Shyǵys Qazaqstan oblysynyń Katonqaraǵaı aýdanynda «Altaı – túrki áleminiń altyn besigi» atty halyqaralyq mýzykalyq festıvál ótti. Oblys ákimdiginiń qoldaýymen uıymdastyrylǵan sharaǵa on myńǵa jýyq adam jınaldy,- dep habarlaıdy Dalanews.kz

Festıvál aıasynda 60 kıiz úıden turatyn etnoaýyl boı kóterip, kelýshiler ulttyq taǵamdardan dám tatyp, qolóner sheberleriniń buıymdarymen tanysý múmkindigine ıe boldy. Sonymen qatar, dástúrli kókpar men alaman báıge jarystary uıymdastyrylyp, Berel qorǵanynan tabylǵan kóne artefaktiler tanystyryldy.

Merekelik shara túrki halyqtarynyń mádenı murasyn, tarıhı sabaqtastyǵy men rýhanı baılanysyn aıshyqtady. Kórermender Qazaqstan estradasynyń jaryq juldyzdary — «Mýzart», «Abyroı», «Turan» toptary men Qobylandy Bolat, Quralaı Meırambek, Ámire syndy ánshilerdiń ónerin tamashalady.

Festıváldiń kórnekti bóliginiń biri – 11 elden kelgen ónerpazdardyń qatysýymen ótken túrki mýzykasynyń shoý-festıvali boldy. Olardyń qatarynda Túrkıa, Reseı, Ázerbaıjan, Ózbekstan, Qyrǵyzstan jáne Mońǵolıa elderiniń ókilderi bar.

Festıváldiń sharyqtaý shegi — Berel qorǵanynan tabylǵan qasıetti Shtandart beınesiniń saltanatty túrde sahnada tanystyrylýy boldy. Bul – túrki halyqtarynyń rýhanı tutastyǵyn bildiretin erekshe sımvol. Festıváldi tanymal akter Ádil Ahmetov pen telejúrgizýshi Amına Jumamurat júrgizdi.

Baǵdarlama aıasynda etnografıalyq qoıylymdar, tarıhı kórinister, ulttyq áýender men bıler usynyldy. Óner ıeleriniń týyndylary men mýzykalyq nómirleri Altaıdyń adamzat órkenıetiniń besigi retindegi mańyzyn jáne mádenı birliktiń tereń maǵynasyn pash etti.

«Altaı – túrki áleminiń altyn besigi» halyqaralyq mýzykalyq festıvali túrki halyqtarynyń mádenı baılanysyn nyǵaıtatyn mańyzdy alańǵa aınalyp, óńirdiń mádenı ómirindegi jarqyn oqıǵa retinde este qaldy.