Kentaý qalasynda 2024 jyldyń 9 aıynda ónerkásip óniminiń kólemi 37,1 mlrd teńgeni quraǵan. Sondaı-aq, óńdeý ónerkásibinde 32,4 mlrd teńgeniń ónimi óndirilse, aýylsharýashylyǵy salasyndaǵy jalpy ónim kólemi 9,1 mlrd teńgege jetken. Jalpy ónerkásip salasynda aǵymdaǵy jyldyń 9 aıynda ınvestısıalyq quny 859 mln teńgeni quraıtyn 3 joba júzege asqan. Bul jaıynda Kentaý qalasynyń ákimi Jandos Tasov BAQ ókilderimen ótken brıfıńte málimdedi, dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
«Kentaýda ónerkásip salasyn damytý boıynsha jyl sońyna deıin taǵy 4 joba ashý josparlanýda. Olardyń ınvestısıalyq quny 1 mlrd 791 mln teńgeni qurap otyr. Bul tizimde quny 1,5 mlrd teńgelik «Kentaý Red Star» JSHS-ń qysh óndiretin zaýyty da bar. Jylyna 45 mln dana qysh shyǵarýǵa qaýqarly óndiris orny 10 adamdy turaqty jumyspen qamtymaq. Sonymen qatar, óńirdegi ındýstrıaldy aımaqta «Haltaev» JK metal tor men qurylys bloktaryn shyǵarý zaýyty iske qosýdy josparlap otyr. Atalǵan joba arqyly taǵy da 10 adam turaqty jumyspen qamtylyp, jylyna 50 myń dana blok pen 1 000 metal tor óndirilmek»- dedi óńir basshysy.
Sondaı-aq, Kentaý qalasyndaǵy ınfraqurylym salasynda da oń ózgerister jeterlik. Máselen, qala aýmaǵynda eldi mekender 100% aýyz sýmen qamtylǵan. Sonymen qatar, jyl basynan beri elektr jelilerin jańartý maqsatynda 7 dana transformator aýystyrylyp, 15,3 shaqyrym jelini qaıta qurý jumystary júrgizilýde. Budan bólek, jyl sońyna deıin turǵyndardy tabıǵı gazben qamtý kórsetkishin 93%-ǵa jetkizý josparlanǵan. Toǵyz aıdyń qorytyndysymen 18 000 abonenttiń 14 981-i, ıaǵnı 83%-y tabıǵı gaz júıesine qosyldy. Óńirdegi jol máselesi de ońtaıly sheshimin taýyp keledi. Búginde Kentaý qalasy jáne oǵan qarasty aýyldardaǵy 365 shaqyrym kósheniń 82,1%-y qanaǵattanarlyq jaǵdaıda. Jyl sońynda bul kórsetkishti 87,7 %-ǵa jetkizý kózdelgen.
Sonymen qatar, óńirdegi turǵyn úı máselesi de kún tártibinen túsken emes. Búginde qalada 5 117 azamat baspana kezegine tirkelgen. Qazirgi tańda atalǵan máseleni sheshý maqsatynda 60 páterli 5 qabatty turǵyn úıdiń jáne 30 páterlik 2 turǵyn úıdiń qurylysy júrgizilýde.
