QR Ulttyq Banki men ekinshi deńgeili bankter 2025 jyldyń birinshi jartyjyldyǵynda 465 150 teńgeniń 93 jalǵan banknota men úsh monetany anyqtady. Ulttyq Banktiń baspasóz qyzmeti, kóbine 5 000 teńgelik nominal qoldan jasalǵanyn naqtylaidy, dep habarlaidy Dalanews.kz.
"5 000 teńgelik 85 dana banknota jalpy tárkilengen aqshalardyń 88,5%-yn qurady. Odan keiin 5 dana (5,2%) – 2 000 teńgelik nominalǵa, 3 dana (3,1%) – nominaly 10 000 teńgelik banknotalarǵa, qalǵan 3,2% – monetalarǵa tiesili", delingen habarlamada.
Ulttyq Bank shynaiy banknotalardy qoldan jasalǵan aqshadan óz betinshe ajyratýǵa kómektesetin qarapaiym erejelerdi eske salady:
Sýret: QR Ulttyq Banktiń baspasóz qyzmeti
- Jalǵan banknotalar, ádette, kádimgi ofsettik qaǵazǵa túrli tústi printer arqyly jáne kompiýterlik tehnikanyń kómegimen jasalady.
- Mikrotekster bulyńǵyr keledi jáne ulǵaitqan saiyn anyqtyǵyn joǵaltady.
- Jalǵan banknotada sýtamǵy belgisi joq.
- Patch elementiniń kólemdi beinesi joq jáne kádimgi boiaýmen basylǵan, kún belgisi sáýlesiniń jan-jaqqa shashyraǵan golografiialyq áseri men nominaldyń tsifrlyq keskininen oiý-órnekke aýysý áseri bolmaidy.
- Qorǵanysh jibi dinamikalyq jáne túsin ózgerte alatyn áserden ada, ári jaryqqa tosyp qaraǵanda tutastyǵy baiqalmaidy.
Sýret: QR Ulttyq Banktiń baspasóz qyzmeti
Shynaiy banknotalarda kózben qarap jáne qolmen ustap anyqtaýǵa bolatyn birneshe qorǵanysh belgileri bar. Ol belgilermen Ulttyq Banktiń resmi saitynda tanysýǵa bolady.
"QR Ulttyq Banki banknotalardy qoldan jasaýǵa jol bermeý úshin turaqty túrde jumys júrgizip keledi jáne azamattardy qolma-qol aqshany paidalanǵan kezde muqiiat ári saq bolýǵa shaqyrady. Eger shynaiy aqsha belgilerine uqsas kúmándi banknotalar kezigetin bolsa, dereý quqyq qorǵaý organdaryna júgingen jón", delingen habarlamada.
