Qazaqstan Úkimeti 2027-2029 jyldarǵa arnalǵan áleýmettik-ekonomikalyq damý boljamyn usyndy. Bazalyq stsenarii boiynsha osy kezeńde el ekonomikasynyń naqty ortasha jyldyq ósimi 5%-dan joǵary bolady dep kútilýde, dep habarlaidy dalanews.kz.
Ulttyq ekonomika ministri Serik Jumanǵarinniń málimetinshe, nominaldy jalpy ishki ónim 2027 jylǵy 199,3 trln teńgeden 2029 jyly 245 trln teńgege deiin ulǵaiady. Ekonomikalyq ósimniń negizgi draiveri munaidan tys sektorlar bolmaq.
Óńdeý ónerkásibiniń ósimi taý-ken óndirisine qaraǵanda joǵary bolady dep boljanǵan. Negizgi úlesti metallýrgiia, mashina jasaý, qurylys materialdary, himiia jáne tamaq ónerkásibi qamtamasyz etedi. Aýyl sharýashylyǵynda jyl saiynǵy ortasha ósim keminde 5% deńgeiinde kútiledi.
Qurylys salasynyń ósimi 2027 jylǵy 16%-dan 2029 jyly 17,3%-ǵa deiin jetýi múmkin. Bul kólik-logistikalyq, energetikalyq jáne sý infraqurylymyn damytý, sondai-aq turǵyn úi-kommýnaldyq jáne áleýmettik nysandardy jańǵyrtý jobalary esebinen qamtamasyz etilmek.
Qyzmet kórsetý salasynda saýdanyń jyl saiynǵy ortasha ósimi 5,7%, kólik jáne qoimalaý salasynda 10,4%, aqparat jáne bailanys salasynda 9,2% bolady dep boljanyp otyr.
Syrtqy saýda balansy oń kúiinde saqtalady. Taýar eksporty 2027 jylǵy $82,8 mlrd-tan 2029 jyly $88,5 mlrd-qa, al import $80,5 mlrd-tan $88,4 mlrd-qa deiin ósedi dep kútilýde.
Infliatsiia 2027 jyly 7,5-9,5%, al 2028-2029 jyldary 6-8% deńgeiinde boljanǵan.
Biýdjet kiristeri de kezeń ishinde ósedi dep kútilýde. Respýblikalyq biýdjettiń kiristeri 2027 jyly 19,9 trln teńge, 2028 jyly 21,7 trln teńge, 2029 jyly 23,4 trln teńge bolady dep boljanǵan.
Bul rette biýdjet tapshylyǵyn birtindep azaitý kózdelip otyr. 2027 jyly onyń kólemi JIÓ-niń 2,3%-yn qurasa, 2029 jylǵa qarai 0,4%-ǵa deiin tómendeýi tiis.
Ulttyq qordyń valiýtalyq aktivteri de ósedi dep boljanýda. 2027 jyly onyń kólemi $65,2 mlrd, al 2029 jyly $70,6 mlrd bolady dep kútiledi.
Úkimet otyrysynda 2027-2029 jyldarǵa arnalǵan áleýmettik-ekonomikalyq damý boljamynyń jobasyn qoldaý usynyldy.
