Bilim kúninde Almaty oblysynda «Keleshek mektepteri» ulttyq jobasy aiasynda salynǵan bes jańa mektep esigin aiqara ashty. Bul bilim ordalarynda 4200 oqýshy bilim alady. Sondai-aq tozyǵy jetken taǵy 10 bilim ordasy kúrdeli jóndeýden ótip, búgin paidalanýǵa berildi. Biyl óńirde 36 myńǵa jýyq búldirshin alǵash ret mektep tabaldyryǵyn attady. Osylaisha, jańa oqý jylynda oblystaǵy 502 jalpy bilim beretin mektepte 384 myńnan astam oqýshy tárbielenedi, dep habarlaidy dalanews.kz.
Almaty oblysynda úsh aýysymdy oqytýdy joiyp, sapaly bilim berý maqsatynda sońǵy tórt jylda 75 jańa mektep ashylyp, 6 qosymsha japsarjai salyndy. Onyń 26-sy «Keleshek mektepteri» ulttyq jobasy aiasynda boi kóterdi. Nátijesinde úsh aýysymdy bilim berý uiymdarynyń sany 52-den 23-ke azaiyp, shalǵai eldi mekenderdegi 6000-ǵa jýyq oqýshynyń tasymal máselesi sheshildi. Sonymen qatar aldaǵy ýaqytta EPC+F tetigi arqyly nemese memlekettik-jekemenshik seriktestik aiasynda 10 mekteptiń qurylysy josparlanyp otyr.
Búgin paidalanýǵa berilgen mektepter Alataý qalasy, Ile, Qarasai jáne Eńbekshiqazaq aýdandarynda ornalasqan. Munda zamanaýi pán kabinetteri, fizika, himiia jáne biologiia zerthanalary, informatika, STEM jáne robototehnika kabinetteri, kitaphana, oqý zaly, sport zal, ashana, meditsinalyq pýnkt, májilis zaly, shyǵarmashylyq jáne kovorking aimaqtar qarastyrylǵan. Buǵan qosa, mektepter tsifrlyq oqytý tehnologiialarymen, joǵary jyldamdyqty internetpen, beinebaqylaý jáne qaýipsizdik júielerimen jabdyqtalǵan. Erekshe qajettiligi bar balalar úshin de barlyq qolaily jaǵdai jasalǵan. Bul oqýshylardyń tereń bilim alýyna, shyǵarmashylyq jáne ziiatkerlik qabiletterin damytýyna jol ashady. Óńirde infraqurylymdy jańartý jumysy munymen shektelmeidi. Keshendi josparǵa sáikes, 2025-2027 jyldar aralyǵynda oblystaǵy 91 mektepke kúrdeli jóndeý júrgizý kózdelgen.
Alǵashqy qońyraý kúmbiri Ile aýdany N. Tilendiev aýylyndaǵy sýjańa «Keleshek mektebinde» de estildi. Jalpy aýmaǵy 10 myń sharshy metrden asatyn nysan 900 oryndy jáne ǵimaratta 44 synyp bar. Jobanyń jalpy quny – 7,5 mlrd teńge. Búgin munda 100-ge jýyq oqýshy mektep tabaldyryǵyn alǵash ret attap, barlyǵy 1 230 bala qabyldandy.
Saltanatty sharaǵa Almaty oblysynyń ákimi Marat Sultanǵaziev qatysyp, oqýshylar men ustazdardy, ata-analardy bilim kúnimen quttyqtady.
«Memleket basshysy Qasym-Jomart Toqaev óz sózinde «Biz Qazaqstandaǵy barlyq balalardyń baqytty bolashaǵyn qamtamasyz etýimiz kerek» dep atap ótkendei, óskeleń urpaqqa sapaly bilim berip, olardyń jan-jaqty damýyna jaǵdai jasaý – memleketimizdiń mańyzdy mindetteriniń biri», – dedi aimaq basshysy.
Sonymen qatar bilim salasyn qoldaý maqsatynda óńirde atqarylǵan aýqymdy jumystar men oqýshylardyń jetistikterine toqtaldy. Aitýynsha, ótken oqý jylynda oblys oqýshylary jaratylystaný-matematikalyq baǵyt boiynsha respýblikalyq olimpiadada úzdik úshtikke endi, aýyl mektepteri arasynda komandalyq I oryndy jeńip alyp, chempion atandy. Qos birdei jas daryn Ulttyq biryńǵai testileýdiń eń joǵary kórsetkishi – 140 baldy jinap, rekord jasady. Sonymen qatar 1 831 mektep bitirýshi «Altyn belgini» enshilese, 1 675 túlek «Úzdik attestat» aldy. 7 myńnan astam oqýshy memlekettik bilim berý grantyn ielendi.
Jańa mekteptiń ashylý saltanatynda óńir basshysy úzdik ustazdardy memlekettik nagradalarmen, Alǵys hattarmen marapattady. Sonymen qatar úlken ómirdiń bosaǵasynda turǵan túlektermen júzdesip, olardyń synyp saǵatyna qatysty. Oqýshylarmen Ata Zańnyń qasieti, «Zań men tártip», «Taza Qazaqstan» tujyrymdamalarynyń máni jaily ashyq áńgime órbitti.
Aýyl turǵyndary da jańa nysannyń boi kótergenine dán riza. Solardyń biri – Qorǵasbek Qojahmetolla.
«N. Tilendiev aýylynda jańa mektep ashylǵanyna óte qýanyshtymyz. Sol úshin Memleket basshysyna, oblys ákimdigine alǵys aitamyn. Bul bilim ordasynan el-jurtyna qyzmet etetin, oi-órisi keń azamattar ósip shyǵady dep senemin. Endi osy mektepte meniń tórt nemerem bilim alady. Mektep kóńilimizden shyqty», – dedi turǵyn.
Sý jańa nysanǵa aiaq basqan oqýshylardyń da qýanyshynda shek joq.
«Ózim biologiia pánin jaqsy kóremin ári bolashaqta dáriger bolǵym keledi. Bul armanyma osy mektepte oqý arqyly bir taban jaqyndaimyn degen úmittemin. Sebebi munda arnaiy synyptarda túrli tájiribeler jasap, bilimimdi jetildire alamyn. Jańa mektep bizge qatty unady», – deidi 11-synyp oqýshysy Káýsar Qýanbai.
