Desek te, bizdiń elimizde saiasi ustanymy anyqtalmaǵan biraz adam bar. Ony jasyrýdyń jóni joq. Elimizde júrgen orystardy aitpaǵan kúnniń ózinde qara orystardyń ózderi Keńes zamanynyń «igilikterin» aityp, sol zamandy ańsaǵanyn kórgende kádimgidei júikelep qalasyń.
2010 jyly Qazaqstan, Resei jáne Belarýs Keden odaǵyn qurǵany esińizde shyǵar? Sol jyldary jazda Balqash kóliniń jaǵasyna baryp, demalǵan edik.
Ol kezde jurttyń bári Túrkiia, Mysyr, Eýropa elderine baryp demalatyn-dy. Sondyqtan shyǵar kól jaǵasynda qazirgidei kóp adam bolǵan joq.
Bizdiń jýrnalist ekenimizdi bilgen soń, eki orys janymyzǵa kelip áńgimege tartty.
Ózderi tańǵy 9-dan jumysqa baryp, keshki 18:00-de úiine kelip, senbi, jeksenbi kúni júz gramyn iship, tynysh júretin Keńes zamanyndaǵy «jumysshy sharýa» orystar ekenin bet-álpeti aitqandai boldy.
Olarǵa bajailap qaraǵanymda toqsanynshy jyldardaǵy toqyraý kezeńi betterine tereń ájim salǵanyn da baiqadym. Sodan olar ózderin mazalaǵan suraqtaryn qoidy.
– Siz jýrnalist ekensiz, saiasattan habaryńyz bar ǵoi. Kedendik odaq qurylyp jatqanyn estidik. Bul – Keńes odaǵynyń qurylýynyń basy ma? Endi baiaǵy alańsyz ómirimizge... qaita oralamyz ba, – dep suraqty tótesinen qoidy.
Sodan álgi eki orysqa Kedendik odaqtyń qurylýy Keńester Odaǵynyń qaita qurylýy emes ekenin, munyń jai ǵana ekonomikalyq odaq ekenin aityp túsindirdim. Budan keiin eki orystyń saly sýǵa ketip, oryndarynan súiretilip turyp, jónderine ketkeni esimde.
Ras, sol kezde bireý «Keńes Odaǵy qaita qurylýy múmkin» dese, onyń betine kúle qaraýshy edik. Qazir ondailardyń betine kúle qarap, áńgimesin júre tyńdamaimyz.
Ásirese Pýtinniń imperiialyq saiasaty asqynyp, Ýkrainaǵa basyp kirgennen beri bul máselege oi toqtatyp, qaýiptenip qaraityn boldyq emes pe?
Elimizde Keńes Odaǵyn ańsaityndar az emes. Barshylyq. Eń soraqysy, mundailar qazaqtyń arasynda da jii kezdesedi.
