Májilis depýtaty Murat Ábenov uzaq ýaqyt boiy para alyp kelgen sheneýnikterdiń jasyryn bailyǵyn memleket menshigine qaitarý máselesin kóterdi. Bul týraly ol Májilis otyrysynda aityp, Qarjylyq monitoring agenttigine birqatar naqty suraq qoidy, dep habarlaidy Dalanews.kz.
"Sońǵy kezderi qoǵamda bir mańyzdy másele jii talqylanyp júr. Men bul taqyrypta birneshe maqala jariialadym. Sóz bolyp otyrǵany – keńeitilgen konfiskatsiia týraly bastama. Ony qoǵam qoldap otyr. Sebebi qazirgi júiede bireý vagondap urlap, sonyń tek bir qapshyq bóligin ǵana qaitarady da, qalǵanyn jymqyryp qalady. Al endi bir adam az ǵana kólemde urlap, tutqyndalyp ketedi. Bul ádiletsizdik.
Sondyqtan "keńeitilgen konfiskatsiia" degen tetikti zańdastyrý qajet. Mysaly, sheneýnik jyldar boiy para alyp kelgen delik. Tek ustalǵan sáttegi aqshasyn ǵana memleketke qaitarady. Al qalǵan $10 mln úiinde jata beredi, týǵan-týystarynyń atyna jazylǵan. Mundai jaǵdaida, sheneýniktiń búkil zańsyz bailyǵyn memleket menshigine qaitarý kerek. Bul norma zań jobasyna ene me?" – dedi Murat Ábenov.
Depýtat dropperler máselesin de kóterdi. Iaǵni alaiaqtardyń shotyna kezdeisoq nemese májbúrli túrde aqsha aýdaryp, keiin ózi zardap shegetin deldal azamattar týraly.
“Alaiaqtardyń qolyna túsken aqshany qaitara almai otyrmyz. Ulttyq bank bul qarajattyń júiede turǵanyn aitady. Sonda nege qaitarylmaidy? Qarapaiym halyq zardap shegip jatyr”, – dedi ol.
Sonymen qatar Murat Ábenov kriptovaliýta birjalarynyń áreketine de nazar aýdardy. Onyń aitýynsha, zeinetke shyqqan meditsina qyzmetkeri Halyq bank kartasy arqyly belgisiz “Monpay” atty kriptobirjaǵa on shaqty tranzaktsiia jasaǵan. Bul — alaiaqtyqqa keń jol ashatyn alań.
“Bank dep kórsetip tur: aqsha qaida ketkeni belgili. Biraq bul kriptobirjaǵa nege tosqaýyl qoiylmaidy? Nege ony toqtatpaimyz?”, – dep ashyna aitty depýtat.
Májilismenniń bul saýaldaryna Qarjylyq monitoring agenttigi tóraǵasynyń orynbasary Jeńis Elemesov jaýap berdi.
“Iá, dropperlikpen kúresti kúsheitý kerek. Bul baǵyttaǵy zań jobasyna sáikes, endi uialy bailanys operatorlary da qarjylyq monitoring sýbektisi bolady. Iaǵni, olar aqparatty mindetti túrde berip otyrady. Osy derekter arqyly taldaý jasap, naqty nátije shyǵady dep senemiz”, – dedi ol.
