Atalǵan usynys aiasynda búginde tiisti jumystar atqarylýda. Naqtyraq Bekbota eldi mekenindegi «Jambyl» dárigerlik emhanasyn jańartýǵa jer tańdaý aktisi istelip, aýdannyń kadastr mekemesinen jospary alyndy. Qazirgi tańda «Abai» Keles aýdandyq aýrýhanasy tarapynan sáýlet-josparlaý tapsyrmasy daiyndalýda.
Bul týraly aýdan ákimi Jánibek Aǵybaevtyń Jambyl aýylynyń turǵyndarymen kezdesýinde baiandaldy. Kezdesý erkin formatta ótip, turǵyndar kókeiindegi suraqtarǵa jaýap aldy. Aýdan basshysy aldymen ótken kezdesý barysynda kóterilgen máselelerdi sheshilý jolyna toqtala kele, atqarylyp jatqan jumystardyń barysyn baiandady.
– Búgin Jambyl aýyldyq okrýgine ózderińizben júzdesip, mańyzdy máselelerdi birge talqylaý úshin arnaiy kelip otyrmyz. Jyl basynan beri ózderińizben 2 eseptik kezdesý ótkizdik. Sol kezde mańyzdy 8 máselesi kóterilgen. Sol máselelerdi sheshý boiynsha arnaiy is-shara jospary istelip, júieli jumystar júrgizilýde, – dedi aýdan basshysy Jánibek Aǵybaev.
Sonymen birge aýyl okrýginiń damý josparyna sáikes turǵyndardyń talap- tilegin oryndaý maqsatynda №61 Abai atyndaǵy mektep ǵimaratyna kúrdeli jóndeý jumystary júrgizilip, aýyldyq okrýgi ákimdigi jańartylady.
Oǵan qosa, Bekbota jáne Maida Bozai eldi mekenderi aralyǵyndaǵy oblystyq mańyzy bar KH-108 avtomobil jolynyń 0-11 shaqyrymyn ortasha jóndeý jumystary jáne Ashykól men Qalǵansyr eldi mekenderi aralyǵyn qosatyn aýdandyq mańyzy bar KHGS-32 avtomobil jolynyń 6,8 shaqyrymyna ortasha jol jóndeý jumystaryn júrgizý jumys josparyna engen bolsa, biyl Maidabozai eldi mekeni aýyz sý júiesimen qamtylady dep kútilýde.
