SHQO ákimi Danıal Ahmetov Kókpekti aýdanynyń ákimi Serikqazy Sádýaqasovtyń 2020 jyly Kókpekti aýdanynyń áleýmettik-ekonomıkalyq damý qorytyndysy jáne 2021 jylda atqarylatyn jumystary týraly baıandamasyn tyńdady.
Jıynǵa qazirgi epıdemıologıalyq jaǵdaıǵa baılanysty aýdannyń turǵyndary onlaın formatta qatysty.
Ótken jyly Kókpekti aýdanynyń jergilikti atqarýshy organdarynyń jumysy memlekettik baǵdarlamalardy tıimdi júzege asyrýǵa baǵyttaldy. Nátıjesinde 2020 jyldyń qorytyndysy boıynsha Kókpekti aýdanynda áleýmettik-ekonomıkalyq damýdyń negizgi kórsetkishteriniń oń serpini baıqaldy.
Birneshe jyl boıy aýdan kóleminde sheshimin tappaı kele jatqan máselelerdiń biri Tassaı aýylyna kire beris jol bolǵan bolatyn.
Ótken jyly «Óńirlerdi damytý 2025» memlekettik baǵdarlamasy aıasynda smetalyq quny 275,4 mln teńge quraıtyn «Tassaı aýylyna kire beris» avtomobıl jolyna ortasha jóndeý jumystary júrgizildi. Sonymen qatar, «Aýyl – El besigi» jobasynyń aıasynda 2020 jyly Kókpekti aýylynyń kóshelerine 158 mln teńge quraıtyn ortasha jóndeý jumystary júrgizildi. Al, "Óńirlerdi damytý 2020-2025" memlekettik baǵdarlamasy aıasynda Kókpekti aýdanynda 14 joba boıynsha jumystar jýrgizilýde.
- Ótken jyly oblys ákiminiń bastamasymen kópbalaly jáne az qamtylǵan otbasylarǵa úı salý baǵdarlamasy bizdiń aýdanymyzda sátti júzege asyryldy. 20 eki páterli jeke turǵyn úıdiń qurylysy tolyǵymen aıaqtaldy. Olar kópbalaly jáne az qamtylǵan otbasylarǵa kezektilik tártibimen taratyldy. Jalpy aýdan boıynsha 2,7 ese ósimmen 10 159 sharshy metr turǵyn úı paıdalanýǵa berildi, - dedi aýdan ákimi Serikqazy Sádýaqasov.
Bıyl Samar aýylynda kópbalaly jáne az qamtylǵan otbasylar úshin 10 eki páterli jeke turǵyn úı boı kóteredi. Sondaı-aq, atalǵan aýylda ornalasqan 5 qabatty 60 páterli úıge kúrdeli jóndeý júrgiziledi.
- Qurmetti Danıal Kenjetaıuly, oblystyń kópbalaly jáne az qamtylǵan otbasylaryna jasap jatqan jaqsylyǵyńyz úshin alǵys aıtamyn. Men ótken jyly kópbalaly ana retinde kezekpen baspanaǵa ıe boldym. Kóp jyldar boıy ańsaǵan armanym oryndalyp, otbasymyzben máz-meıram boldyq. Jalpy, bizdiń aýdanymyzda turǵyn úı qurylysy qarqyndy júrip jatyr. Úıler óte jaıly, keń, - dedi kópbalaly ana Madına Qojahmetova.
Ótken jyldyń qorytyndysy boıynsha Kókpekti aýdanyn taza aýyz sýmen qamtý 18 paıyzǵa ósti. Búgingi tańda 35 aýyldyq eldi meken taza aýyz sýmen qamtamyz etilgen, bul jalpy kórsetkishtiń 70 %.
– Kókpekti aýdanynda ótken jyly aýqymdy jumystar atqarylǵan. Turǵyn úımen qamtamasyz etý kórsetkishi joǵary. Jol qurylysy da oń sheshimin taýyp keledi. Aǵymdaǵy jyly jol jóndeýge 160 mln. bólinip otyr. Bul máseleni taǵy qarastyramyz, kerek bolsa taǵy bólemiz. Sonymen qosa, Samar aýylynda jańa sport kesheni salynady. Jalpy, bıyl oblys boıynsha «Jumyspen qamtý jol kartasy» aıasynda 22,4 mlrd. teńge ıgeriledi. 14 áleýmettik sala, 33 turǵyn úı-kommýnaldyq sharýashylyq jáne ınjenerlik-kóliktik ınfraqurylym nysandary salynady, - dep qorytyndylady aımaq basshysy Danıal Ahmetov.
