل جولدارى باسقارماسى اۋەجاي استانا اكىمدىگىنىڭ كوممۋنالدىق مەنشىگىندە ەكەنىن ناقتىلاعان.
استانا اۋەجايى وكىلدەرىنىڭ مالىمەتىنشە، ءقازىر نىساندى اقمولا وبلىسىنىڭ كوممۋنالدىق مەنشىگىنە بەرۋ ءراسىمى جۇرگىزىلىپ جاتىر.
"وسىعان بايلانىستى دامۋ ستراتەگياسى، ينفراقۇرىلىمدى جاڭعىرتۋ، مارشرۋتتىق ساياسات، اۋە كومپانيالارىن تارتۋ جانە قارجىلىق مودەلگە قاتىستى ماسەلەلەر ۋاكىلەتتى مەملەكەتتىك ورگاندار مەن جەرگىلىكتى اتقارۋشى ورگانداردىڭ قاتىسۋىمەن پىسىقتالىپ جاتىر"، – دەپ حابارلادى اۋەجاي وكىلدەرى.
بۇل ماسەلەگە قاتىستى اقمولا وبلىسى اكىمدىگى دە پىكىر ءبىلدىردى.
"كوكشەتاۋ اۋەجايىن اقمولا وبلىسىنىڭ كوممۋنالدىق مەنشىگىنە بەرۋ بويىنشا جۇمىس جۇرگىزىلىپ جاتىر. الايدا ازىرگە اۋەجاي استانا قالاسىنىڭ قاراماعىندا"، – دەپ مالىمدەدى ءوڭىر اكىمدىگىنىڭ باسپا ءسوز قىزمەتى.
اۋەجايدى جاڭا مەنشىك يەسىنە ناقتى قاشان بەرۋ جوسپارلانعانى ازىرگە ايتىلعان جوق.
