18 mamyrda Atyraý sotynda Jangeldin aýylynda bir otbasynyń ólimine qatysty rezonansty istiń mán-jaiy aityldy. Qaiǵyly oqiǵa saldarynan erli-zaiypty men olardyń eresek eki balasy qaza tapqan. Qylmystyń mán-jaiyn aldyn ala sot tyńdaýy kezinde memlekettik aiyptaýshy oqydy, dep habarlaidy dalanews.kz.
Aiyptaý tarapynyń nusqasy boiynsha, sottalýshy Sultan Sársemaliev barlyq epizod kezinde bir ǵana asúi pyshaǵyn qoldanǵan. Is materialdaryna sáikes, ol pyshaqty ózimen birge alyp júrgen jáne otbasynyń birneshe múshesine shabýyl jasaǵan kezde paidalanǵan.
Atap aitqanda, sotta Sultan Sársemalievtiń burynǵy jubaiynyń ápkesi Miramgúl Qarabalinanyń ólimine qatysty derekter jariialandy. Sotta aitylǵandai, Miramgúl sińlisine qonaqqa kelgen kezde onyń turmys jaǵdaiyna kóńili tolmaǵanyn bildirgen. Úide azyq-túliktiń joqtyǵy jáne baspananyń jai-kúii onyń narazylyǵyn týǵyzǵan. Tergeý nusqasy boiynsha, dál osy sózder Sársemalievtiń ashýyn keltirgen.
"Osy sátte Miramgúl Qarabalinanyń turmystyq jáne materialdyq jaǵdaiǵa qatysty aitqan sózderi Sultan Sársemalievtiń ashýyn týdyrǵan", – delingen aiyptaý aktisinde.
Aiyptaý dereginshe, ol qylmystyq oiyn júzege asyrý úshin asúidegi tońazytqyshtyń ústinde turǵan pyshaqty alǵan. Tergeý málimetine sáikes, bul pyshaq buǵan deiingi kisi óltirý oqiǵalarynda da qoldanylǵan jáne ony sottalýshy Qyzylqoǵa aýdanynan alyp kelgen. Sársemaliev burynǵy áieliniń ápkesine keýde, arqa jáne ish tusynan birneshe ret pyshaq suqqan.
"Miramgúl Qarabalina alǵan jaraqattarynan edenge qulaǵan kezde, onyń turmystyq jáne materialdyq jaǵdaiǵa qatysty aitqan sózderinen keiin sottalýshyda ony asa qatygezdikpen óltirý nieti paida bolǵan", – delingen aiyptaý aktisinde.
Osydan keiin ol jerde jatqan áielge taǵy da birneshe ret pyshaq suqqan. Aiyptaý aktisinde soqqylardyń keýde, ish, qol jáne bet tusyna jasalǵany aitylǵan.
Is materialdaryna sáikes, Miramgúl Qarabalinanyń qaitys bolǵanyna kóz jetkizgennen keiin Sársemaliev onyń denesin kilemge orap, úidiń kireberisindegi bólmege alyp shyqqan.
Tergeý nusqasy boiynsha, qylmystyń izin jasyrý úshin ol áieldiń denesin buǵan deiin onyń aǵasy Naýryz Muqanǵalievtiń denesi jasyrylǵan shuńqyrǵa kómýge sheshim qabyldaǵan.
"Sol kúni shamamen saǵat 21:00-de ol aýlaǵa shyǵyp, buryn kómilgen shuńqyrdyń shamamen 30 santimetr bóligin qaita qazǵan. Keiin kilemge oralǵan deneni sol jerge aparyp, shuńqyrǵa tastaǵan. Sodan soń shuńqyrdy tolyqtai kómip, denelerdi jasyrǵan", – dedi prokýror.
