Propagandist Solovevke suhbat bergen Jirinovskii túrikterdiń aptyǵyn (ambitsiiasyn) basýdyń amalyn biletinin aityp bósken eken. Kremldi attap-buttap ótip, astamshylyq jasar bolsa Erdoǵannyń eki aiaǵyn bir etikke tyǵamyz dep ózeýrepti.
Muny absýrd deiin desek, Máskeý oiyndaǵy dúnieni "Jiriktiń" aýzymen aitqyzyp úirengen. Ankaranyń geosaiasi belsendiligi, onyń ishinde Orta Aziiaǵa dendep enýi Kremldi asa qatty alańdatyp otyrǵanyn ańǵarýǵa bolady.
“Bizdiń qolymyzdaǵy eń joiqyn qarý - kúrdter! Sovet úkimeti kezinde de solai edi, álige deiin aktýaldyǵyn joǵaltqan joq. Erdoǵan sózge qulaq aspai, syńarezýlep, tym-tym erkinsi bastasa Iranmen odaq quramyz da, kúrdterdiń qolyna qarý ustatamyz”.
Sói degen Jirinovskii Irannyń óz ishinde qara ormandai qalyń ázirbaijan diasporasy turatynyn umytyp ketse kerek.
Budan buryn Dalanews.kz-ke pikir bildirgen Kreml ideology Gevorg Mirzaian:
“Túrkiia qajet dep tapsa Irandaǵy qalyń orman ázirbaijandardy dúr kóterip, Tegerendy áp-sátte sabasyna túsiredi. Iran mundai stsenariiden qaýip kútedi, sondyqtan Ankaraǵa qarsy shyǵýdan qaimyǵady”, – degen.
…
Al Jirinovskii bolsa kúrdterdiń abaqtyda jatqan kósemi Abdýlla Odjalandy bosatyp alýdy josparlap júr. “Berse qolynan, bermese jolynan” dep jalanyp otyr.
“Odjalan? Ol bostandyqqa shyǵý tiis. Oǵan azattyq áperýimiz kerek. Kezinde nemis batalony abaqtyda jatqan Mýssolindi bosatyp alǵan edi. Bizdiń olardyń qai jerimiz kem? Arnaiy operatsiia ázirleý qajet. Imralyǵa (kúrd separatisi qamaýda otyrǵan araldyń aty, red.) jaqyn kelip, Odjalandy túrikterdiń qolynan sýyryp alamyz. Alyp qashqannan keiin Resei emes, Armeniiada boi tasalai tursyn. Sol aradan qol jinap, Túrkiiada topalań týǵyzýdyń josparyn jasaityn bolady”, – deidi Jirinovskii.
...
Túrkiia Reseimen amal dos. Eýroodaqqa kire almai júrgen Ankara Kremlmen amal joqtyqtan aralasýǵa májbúr. Onyń bir sebebi - týrizm.
Týrizm demekshi, túrikshe jaqsy biletin Jirinovskiidi túrik saiasatkerleri taqyrǵa otyrǵyzyp ketipti.
2010 jyly Máskeýge is-saparmen kelgen sol tustaǵy Túrkiianyń Syrtqy ister ministri Máýlit Chavýshoǵly Jirinovskiidiń kabinetine de bas suǵady.
“Ekeýimiz túrikshe pikirlestik. Dám-tuzymyz jarasa ketti. Túrikshe sóilegen maǵan riza boldy. Túrkiiaǵa kelip, aýnap-qýnap qaitýǵa shaqyrdy. "Jol-puldy ózimiz kóteremiz. As-sýyńyz, araq-sharabyńyz bizden bolady" dedi. Kádimgidei marqaiyp qaldym. Sodan beri on jyl ótti. Jym-jylas joǵaldy. Shaqyrý turmaq, máseleniń mán-jaiyn túsindirip, qońyraý shalýdy qiynsyndy" – deidi túrikterge degen kijinýdiń túp-tórkini qaida jatqanyn ańǵartyp qoiǵan Jirinovskii.
…
Resei saiasatkeriniń Túrkiiaǵa, túrikterge til tigizýi bul bir emes. 2015 jyly eki eldiń arasynda “ushaq daǵdarysy” týyndaǵan shaqta Jirinovskii Stambuldyń tóbesinen atam bombasyn tastai salýdy usynǵan.
Jastaý kezinde Túrkiianyń Bandyrma qalasynda kommýnistik ideologiianyń úgit-nasihatyn júrgizgeni úshin isti bolǵan.
Ázirlegen, Dýman BYQAI
