پروپاگانديست سولوۆيەۆكە سۇحبات بەرگەن جيرينوۆسكيي تۇرىكتەردىڭ اپتىعىن (امبيسياسىن) باسۋدىڭ امالىن بىلەتىنىن ايتىپ بوسكەن ەكەن. كرەملدى اتتاپ-بۇتتاپ ءوتىپ، استامشىلىق جاسار بولسا ەردوعاننىڭ ەكى اياعىن ءبىر ەتىككە تىعامىز دەپ وزەۋرەپتى.
مۇنى ابسۋرد دەيىن دەسەك، ماسكەۋ ويىنداعى دۇنيەنى "جيريكتىڭ" اۋزىمەن ايتقىزىپ ۇيرەنگەن. انكارانىڭ گەوساياسي بەلسەندىلىگى، ونىڭ ىشىندە ورتا ازياعا دەندەپ ەنۋى كرەملدى اسا قاتتى الاڭداتىپ وتىرعانىن اڭعارۋعا بولادى.
“ءبىزدىڭ قولىمىزداعى ەڭ جويقىن قارۋ - كۇردتەر! سوۆەت ۇكىمەتى كەزىندە دە سولاي ەدى، الىگە دەيىن اكتۋالدىعىن جوعالتقان جوق. ەردوعان سوزگە قۇلاق اسپاي، سىڭارەزۋلەپ، تىم-تىم ەركىنسي باستاسا يرانمەن وداق قۇرامىز دا، كۇردتەردىڭ قولىنا قارۋ ۇستاتامىز”.
ءسوي دەگەن جيرينوۆسكيي يراننىڭ ءوز ىشىندە قارا ورمانداي قالىڭ ءازىربايجان دياسپوراسى تۇراتىنىن ۇمىتىپ كەتسە كەرەك.
بۇدان بۇرىن Dalanews.kz-كە پىكىر بىلدىرگەن كرەمل يدەولوگى گيەۆورگ ميرزايان:
“تۇركيا قاجەت دەپ تاپسا يرانداعى قالىڭ ورمان ءازىربايجانداردى ءدۇر كوتەرىپ، تەگەرەندى اپ-ساتتە ساباسىنا تۇسىرەدى. يران مۇنداي سەنارييدەن ءقاۋىپ كۇتەدى، سوندىقتان انكاراعا قارسى شىعۋدان قايمىعادى”، – دەگەن.
…
ال جيرينوۆسكيي بولسا كۇردتەردىڭ اباقتىدا جاتقان كوسەمى ابدۋللا ودجالاندى بوساتىپ الۋدى جوسپارلاپ ءجۇر. “بەرسە قولىنان، بەرمەسە جولىنان” دەپ جالانىپ وتىر.
“ودجالان؟ ول بوستاندىققا شىعۋ ءتيىس. وعان ازاتتىق اپەرۋىمىز كەرەك. كەزىندە نەمىس باتالونى اباقتىدا جاتقان ءمۋسسوليندى بوساتىپ العان ەدى. ءبىزدىڭ ولاردىڭ قاي جەرىمىز كەم؟ ارنايى وپەراسيا ازىرلەۋ قاجەت. يمرالىعا (كۇرد سەپاراتيسى قاماۋدا وتىرعان ارالدىڭ اتى، رەد.) جاقىن كەلىپ، ودجالاندى تۇرىكتەردىڭ قولىنان سۋىرىپ الامىز. الىپ قاشقاننان كەيىن رەسەي ەمەس، ارمەنيادا بوي تاسالاي تۇرسىن. سول ارادان قول جيناپ، تۇركيادا توپالاڭ تۋعىزۋدىڭ جوسپارىن جاسايتىن بولادى”، – دەيدى جيرينوۆسكيي.
...
تۇركيا رەسەيمەن امال دوس. ەۋرووداققا كىرە الماي جۇرگەن انكارا كرەملمەن امال جوقتىقتان ارالاسۋعا ءماجبۇر. ونىڭ ءبىر سەبەبى - تۋريزم.
تۋريزم دەمەكشى، تۇرىكشە جاقسى بىلەتىن جيرينوۆسكييدى تۇرىك ساياساتكەرلەرى تاقىرعا وتىرعىزىپ كەتىپتى.
2010 جىلى ماسكەۋگە ىس-ساپارمەن كەلگەن سول تۇستاعى تۇركيانىڭ سىرتقى ىستەر ءمينيسترى ءماۋلىت چاۆۋشوعلى جيرينوۆسكييدىڭ كابينەتىنە دە باس سۇعادى.
“ەكەۋىمىز تۇرىكشە پىكىرلەستىك. ءدام-تۇزىمىز جاراسا كەتتى. تۇرىكشە سويلەگەن ماعان ريزا بولدى. تۇركياعا كەلىپ، اۋناپ-قۋناپ قايتۋعا شاقىردى. "جول-پۇلدى ءوزىمىز كوتەرەمىز. اس-سۋىڭىز، اراق-شارابىڭىز بىزدەن بولادى" دەدى. كادىمگىدەي مارقايىپ قالدىم. سودان بەرى ون جىل ءوتتى. جىم-جىلاس جوعالدى. شاقىرۋ تۇرماق، ماسەلەنىڭ ءمان-جايىن ءتۇسىندىرىپ، قوڭىراۋ شالۋدى قيىنسىندى" – دەيدى تۇرىكتەرگە دەگەن كىجىنۋدىڭ تۇپ-توركىنى قايدا جاتقانىن اڭعارتىپ قويعان جيرينوۆسكيي.
…
رەسەي ساياساتكەرىنىڭ تۇركياعا، تۇرىكتەرگە ءتىل تيگىزۋى بۇل ءبىر ەمەس. 2015 جىلى ەكى ەلدىڭ اراسىندا “ۇشاق داعدارىسى” تۋىنداعان شاقتا جيرينوۆسكيي ستامبۇلدىڭ توبەسىنەن اتام بومباسىن تاستاي سالۋدى ۇسىنعان.
جاستاۋ كەزىندە تۇركيانىڭ باندىرما قالاسىندا كوممۋنيستىك يدەولوگيانىڭ ۇگىت-ناسيحاتىن جۇرگىزگەنى ءۇشىن ءىستى بولعان.
ازىرلەگەن، دۋمان بىقاي
