“Qalanyń kósegesin kógertip otyrǵan osy zaýyt”, – deıdi jergilikti jurt. Myńnan astam adamdy jumyspen qamtyǵany óz aldyna, qala búdjetiniń 70 paıyzy zaýyt tólegen salyqtan quralady.
«Byltyrǵy jyldyń 8 aıynda ǵana transformator zaýyty 12 mlrd. teńgeniń ónimin óndirdi. Bul 2016 jyldyń dál osy aralyqtaǵy kórsetkishinen 50 paıyzǵa artyq», – dedi bizge KTZ tehnıkalyq dırektory Nurbol Tilemisov.
Transformatordyń kókesin de osy aradan kórdik. Bir ǵana byltyrǵy jyly zaýyt – elektrli motor, generator, transformatorlardy qosa alǵanda 10 988 dana ónim óndiripti.
Bıliktiń bıznes ókilderine qarata «sheteldik naryqqa shyǵyńdarshy» degen ótinishin jerge qaldyrmaı, is júzinde oryndaǵan – osy Kentaý zaýyty. Ónimdi eksporttaýdy transformator zaýyty Dosaevtyń sózinen kóp buryn bastap ketken. Óndirgen óniminiń 40 paıyzyn Reseıge, Qyrǵyzstanǵa, Ózbekstan men Tájikstanǵa eksporttaýda qazirgi tańda.
Munymen shektelmek emes. Bıylǵy jyly kásiporyn Aýǵanstan naryǵyna kirdi. Jyl aıaǵyna deıin Kentaý zaýyty aýǵan naryǵyna jalpy quny 10 mln. dollardyń transformatorlaryn tasymaldap tastamaq.
«Osyǵan oraı Aýǵanstanǵa arnalǵan transformatorlardyń jańa túrin ázirledik. Bul eldiń elektr energıasynyń zamanaýı júıesine kóshkeni keshe ǵana. Sol sebepti olarǵa transformatorlardyń jańa túrlerin jetkizetin bolamyz, – deıdi zaýyttyń satý bóliminiń dırektory Muhtar Kenjebekov.
