Álemge áigili Frankfýrt kitap jármeńkesiniń ókilderi almatylyq kitaphanalarmen, baspalarmen jáne jazýshylarmen yntymaqtastyq ornatýǵa qyzyǵýshylyq tanytty, – dep habarlaidy Dalanews.kz Almaty qalasy ákiminiń baspasóz qyzmetine silteme jasap.
Almaty qalasynyń ákimi Erbolat Dosaev Frankfurter Buchmesse prezidenti jáne atqarýshy direktory Iýrgen Boosty qabyldady.
Kezdesý barysynda Frankfýrt tarapy Almatynyń kópultty qala retindegi biregeiligin atap ótip, uzaq merzimdi áriptestik qarym-qatynas ornatýǵa niet bildirdi. Óz kezeginde Erbolat Dosaev ákimdik tarapynan kitaphanalardy jańǵyrtýǵa jáne zamanaýi qoǵamdyq keńistikter qurýǵa erekshe kóńil bólinetinin aitty. Sondai-aq Almaty qalasynyń kitaphanalarynda tabysty engizilgen innovatsiialyq jáne kreativti sheshimder týraly baiandady.
«Elektrondy kitaptardy paidalaný úrdisiniń artýyna qaramastan, baspa kitaptaryn oqý sezimin, qaǵaz betterin ustap kórý áserin eshteńe almastyra almaitynyna senimdimin. Kitaphanalardyń belsendiliginen bizdiń turǵyndarymyzdyń kitapty óte jaqsy kóretinin baiqaimyz, biz bul baǵytta belsendi jumys istep jatyrmyz. Búginde qalamyzdaǵy kitaphanalardyń 95%-y jańǵyrtyldy. Biz barlyq aýdanda zamanaýi kitaphanalar ashyp, halyq kóp jinalatyn jerlerde – saýda jáne oiyn-saýyq ortalyqtarynda, komiýniti ortalyqtarynda jáne basqa oryndarda avtonomdy kitaphanalar ornatyp jatyrmyz. Sonymen qatar, jazýshylar men zamanaýi avtorlardy qoldaimyz», – dedi Almaty ákimi Erbolat Dosaev.
Frankfýrt kitap jármeńkesiniń prezidenti jáne atqarýshy direktory Iýrgen Boos Almatyda jergilikti avtorlar men baspalarǵa arnalǵan seminarlar ótkizýge, sondai-aq aýqymdy kitap is-sharalaryn uiymdastyrýda keńes berýge daiyn ekenin bildirdi.
«Biz Qazaqstanǵa arnaiy keldik. Almatymen bailanys jasap, yntymaqtastyq ornatý biz úshin mańyzdy. Biz tek jármeńkeler ótkizýmen shektelmei, baspa isin de damytamyz. Men baspa salasy úlken ózgeristerdi qajet etedi dep sanaimyn jáne osy salada tájiribe almasýǵa daiynbyz. Buǵan deiin biz Meksikada, Ońtústik Afrika Respýblikasynda jáne BAÁ-de ótken kitap jármeńkeleriniń uiymdastyrýshylaryn keńes berip qoldadyq. Iaǵni, bul salada mol tájiribemiz bar. Sondai-aq, Qazaqstandy Frankfýrt kitap jármeńkesiniń qurmetti qonaǵy bolýǵa shaqyrǵymyz keledi», – dedi Iýrgen Boos.
Kezdesý sońynda taraptar 2025 jyly Almatyda birlesken jobalardy damytý jáne mádeni-iskerlik bailanystardy nyǵaitý týraly ýaǵdalasty.
