Belgili qoǵam qairatkeri Nurtóre Júsip kitaptyń adam ómirindegi róline toqtalyp, bilim men úzdiksiz izdenistiń tabysqa jetkizetin basty faktorlardyń biri ekenin aitty, dep habarlaidy dalanews.kz.
Onyń pikirinshe, kitap oqý arqyly adam tek bilim alyp qana qoimai, dúnietanymyn keńeitip, ómirge degen kózqarasyn qalyptastyrady.
Ol «Kitap oqyp jetistikke jetken adamdy kórsetińizshi?» degen suraqqa Qazaqstan Prezidenti Qasym-Jomart Toqaevty mysal retinde keltirdi.
Nurtóre Júsiptiń aitýynsha, Memleket basshysy ziialy otbasynda tárbielenip, bala kezinen kitapqa jaqyn bolyp ósti. Ákesi – belgili jazýshy Kemel Toqaevtyń tálimi men kitapqa degen qurmeti Prezidenttiń tulǵa bolyp qalyptasýyna airyqsha áser etken.
«Kitap oqyp jetistikke jetken adamdy kórsetińizshi deseńiz, Prezidentti aitýǵa bolady. Ol jazýshynyń otbasynda tárbielenip ósti. Kóp oqydy, bilimge erekshe kóńil bóldi»,-dedi ol.
Onyń sózinshe, búginde Qasym-Jomart Toqaevtyń halyqaralyq deńgeidegi bedeli men diplomatiialyq tájiribesiniń negizinde de úzdiksiz oqý men bilimge degen qushtarlyq jatyr.
«Qazir ol qytailarmen qytai tilinde, aǵylshyndarmen aǵylshyn tilinde, frantsýzdarmen frantsýz tilinde, kórshi memleketterdiń basshylarymen orys tilinde erkin sóilese alatyn diplomat. Bul – bir kúnde kelgen nátije emes», – dedi Nurtóre Júsip.
Qoǵam qairatkeri kitaptyń adamdy birden ózgertpeitinin, biraq turaqty túrde kitap oqityn adamnyń oilaý júiesi, sózdik qory men dúnietanymy ýaqyt óte kele múlde basqa deńgeige kóteriletinin atap ótti.
«Kitap oqý adamdy bir kúnde ózgertpeidi. Biraq kún saiyn oqylǵan kitap adamnyń oi-órisin keńeitedi, til bailyǵyn arttyrady. Aqyrynda sol bilim men izdenis úlken jetistikterge bastaidy», – dedi ol.
Nurtóre Júsiptiń pikirinshe, qazirgi qoǵamda kitap oqý mádenietin damytý erekshe mańyzdy. Sebebi bilimge umtylǵan, únemi izdeniste júretin adam ǵana zaman talabyna beiimdelip, óziniń de, eliniń de damýyna úles qosa alady. Onyń aitýynsha, kitap – adamdy jańa múmkindikterge jeteleitin, tulǵa retinde qalyptastyratyn eń senimdi rýhani qazyna.
