ءماجىلىس دەپۋتاتى مۇرات ابەنوۆ ۇزاق ۋاقىت بويى پارا الىپ كەلگەن شەنەۋنىكتەردىڭ جاسىرىن بايلىعىن مەملەكەت مەنشىگىنە قايتارۋ ماسەلەسىن كوتەردى. بۇل تۋرالى ول ءماجىلىس وتىرىسىندا ايتىپ، قارجىلىق مونيتورينگ اگەنتتىگىنە ءبىرقاتار ناقتى سۇراق قويدى، دەپ حابارلايدى Dalanews.kz.
"سوڭعى كەزدەرى قوعامدا ءبىر ماڭىزدى ماسەلە ءجيى تالقىلانىپ ءجۇر. مەن بۇل تاقىرىپتا بىرنەشە ماقالا جاريالادىم. ءسوز بولىپ وتىرعانى – كەڭەيتىلگەن كونفيسكاسيا تۋرالى باستاما. ونى قوعام قولداپ وتىر. سەبەبى قازىرگى جۇيەدە بىرەۋ ۆاگونداپ ۇرلاپ، سونىڭ تەك ءبىر قاپشىق بولىگىن عانا قايتارادى دا، قالعانىن جىمقىرىپ قالادى. ال ەندى ءبىر ادام از عانا كولەمدە ۇرلاپ، تۇتقىندالىپ كەتەدى. بۇل ادىلەتسىزدىك.
سوندىقتان "كەڭەيتىلگەن كونفيسكاسيا" دەگەن تەتىكتى زاڭداستىرۋ قاجەت. مىسالى، شەنەۋنىك جىلدار بويى پارا الىپ كەلگەن دەلىك. تەك ۇستالعان ساتتەگى اقشاسىن عانا مەملەكەتكە قايتارادى. ال قالعان $10 ملن ۇيىندە جاتا بەرەدى، تۋعان-تۋىستارىنىڭ اتىنا جازىلعان. مۇنداي جاعدايدا، شەنەۋنىكتىڭ بۇكىل زاڭسىز بايلىعىن مەملەكەت مەنشىگىنە قايتارۋ كەرەك. بۇل نورما زاڭ جوباسىنا ەنە مە؟" – دەدى مۇرات ابەنوۆ.
دەپۋتات دروپپەرلەر ماسەلەسىن دە كوتەردى. ياعني الاياقتاردىڭ شوتىنا كەزدەيسوق نەمەسە ءماجبۇرلى تۇردە اقشا اۋدارىپ، كەيىن ءوزى زارداپ شەگەتىن دەلدال ازاماتتار تۋرالى.
“الاياقتاردىڭ قولىنا تۇسكەن اقشانى قايتارا الماي وتىرمىز. ۇلتتىق بانك بۇل قاراجاتتىڭ جۇيەدە تۇرعانىن ايتادى. سوندا نەگە قايتارىلمايدى؟ قاراپايىم حالىق زارداپ شەگىپ جاتىر”، – دەدى ول.
سونىمەن قاتار مۇرات ابەنوۆ كريپتوۆاليۋتا بيرجالارىنىڭ ارەكەتىنە دە نازار اۋداردى. ونىڭ ايتۋىنشا، زەينەتكە شىققان مەديسينا قىزمەتكەرى حالىق بانك كارتاسى ارقىلى بەلگىسىز “Monpay” اتتى كريپتوبيرجاعا ون شاقتى ترانزاكسيا جاساعان. بۇل — الاياقتىققا كەڭ جول اشاتىن الاڭ.
“بانك دەپ كورسەتىپ تۇر: اقشا قايدا كەتكەنى بەلگىلى. ءبىراق بۇل كريپتوبيرجاعا نەگە توسقاۋىل قويىلمايدى؟ نەگە ونى توقتاتپايمىز؟”، – دەپ اشىنا ايتتى دەپۋتات.
ماجىلىسمەننىڭ بۇل ساۋالدارىنا قارجىلىق مونيتورينگ اگەنتتىگى ءتوراعاسىنىڭ ورىنباسارى جەڭىس ەلەمەسوۆ جاۋاپ بەردى.
“ءيا، دروپپەرلىكپەن كۇرەستى كۇشەيتۋ كەرەك. بۇل باعىتتاعى زاڭ جوباسىنا سايكەس، ەندى ۇيالى بايلانىس وپەراتورلارى دا قارجىلىق مونيتورينگ سۋبەكتىسى بولادى. ياعني، ولار اقپاراتتى مىندەتتى تۇردە بەرىپ وتىرادى. وسى دەرەكتەر ارقىلى تالداۋ جاساپ، ناقتى ناتيجە شىعادى دەپ سەنەمىز”، – دەدى ول.
